I prim miscioneres te Gherdëina
L scumenciamënt dla cristianisazion de Gherdëina ie lià ala nascita dla diozeja de Trënt: do la cristianisazion dla provinzia romana Raetia à San Vigil (383-405) scumencià si atività da miscioner a Trënt. Canche pona tl 6° secul iel unì frabicà la sënta dl vëscul sun l cherzuel de Jevun, ie Jevun deventà l luech de referimënt per l raion de Gherdëina. Tl 901 canche l rë Ludwig ti à scincà l raion al vëscul de Jevun Zacharias de Meierhof Prishna, ie la sënta unida spusteda a Persenon. L ann 999 iel per l prim iede unì numinà la parola Gherdëina te n documënt scrit.
Ntlëuta ti à l grof baiuvar Otto von Andechs sëurandat al vëscul Gottschalk von Freising n tòch de bosch sun l ëur a nord dla valeda che ie ncuei Gherdëina, scrijan “forestum ad Gredine”. L ann 1091 ti ie chësc raion unì sëurandat al vëscul de Persenon Altwin (1049-1097). Gherdëina ie unida evangeliseda dala pluania de Albions che fova pluania bele dal 798 y che ova cumpetënza sun duta la pert a mez ite dla valeda dl Isarch. Ntan l 12ejim secul fova Laion deventà pluania, leprò tucova nce Gherdëina. Dantaldut tl tëmp de Avënt y ntan la Cuarëisma ruvova vel’preve de Laion te Gherdëina per perdiché y per dé ora i sacramënc. Te duta Gherdëina ne fovel mo nia na dlieja y na curtina. I defonc messova unì menei da Colfosch, che fajova nce mo pert dla pluania de Laion, passan sun l Jëuf de Frea nchin a Laion. L vën cuntà che a Colfosch y te Sëlva univa d’inviern i morc tenii su sotët o dedora tla nëif y che i univa pona menei a Laion pernanche l univa tarënt. Nce sce a Urtijëi fovel dessegur bele na dlieja tl 11ejim secul, ie i studiëusc a una che la dlieja da Sacun fova la dlieja zentrela de Gherdëina, scebën che tlo ne fovel degun preve; (la documentazions va de reviers nchin al 1400). Santa Cristina se à destacà per prima dala pluania de Laion y ova nce l prim preve per si cont. N cont de cuestions de dlieja fova donca Santa Cristina l luech prinzipel de Gherdëina y do l’acurdanza fata dl 1418 a Laion danter l pluan Hans Steinacher y i chemuns de Gherdëina y Colfosch (Kamauns aws Greden, aws Silf und aws Kalfusch), messova l pluan savëi sibe l tudësch che la “wälsche Sprache”, minà ie bën l ladin. La sënta de caplan nueva te Gherdëina ie unida metuda su ai 13 de nuvëmber 1443 sota l vëscul Georg I de Persenon, do che bele ai 18 de nuvëmber 1440 fovel unì cunzedù n “Frühmeß-Benefizium” (furmescere), dantaldut ora dl avëi dla dlieja de Sacun che fova deventeda rica cun la dunfiertes di pelegrins. Aldò de documënc scric per latin cun la data 13 de nuvëmber 1440 messova l prim caplan de Gherdëina, che ova si cuatier a S. Cristina, dì mëssa via per l’ena tla dlieja de S. Cristina y mé n cajo de na noza o de na supeltura a Urtijëi o sa Sacun; ti dis de festa messovel dì mëssa n iede a S. Cristina, n iede a Urtijëi y n iede sa Sacun, ulache pona ruvova adum duta la populazion dla valeda. Al chemun de Urtijëi ti iel unì cunzedù n preve ai 20 de jené dl 1652. La populazion de Sëlva messova jì a mëssa a S. Cristina nchin dl ann 1735 canche i à pona giapà n preve tres na dunazion (Stiftung) dl grof Josef Anton von  Wolkenstein. Ti libri de dlieja de Santa Cristina, che va de reviers nchin ai 18 de jené dl 1606, vëniel dit che na curazia ie unida metuda su ai 20 de dezëmber dl 1674 sota l prinz vëscul de Trënt y de Persenon Sigismund Alfons, nciarian Jakob Castollazzo, tl prim primissarius a Laion, coche curat te chësta curazia. Chësta acurdanza vëija dant che l curat nuef muessa cunëscer la rujeneda dl luech y che l muessa dì mëssa uni vënderdi tla dlieja da Sacun y uni sada te Sëlva.

