L blason, deventà blason ufiziel dl Chemun de Sëlva dl 1968 tres na delibra dla Jonta dla Region Trentin-Sudtirol, fova tl prim chël di grofs de Wolkenstein y l grof Konrad fova dl 1370 l prim a l tò ca coche si blason. L blason ie nce prejënt sciche blason de Michael von Wolkenstein-Trostburg tla basilica gotica de Barcelona tla Spania. I cater chedri che l mët adum reprejentea la nibles turondes te n ciel brum y la pizes spizes di crëps. Metù adum iel da doi blasons plu vedli, chël di grofs de Villanders/Pardell y chël di Maulrappen de Trostburg/Ciastel, che adum à furmà la familia di Wolkenstein tres la maridaia de Friedrich von Wolkenstein cun Katharina von Villanders-Trostburg. La reprejentazion plu vedla dl blason te nosc luech ie chëla mo al didancuei da udëi sëura la porta dla capela (vedl jegher) dla dlieja de Sëlva. Sun l mur sëura la porta de cie che l ie mo restà dl Ciastel de Val ne n’ie nia chësc blason, ma chël di Maulrappen da Ciastel. Ti libri sun nosc ciastiei iel plu blasons defrënc laite, un do l auter de cumëmbri dla familia che ova laurà ora l blason cun plu decurazions ntëur via per mustré su miec i tituli y la uneranzes arjontes. I culëures dl blason uriginel ie arjënt, cueciun, brum y fosch. Scemplificà ie l blason permò unì canche l ie unì tëut sciche blason dl chemun. Sambën nen iel nce d’autra nterpretazions dl blason: che la pizes ne fossa nia crëps, ma pizes de ermes y l turont nia nibles, ma mesa codles (deventedes ciampanii tl blason de Ciastel). Deplù tla “Beschreibung aller Wappen des fürstlichen, gräflichen, freiherrlichen und adelichen jeztlebenden Familien im Königreich Bayern von Martin Carl Wilhelm von Wölkern auf Kalchreuth. Nürnberg 1827” ulache l vën spiegà duc i blasons.