La dlieja
La dliejes de Gherdëina plu vedles ie permò da liejer te documënc dl 13ejim secul: la dlieja da Sacun ie unida frabicheda da Burghard von Säben, l seniëur de Stetteneck dl 1181 y la dlieja de S. Cristina vën numineda l prim iede te na lëtra de nduljënza dl papa che ntlëuta fova a Avignon ai 12 de dezëmber dl 1342 coche “Ecclesia Sancte Cristinae“. Chësta santa univa unereda bele dant a S. Cristina. Te Sëlva iel unì fat su na capela dl 1503 da Wilhelm I, prim Freiherr dla familia Wolkenstein cun l aiut dla populazion metan ite l cheder dla Madona dl Aiut (nia chël che ie al didancuei, ma plu n vedl). Ti documënc de vijitazion dl vëscul dl 1517 iel scrit che la capela ne n’ie mo nia cunsacreda. N documënt dl ann 1513, numer 670 tl archif di Wolkenstein dla Trostburg, rejona de na “Messenstiftung“ l di dla Gran Santa Maria. Purempò vën la dlieja gën vijiteda dai credënc y l cronist Marx Sittich conta bele ntëur al 1600 che la capela univa crissa su per i gran pelegrinajes (“gros Wolfarten”), dantaldut canche l fova na drëta suta (“wann es nit regnen will“). Ora de chël fova la blòta dlieja nce la fòssa de familia di grofs de Wolkenstein.
De chësc nes dà testemunianza n sas de fòssa di 23 de agost dl 1686 de Ferdinand Karl von Wolkenstein, mort cun 38 ani tl Ciastel. L cheder, na copia dla Madona de Lucas Cranach (1472-1533), ie unì stiftà dal grof Engelhard Dietrich, donca dan l 1647 (ann che l ie mort), ma l ne fova
dessegur nia l prim cheder dla Madona tla dlieja de Sëlva ajache l ie permò unì metù ite n 100 ani do la prima capela. Aldò dl documënt de vijitazion dl 1577 ne n’univa l santiscim mo nia tenì su te dlieja. Ma aldò de Neeb y Atz ie la vedla capela riesc do unida ngrandida dassënn y ova nce giapà doi auteresc, un n autere ad Sanctum Sebastianum y Rochum y l auter ad Sanctum Vitum et Sanctam Catharinam; aldò de d’autri
documënc, bonamënter ora dl archif de dlieja, ie l prim ngrandimënt permò stat dl 1670 y l santiscim ie permò unì metù ora dl 1759. N documënt dl 1704 rejona nce de n terzo autere dedicà a Sant Antone da Padua. I servijes de dlieja univa for mo fac da S. Cristina y mé n la festa dla Gran Santa Maria univel dit mëssa per duta la pluania, nce per S. Cristina, te chësta capela. Do che dl 1678 oven frabicà n ciampanil, à l chemun auzà la dunfierta per la dlieja damandan de avëi n preve te Sëlva. Ma i ova messù se ncuntenté cun la mpermetuda dl curat de S. Cristina de dì mëssa te Sëlva feter uni dumënia y ti dis de festa. Dl 1722 iel pona nce unì fat na canssla y dl 1731 iel unì fat su la calonia sun
ncëria di grofs de Wolkenstein (dancà sun l mur de stua fovel da udëi l blason di grofs de Wolkenstein cun la data 1731). Pra la cësa fovel nce n tublà cun na stala y n pitl tòch de grunt. Chësc ie unì vendù dl 1990 ala Scola de Schi de Sëlva per frabiché su la sënta nueva. L 1740 iel unì metù su l’ëura sun ciampanil y tl 1794 iel mo n iede unì ngrandì la pitla dlieja.

La dlieja frabicheda da nuef dl 1870
Davia che la vedla dlieja ne fova nia plu granda assé per la populazion de Sëlva (928 persones) y davia che la messova nce unì dertureda su, à l Cunsëi de chemun sota si ambolt “Vorsteher” Josef Anton Perathoner da Frëina fat ora ai 5 de utober 1869 de la fé su da nuef. Sëlva ne fova ntlëuta nia n chemun dal muet. La dlieja ova n avëi ntëur a 10.000 gulden y i fic tlecova iust per curì la majera spëises. La sburdla per nvië via chësc gran lëur fova unida da na bela dunazion de bera Sebastian Sanoner da Costa che vivova a Paris y che ova dunà 10.000 francs ala dlieja. Ël à nce prià bel de sagré n pitl autere a San Bastian. Josef Senoner (bera Sepl da Janon) ti à lascià do si mort dl 1870 na bela soma ala dlieja y cun chësta an curì belau n terzo di custimënc. N auter gran bënfatëur fova bera Sepl da Brida. L grof Leopold von Wolkenstein ova dunà l grunt y dat nce n cuntribut per fé su la dlieja, n grum de persones fajova na dunfierta, scumencian pra la cosera Elisabeth y da d’autri cumëmbri dla familia dl coser, persones dal muet de Gherdëina che vivova te d’autra ziteies dl’Europa nchin pra i cristians dla valeda y dantaldut la jënt de Sëlva nstëssa che judova nce pea pra i lëures. L fova nchinamei unì nvià via na lotaria per fé su la dlieja nueva y per nvië la jënt a dunfrì deplù, iel unì fat na gran festa canche n à metù l prim sas ai 25 de mei dl 1871. La naveda zentrela ie unida zareda ju y la dlieja nueva tl stil gotich ie unida fata su aldò dl proiet dl curat sn. Cyprian Pescosta (1815-1889) de Curvea. Nce l vedl presbitere ie unì mudà te n jegher de doi auzedes. Bele da studënt y pona nce da caplan, passova sn. Cyprian Pescosta si tëmp liede cun l dessëni. Chësc preve jëunn ova talënt tl ciamp dl’ert y perchël iel unì mandà dl 1945 a Cortina ulache l nseniova tla scola d’ert. Do na vita rica de mudamënc danter atività religëusa y artistica iel pona deventà pluan sa Bula, ulache l ie restà dal 1865 al 1877. Do avëi audì de si bon inuem coche artist, l à i uemes de Chemun de Sëlva y nce l curat (expositus) sn. Bastian Kostner nciarià de fé i proiec per la dlieja nueva. De agost dl 1972 pudova Pescosta fé al savëi cun gran legrëza che n ova stlut ju i lëures, nce de gra al aiut dl moster de Badia Anton Rudiferia y de si muradëures. Per l bon lëur fat, ti iel unì sëurandat a Rudiferia n diplom cumpedan su duc si meric che ova fat scialdi plajëi ala jënt dl luech. Ai 10 de utober 1872 ie la dlieja unida giaurida cun solenità dal digan de Ciastel Alois Bamhackl y ai 24 de setëmber 1877 iela unida sagreda dal coadiutor dl vëscul Johannes Haller de Trënt. La naveda nueva tl stil neogotich ti semiova scialdi ala vedla capela. Ora dla majera mesures fovel mo la pitures sun i 8 vieresc nueves, l rujon sëura la rëjes cun l emblem di cater vangelisã. I cater vieresc dl presbitere mustrova l’anunzieda, la noza, la vijita y la ncuronazion dla Madona. Do na nrescida de Dietrich Mussner de Curzelon, resulteiel che tl mëns de lugio 1879 ie un di trëi vedli auteresc de stil neoromanich unì vendù ala dlieja de S. Florian a Cianacëi, y nsci nce l tabernacul dl 1876. Dl 1874 iel nce unì fat l prim orgun cun 15 reghistri da Josef Aigner, paià da Giusepina Sanoner, muta de bera Bastian da Costa de Paris. Canche dl 1887 à dat ju l tëune y l orgun ie unì dassënn danejà, iel riesc unì cuncià da Thomas Kirchmair, n aiutant de Aigner y n ann do iel unì metù su n peratarlui sun ciampanil. Riesc do avëi stlut ju i lëures de dlieja oven fat ora de fé na curtina. Nce sce bele da giut incà ne n’oven nia plu drë de mené i defonc a Laion, messoven purempò i suplì a S. Cristina. Inò à l grof Leopold von Wolkenstein dunà l grunt al Chemun de Sëlva y ai 14 de utober dl 1874 à l chemun fat dumanda de benedì la curtina y de pudëi batejé i mutons nasciui te Sëlva. La prima fòssa porta la data 14 nuvëmber dl 1874. Ti ani 1950/51 y 1956 y pona mo n iede l ann 1993 ie la curtina unida ngrandida. Nchin ti ani 1980 fovel te curtina, che te Sëlva ie dl chemun y nia sciche te n grum de d’autri luesc dla pluania, n tòch de tiera ncertlà ite nia benedì ulache l univa suplì i morc nia de religion catolica. Tla curtina nueva iel unì metù su la vedla ciampana dl 1565 (plu vedla
dl ciampanil) che vën batuda ntan la supeltures.

La dlieja nueva dl 1988
La dlieja de Sëlva, fata su dl 1872, scumenciova ti ani 1970 a vester massa pitla per ciafië per 1500 abitanc y feter 6000 fulestieres che fova tlo ntan la sajon. Bele sn. digan Friedrich Moroder y pona sn. Luis dl 1960 y 1963 ova scrit al chemun per prië bel de varenté la lerch per frabiché o ngrandì la dlieja, nce sce n ne n’ova mo deguna idea de co la fé. Sn. Luis ova lascià fé i prim studies per ngrandì la dlieja. N studio de architetura
de Würzburg ova purtà de si bona na prima idea cun n model de coche n pudëssa la ngrandì. Tl luech fovel unì ora de gran descuscions, danter chëi che minova che la ie da lascé sté y n fé na nueva ntëur l tublà da Nives, chëi che minova che l ie miec n taché leprò n tòch (magari sota tiera) y chëi che ratova che l fossa miec la zaré ju y n fé su na nueva. Ntant fova la dlieja sambën bele dai ani sota scunanza y uni dezijion messova passé tres l ufize per la scunanza di monumënc artistics de Sudtirol. Per pudëi mëter man a chësc ngrandimënt ova l chemun dant messù zaré ju la vedla cësa de chemun y spusté la streda Nives che passova propi dlongia i mures de dlieja via. Sota sn. pluan Andrea Perathoner dl Orp ie l proiet dla dlieja nueva jit inant aslune y n ie stac boni de crì ora l proiet che ie pona unì realisà. Dl 1985 fova sn. pluan, l cunsëi de pluania y l cumité per l frabiché a una sun l proiet fat dal inj. Torggler de Maran che ova dat ite chësta idea al chemun y sambën ai
ufizies dla provinzia y dla curia dl vëscul a Bulsan. La lizënza de frabiché oven permò giapà do n recurs al Guviern provinziel y nsci oven pudù scumencé ai 18 de auril dl 1988. N chël di (di do la prima santa cumenion) iel unì scumencià a rumé ora la dlieja, desfé l orgun, zaré ju i mures
dla gran naveda, lascian mpe l jegher, l ciampanil y la pert ntëur autere (presbitere) y n à pona scumencià a fé su la dlieja nueva che cunescion al didancuei. Uni di fovel sun plaza tlaps de jënt che cialova, de curiëusc y de critichëusc, n grum tl prim cun n gran spavënt, y dedò via via cun legrëza y amirazion. Ala fin iela garateda drët bën y bele ai 18 de dezëmber dl 1988 an pudù la benedì. Sambën ne fovela mo nia fineda defin, l manciova mo la stazions, l orgun y i sanc, che ie unii metui ite l ann do. Cunsacreda iela unida dal vëscul Wilhelm Egger ai 23 de setëmber dl 1990. De ndut ova l ngrandimënt dla dlieja custà 3.200.000.000 lire paiedes ju dantandut cun la dunfiertes dla jënt dl luech per feter 2 miliardes. L rest ie unì da chemun, provinzia, Cassa Raiffeisen y d’autri. L chemun à fat n chëla ucajion nce la plaza, la capela di morc y à spustà la cabina dla lectrisc che fova dan curtina.

I curators d’anes de Sëlva
Sëlva à giapà dl 1736 l prim preve (expositus): sn. Demëine Trocker da Bula che se à cruzià dl’anes de Sëlva dal 1736 nchin al 1782. Dopro iel unì sn. Casper Tasser da San Ciascian che ie restà per bën 45 ani te Sëlva ngrandian dl 1794 mo n iede la dlieja. Do ël fovel plu prevesc per puec ani nfin al 1856 canche sn. Bastian Kostner de Iacun à scumencià si atività longia da expositus y ntan chisc 52 ani fovel te Sëlva n svilup mpurtant dal pont d’ududa dla dlieja, economich y soziel. Cun bunder ti cialova la jënt de Sëlva ai prim turisã che ruvova, ma i se à riesc
usà a d’ëi. De chësta segonda metà dl 19ejim secul nes conta cun n grum de amirazion, mpue de stolz, ma nce cun n fruz de festide y de ironia te na cronica l pater capuziner Fedele Demetz de Solech. Nscila rejona pater Fedele dl gran numer de prevesc de Sëlva, dla bela cumpëida de 13 prevesc y 6 patri che ova dit mëssa nevela danter l 1853 y l 1898. L conta nce de 14 munighes de Sëlva, 7 studiei y 4 studënc. Bele dl 1848 iel unì frabicà su sun la plaza daujin ala dlieja na cësa per la scola y per l chemun. Do sn. Bastian iel deventà curat sn. Anselmo Ploner dl Juan nfin al 1933 y riesc do sn. Franzl Insam da S. Cristina dan y ntan la segonda viera nfin al 1945. Do la segonda gran viera dl 1945 ie sn. proviser Franz Insam jit sciche pluan a Margreid y te Sëlva ie deventà curat sn. Friedrich Moroder de Urtijëi (1906 - 1973) che ie unì numinà dl 1949 prim digan de Gherdëina y che deberieda cun trëi stimei uemes da ntlëuta (l ambolt Franz Mosna dl Flora, Vinzenz Mussner da Larciunëi, Eduard Senoner de Santuel) ova fat dumanda pra l ordinariat che Sëlva devënte pluania, dajan sambën duta la garanzies per l mantenimënt dl preve y dla pluania. Cun decret dl prim de juni dl 1949 ie Sëlva unida auzeda a pluania. Finalmënter ne n’ova Sëlva nia plu de bujën de depënder da d’autri (nevices ne messova nia plu jì n calonia a S. Cristina, la pruzescion da Juebia dai Andli univa tenida de juebia y nia permò la dumënia do). Per chësta ucajion fovel sambën stat na gran festa, per Nadel oven lascià ziplé na bela cripl y per la fin de utober fovel unì benedì la capela di tumei dla doi gran vieres cun n bel relief ziplà da Alois Insam. Trëi ani do dl 1952 oven pona lascià fé l tabernacul nuef. Dl 1957 se ova sn. digan amalà y l ova messù sté da dezëmber inant per plu mënsc tl spedel. Te chësc tëmp ova judà ora sn. Giuani Bernardi da Lësc y dopro sn. Engl Planker da Larjac. Sn. Engl ova te chësc curt tëmp petlà adum i scioldi per cumpré dal grof Resseguier l grunt per frabiché la calonia nueva
y l oratorium. Ajache la sanità de sn. digan ne fova nia miureda, ovel dat ju la pluania che fova pona stata scrita ora da nuef. Sn. Luis scrij te si pitla cronica che l ultim di per l cuncors, ai 21 de juni, l ova cherdà su l vicar generel mons. J. Kögl dijan “Sie haben auf Wolkenstein nicht  kompetiert”. Do si resposta “Ich habe nicht den Mut”, à chësc respundù “Schreiben Sie heute noch den Brief und erklären Sie, daß Sie für die Pfarrei Wolkenstein anhalten”. Nsci iela stata y ai 4 de utober 1958 iel stat l rezevimënt cun gran solenità dl pluan nuef. Sn. Luis Senoner de Ciablon ie stat pluan nchin de setëmber dl 1982. Sn. Luis scrij dla prima ena: “3 matrimoni, 8 pères jic n calonia, leprò l’ëures de religion te scola (ce tëmps!, tant che se à mudà). Mo n chëla ena ai 9 de utober la notizia dla mort dl papa Pio XII.” Sn. Luis scrij nce che l à pudù udëi la supeltura dl papa tla televijion ju da Bruno dla Vila: “Te Sëlva fovel pa mé 2 o 3 tei aparac ntlëuta“. Sn. pluan Luis Senoner se à desmustrà drët da talënt tl aministré, frabiché y cumedé su cie che ti fova unì sëurandat dala curia. Ti tëmps de sn. Luis iel unì frabicà plu iedesc: n à metù ite n sciaudamënt sota l fonz (1959), mudà ora la 5 ciampanes (dl 1961) y fat n tët nuef ala dlieja (1968), l oratorium y la calonia (benedii dl 1967), frabicà da nuef l tublà pra la vedla calonia y fat dainora n local da mpresté ora schi, fat su la capela di tumei ju dai crëps dl 1977. Ma sn. Luis udova nce danora l svilup dl luech: nsci ova ël salvà la lerch per ngrandì la dlieja canche dl 1963 fova l chemun tl lëur de vënder a n privat la plaza dlongia la vedla cësa de chemun y l à salvà l grunt “Busc dl Preve” te Val. Dl 1967 ulova i Carabinieri de Val cumpré l grunt dla pluania te Val per ngrandì l zënter sportif y la curia ova bele firmà si cunsëns, mandan l nutar, cun n tenente di Carabinieri te calonia a tò la firma dl pluan. Sn. Luis ne n’ova nia firmà, se trajan ados nce l melulëi di putënc dla dlieja y dl militer. Ma ël ova salvà l grunt y per nëus bën nce la puscibltà de jì te Val da Ciampac ite. Sce l fossa stat iló n raion militer “zona militare”, pona fossa bën Val åarà ju. Sn. digan Friedrich Moroder fova finalmënter inò varì y d’autonn ovel inò pudù sëurantò la cura d’anes sciche pluan a S. Cristina. S. Cristina y Sëlva ova inò giapà do truep ani
n caplan, sn. Raimund Perathoner de Caio. Nce sce l à mancià per tan de ani - dal 1933 al 1959 - n caplan che se dajova ju cun i jëuni, fova i jëuni ntlëuta mpo scialdi tachei ala dlieja y ala religion y i ova nsci dl 1957 ulù mëter su n Crist sun ëur da Jëuf de Crespëina ziplà da
Emmerich Mussner de Mano y sun Ciampinëi un ziplà da Franz Senoner de Santuel dl 1958. Dopro an tenì inant chësta bela usanza metan de biei crisc ziplei sun plu pizes. Ai 4 de jené dl 1960 ie per l prim iede jic 3 tlaps de studënc a cianté la stëila per la miscion. L caplan, sn. Raimund, ova fat njinië ca 9 guanc nueves y la stëiles. La ciantia, “L ie nuet a Betlemme”, ova metù adum sn. Artur Vinatzer, caplan a S. Cristina, y Stefan Demetz, maester y ugrister, ova scrit leprò la bela melodia populera. Ai 19 de merz dl 1961 iel unì cunsacrà preve sn. Konrad Senoner de Burdengëia y la mëssa nevela ie unida zelebreda cun gran solenità n lunesc de Pasca ai 3 de auril. La perdica ova tenì sn. digan Friedrich Moroder y pra la marënda ja La Gërva oven nce purtà dant n pez de teater. “L angiul unì ju dal ciel”. L’ultima mëssa nevela te Sëlva ie stata 7 ani do, ai 2 de lugio dl 1968 do che sn. Heinrich Perathoner da Linacia fova unì cunsacrà preve. L 1982 ie sn. Andrea Perathoner dl Orp de S. Cristina deventà pluan de Sëlva, restà tlo nchin tl 1996 canche la curia l à tlamà a tò su la pluania de Eppan (iló adurvoven n pluan che savëssa da ncuntenté tramedoi grupes linguistiches). Sn. Andrea se à dassënn cruzià dl ngrandimënt dla dlieja, che ie unì fat sota si rejia coche bele dit dessëura. Ël ie nce stat l ultim preve che à nsenià religion tla scola elementera, i si sculeies à for mo n bel lecort de si ëures y de si vester de bon cuer. Dedò ie chësc lëur unì sëurantëut dai maestri de religion. Dal 1996 se cruzia sn. Piere Clara de Antermueia dla cura d’anes y coche la cëla ora al didancuei, sarà ël l ultim pluan de Sëlva.

Curators d’anes te nosc luech
(expositus, benefiziac, curac, proviseri y pluans)

• 1736-1782 Sn. Trocker Demëine da Bula (per 46 ani)
• 1782-1827 Sn. Tasser Casper de S. Ciascian (per 45 ani)
• 1828 per n valgun mënsc Untersteiner Josephus de Göflan
• 1828 per n valgun mënsc Unterkircher Sebastianus de Teis
• 1829-1844 Sn. Dellago Luigi de Borgo Valsugana
• 1844-1856 Sn. Chizzali Antonio de Col S. Lizia (dal 1852 inant à Sëlva nce giapà n caplan)
• 1856-1908 Sn. Kostner Bastian de Iacun (per 44 ani)
• 1908-1933 Sn. Ploner Anselmo dl Juan (caplan dal 1896 y dedò pluan)
• 1933-1945 Sn. Insam Franz de S. Cristina
• 1945-1957 Sn. Moroder Friedrich (prim pluan de Sëlva)
• 1957-1958 Sn. Bernardi Giuani da Lësc y Sn. Planker Engl da Larjac ie stac proviseri
• 1958-1982 Sn. Senoner Luis de Ciablon da S. Cristina
• 1982-1996 Sn. Perathoner Andreas dl Orp da S. Cristina
• 1996 inant Sn. Clara Piere de Antermueia/San Martin de Tor

Prevesc de Sëlva y ann dla mësses neveles te Sëlva
Danter l 1800 y l 1900 fovel 20 prevesc de nosc luech che à dit mëssa nevela, dal 1900 inant mé plu 7 y l’ultima mëssa nevela ie stata dan bën
42 ani. Sn. Heini Perathoner da Linacia ie stat l ultim che à dit mëssa nevela, dan plu de 40 ani.

• 1700 Sn. Larzoneider J. Baptista da Larciunëi
• 1706 Sn. Insam Balthasar de Planvëidun
• 1735 za. Sn. Perathoner Josef de Runcac
• 1761 Sn. Perathoner Johann Baptista de Runcac
• 1810 za. Sn. Perathoner Johannes Angelus de Runcac
• 1812 Sn. Insam Stephanus da Linacia
• 1812 Sn. Demetz Josephus da Vastlé dessot
• 1815 Sn. Insam Stefan de Planvëidum
• 1831 Sn. Runggaldier Gregor da Frëina
• 1831 Sn. Senoner Felix da Dlaces (pater nia cunsacrà)
• 1839 Sn. Vinatzer Ujep de Anterleghes
• 1838 Sn. Senoner Adam da Costa
• 1853 Sn. Ploner Johann Batista de Planvëidun
• 1854 Sn. Kostner Bastian de Iacun (mëssa nevela a S. Cristina)
• 1863 Sn. Senoner Sebastianus da Vastlé
• 1863 Sn. Senoner Franziscus da Costa
• 1864 Sn. Perathoner Engl de Runcac
• 1876 Sn. Ploner Johann Batista da Sotanives (nasciù ora Solech)
• 1886 Sn. Senoner Vinzenz de Runcac
• 1885 P. Mussner Daniele da Cëdepuent (mëssa nevela te dlieja de Sëlva)
• 1889 Prof. dr. Perathoner Anton da Fussel
• 1890 Sn. Prinoth Anton de Iacun
• 1892 Sn. Ploner Anselmo dl Juan
• 1892 Sn. dr. Demetz Engl da Plazola
• 1914 Sn. Senoner Johannes de Ciablon - Sëlva
• 1927 Sn. Planker Englbert da Larjac
• 1935 Sn. Denicolò Felix de Dorothea
• 1941 Sn. Perathoner Hermann da Frëina
• 1948 Sn. Senoner Giuani de Santuel
• 1961 Sn. Senoner Konrad de Burdengëia
• 1968 Sn. Perathoner Heinrich da Linacia

Patri y capuzineri

• Pater Paulinus Senoner da Frata jit tl cunvënt ntëur l 1730
• Pater Gregorius Runggaldier da Frëina jit tl cunvënt dl 1831
• Frater Felix Senoner da Dlaces jit tl cunvënt ntëur l 1800 (*)
• Pater Romedius Senoner de Ronch jit tl cunvënt dl 1869
• Pater Cherubin Senoner de Burdengëia jit tl cunvënt dl 1863
• Pater Fedele Demetz de Solech jit tl cunvënt dl 1870
• Pater Daniele Mussner de Cëdepuent jit tl cunvënt dl 1880 (miscioner tl America latina)
• Frater Lucchesius Riffeser da Pramauron jit tl cunvënt dl 1886 (*)
• Pater Giuani Mussner de Cëdepuent jit tl cunvënt dl 1890
• Pater Levisc Mussner de Cëdepuent jit tl cunvënt dl 1890
• Frater Protasius Delago dl Moch jit tl cunvënt dl 1896 (*)
• Pater Johannes Mussner dl Moch jit tl cunvënt dl 1943
• Pater Irenaeus Nocker da Cësanueva jit tl cunvënt dl 1945
• Pater Eugenius Demetz da Ruacia jit tl cunvënt dl 1949
• Rë Erminio Pizzinini (trat su ta Mulin) jit tl cunvënt dl 1953
• Frater Emerich Senoner da Dorives jit tl cunvënt dl 1961
• Frater Ivan Bernardi dl Fever jit tla miscions dl 1977 (*)

(*) nia cunsacrà preve

Munighes
Dl ann 1897 fovel nasciù 14 munighes te Sëlva che fova ora per cunvënc dl’Austria. De ndut ie 35 ëiles de Sëlva jites munighes. Al didancuei nen vivel mo doves: Irmengard Senoner (Josefa) da Cësanueva che ie badëssa dla zisterzensies a St. Pauls; Maria Nives Mahlknecht (Ulrike) dla cësa IPEA muniga franzescana dla Imaculata y d’autra trëi dla frazions de Sëlva che fej pert tla pluania da S. Cristina: Karin Planker (Emilia) da Larjac muniga terziaria y la doi surans Reinelde y Irene Piazza da Ruacia.

La capeles
La plu vedla capela de Sëlva fova sambën chëla ti prei da Nives dl 1503 ulache l ie sën la dlieja. Vedla ie nce la dlieja de Val o capela de San Silvester ulache mo al didancuei vëniel jit doi iedesc al ann cun crëusc per prië y rengrazië de n bon tëmp y de na bona racolta: l’ena dan Juebia dai Andli y l di do la segra. Ti ani 1992-93 cun i lëures de restaurazion dla capela iel unì a lum de vedla pitures sun la storia dla vita de Gejù, i cater vangelisã, Adam y Dieva y l giudize universel y nce de vedla dates 1732, 1754 y 1792 y na data nia defin tlera che semea 1638. L pèr che la capela sibe mo plu vedla y la pudëssa jì de reviers ai tëmps dl Ciastel de Val (13ejim o 14ejim secul). I sanc che ie al didancuei te capela ie copies zipledes dl 1977 dai scultëures de Sëlva. I sanc uriginei ie unii metui al segur te calonia do che doi opres fova bele unides rubedes (l pitl San Martin y la Stazions). I sanc reprejentea San Sivester, San Bastian, San Roch, San Vit, Sant Antone da Padua, San Franzësch, San Ivuere y San Martin.

La capela de Santa Tilia (Otilia)
La capela de Santa Tilia sun l troi sota l Ciastel (Fischburg) ie unida dertureda dal chemun danter l 2007 y l 2009 y se merita inò de unì vijiteda.
La capela toca pra la puscion dl Ciastel nce sce la ie dedora dal tòch sivà ite, sun l troi che mëina da Ruacia o Ampezan sal Ciastel. La ie dedicheda a Santa Tilia che straverda i uedli, la urëdles y l col da burta malaties y ie per ani alalongia unida vijiteda sciche luech de pelegrinaje. Nfin ti ani 1950 passova tlo la pruzescion dl di do Juebia dai Andli. Sëura autere iel n cheder dla santa che reprejentea na muniga che tën tla man n taier cun doi uedli, tla pert auta dl curnejon iel da udëi tres n pitl viere scur doi uedli (che dëssa vester na relichia). L stil dla capela de S. Tilia ie sciche pra la gran pert dla capeles dl tert Medieve mescedà: i vieresc a mesa luna dales pertes de stil romanich, l tët ërt y spiz de stil gotich, la Madona dl Aiut sëura porta de stil rinascimentel y l autere de stil baroch. Fata su iela bonamënter unida dai grofs, adum o puech do l Ciastel (1620-1640); chësc vëniel jagà ajache nce tl Ciastel iel na capela dedicheda ala medema santa (una per i grofs y una per i pelegrins). L blason sëura porta a man ciancia ie chël di Wolkenstein metù ite te n curnejon de stil romanich, l blason a man drëta, nia cunesciù te nosc raion, mostra l valtoi dla contea dl Tirol, na A che bonamënter uel senifiché Aragon y doi dragons che ie nce da udëi sun la stola de Oswald von Wolkenstein. Chësc dut adum ie l simbol che desmostra che i Wolkenstein fajova pert dl orden di Dragons de Aragon. L depënt dla Madona dl Aiut ie nce na copia de Lucas Cranach (1472-1553) che ie nce da udëi sun n mur tl Ciastel cun na data 1672 y nce sun la cësa de Sociastel dl 1652 (trëi iedesc sun la puscion di grofs). La medema Madona dl Aiut ie sun plu peldes y cëses de chëi tëmps: Ciajea (1650), Col dala Pelda
(1670), Piciulëi (1727) y n.i. y nce te dlieja de Sëlva ulache l ie documentà che chësc cheder ie unì stiftà dal grof Engelhard Dietrich dan si mort (1647). Plu pec ora dla capela ie unii rubei dan ani: la Santa Scolastica, San Durich che tën n liber y n pësc, Santa Elisabeta, Santa Margarita, San Flurian y l’opra plu de valor che fova na popa o n bambin de cëira te n scrin de scipa.

La capela sun Jëuf de Sela ie unida frabicheda dal CAI de Bulsan y benedida dal pluan sn. Andrea Desalla ai prim de auril dl 1936. N ulova cun chësta capela dé la puscibltà a duc chëi che laurova y stajova tla ustaries y uties ntëur via de santifiché la dumënies. Dai tëmps do la viera incà iel d’instà de dumënia feter for na mëssa tla capela dl Jëuf de Sela. I vieresc tl stil gotich lecorda i trëi ciampanii dl Sela y la scipes ie depëntes cun motifs alpinistics cun l angiul custode. L chelesc te capela ie n donn dl papa Pio XI, che fova n alpinist apasciunà.

La capela sun Jëuf de Frea ie unida fata su ti ani 2002 y 2003 dala grupa ANA (Associazione Nazionale Alpini) y ie dedicheda a San Mauriz, l patron di saudeies.

La trëi capeles te curtina
La prima a mesa curtina cun a mez n gran Crist y na figura de Die Pere cun l Spirt Sant ie destineda a suplì i prevesc y patri de nosta pluania. Tlo iel na tofla cun duc i inuemes di prevesc morc che à laurà o che ie nasciui te nosc luech. Fata su iela unida cun la prima curtina l ann 1872.
La segonda a man ciancia ie dedicheda a duc i credënc dla pluania tumei tla vieres y ie unida fata su dl 1949 y à n bel relief de Alois Insam che mostra n saudé che mor. Doi gran tofles de miermul cumpëida su i inuemes di tumei tla doi vieres. La terza capela ie unida fata su dl 1977 per lecurdé duc i tumei ju di crëps. Sëura n liber de ram iel na bela Pietà de lën zipleda da Tita Demetz dl Pinzigher. Te chësc liber vëniel uni ann njuntà i inuemes de chëi che à inò perdù la vita ti crëps, fulestieres che ie tumei ju te nosc raions y nce de chëi de Gherdëina che ie tumei ju ora per l mond. L crì adum i inuemes ie unì fat danter l 1975 y l 1977 sota la rejia de sn. Luis Senoner da Wolfi Mussner, Rudolf Mussner, Franzl Runggaldier de Mizi y Mario Senoner da Bastl. I prim inuems scric su ie chëi de Valerio Micheluccio, dlacià ai 19 de auril 1625 sun Plan de Gralba y de Cristina Insom y si fia Domenica da Sacun dlacedes sun Frea dl 1626. Nfin ncuei iel unì scrit ite 320 inuemes de persones che à perdù la vita ti crëps.

La stazions dla Via Crucis da Daunëi nfin tala dlieja de Val
Sun l troi da Daunëi nfin tala dlieja de Val (i abitanc dl Daunëi y dla Vila à for dit dlieja y nia capela de Val) iel unì metù su sun scumenciadiva dla grupa di jëuni sota la presidënza de Georg Lardschneider da Larciunëi de sot l ann 1983 la 15 stazions dla Via Crucis zipledes uniuna da n auter scultëur de Sëlva. La stazions, uniuna fata ora de n tlapon de zirm sun l post, ie unides benedides dal vëscul Josef Gargitter ai 9 de utober 1983.
La stazions ie unides zipledes ora de tlapons de zirm sun l post, da scultëures de Sëlva

• Stazion 1: Emrich Senoner de Santuel
• Stazion 2: Hugo Senoner de Santuel
• Stazion 3: Friedrich Perathoner de Piciulëi
• Stazion 4: Heinrich Perathoner de Piciulëi
• Stazion 5: Georg Prinoth dl Jocer
• Stazion 6: Hubert Mussner, cësa Stevia
• Stazion 7: Franz Planker da Larjac
• Stazion 8: Hansi Perathoner da Linacia
• Stazion 9: Andreas Mussner da Costa
• Stazion 10: Robert Senoner da Frëina
• Stazion 11: Julius Senoner, cësa Vintlana
• Stazion 12: Tita Demetz dl Pinzigher
• Stazion 13: Otto Senoner de Burdengëia
• Stazion 14: Emmerich Mussner de Mano
• Stazion 15: Franz Senoner de Santuel

Crëujes y crisć sun nosta montes
Belau sun uni piza de nosc crëps iel na crëusc, l simbol dla cristianità di abitanc de nosc luech. Nsci nen iel sun Saslonch, sun la Gran y la Pitla Cier, sun la piza de Puez, sun Col de Puez, sun Piz Duleda, sun Boé, sun Mëisules y n.i. Crisc nen iel sambën nce n grum dlongia la cëses, te verzons y sun la spartizion dla stredes plu vedles. N lëur drët nteressant y de valor à fat l maester Pauli Senoner de Santuel te si liber “Stredes de vita, troies dla fede“ dat ora dala Pluania de Sëlva dl 2003 ulache l ie documentà duta la crëujes, i crisc, la peldes y la capeles de nosc luech. Tlo repurtons mé i crisã che ie sun la pizes y la capeles tan grandes che n possa nce jì ite.

Crisc iel sun la pizes

• Ëur da Jëuf/Crespëina, ziplà l 1957 da Emmerich Mussner de Mano
• Piz Miara, ziplà dl 1962 da Graziano Grossrubatscher da Larenzan/Urtijëi y metù su dai jëuni de Sëlva ai 20 de utober dl 1962. Chësc ie l crist plu alauta danter i posc ulache l nen ie un te Sëlva y l ie da udëi da duta la val
• Ciampinëi/Piza Pransëies, ziplà da Franzl Senoner de Santuel y metù su l ann 1958
• Col da La Pieres, ziplà da Gerhard Ploner de Gufidaun, fi de Toni, un di fredesc patrons dla mont de Stevia y metù su l ann 1996
• Steviola, ziplà da Friedrich Perathoner de Piciulëi y metù su l ann 1977
• Dantercëpies/ëur de Bustac, ziplà da Jonas Senoner da Cësanuëva y metù su l ann 1996
• Puez, ziplà da Luis Bernardi de Col y metù su deberieda cun Artur Lardschneider dl Tina l ann 1958
• Pra da Rì, ziplà da Heinrich Mussner da Guton y Nando Perathoner da Guton y metù su l ann 1957
• Col dala Suneles, metù su da Perathoner Josef de Col l ann 1988. L Crist ie unì batù ju dal tëune y l ie restà mé plu la crëusc
• Jëuf de Frea, l vedl crist che fova sun l troi che va sun Pisciadù ie unì renuvà de utober 2009 sun scumenciadiva de Otto Runggaldier dl Mastlé y ie dedicà ai tumei ju di crëps.