Bele tl’Età dl Bront y dl Fier (850-15 dan G.C.) fova l raion dl’Elpes zentreles abità da plu populi y canche i romans ova arjont la Elpes fova chisc populi unii denuminei duc adum “Rhaeti”. Ce popul che i rec fova ne n’ie nia dl dut tler. I studiëusc ne n’ie mo al didancuei nia a una danter na descendënza etrusca y chëla sustenida da de plu, de na descendënza celtica. La Raetia fova per i romans ai tëmps de Augusto (dal ann 15 dan G.C.) mé na region aministrativa y i populi che vivova tlo ne n’univa nia recunesciui sciche descendënc dla medema raza. I populi che abitova nosta tiera ova dessegur cumbatù nfin che la jiva contra la duminazion di romans, ma i ne n’ova sambën abù deguna puscibltà de vëncer contra n’armeda tan bën urganiseda sciche chëla de Roma. I rec perdova sot ala duminazion di romans bel plan si identità y la rujeneda univa romaniseda mescedan l ret cun l latin. Mo al didancuei iel restà te nosta rujeneda de plu paroles retiches, sciche crëp, roa, troi, barantl, dascia… Che nce i romans sibe passei y ebe n pert abità vel’raion de nosta val, ie desmustrà da plu reperc de fòsses romanes (per ej. a S. Cristina).
Dai romans ova la populazion autoctona nce mparà n grum de cosses nueves, sciche l frabiché cëses de mur, cultivé plu ntensivamënter la tiera, ma nce la prima formes dl viver n cumenanza y n.i. Ala fin dl mper roman dl 476 do G.C. ie la Elpes (dal Friul nchin a Bulsan) unides tuchedes dala migrazions di populi y ala fin ocupedes l ann 568 dai longobardesc che univa dal est y che, pervia che i ne fova nia trueps, ne n’ie nia stac boni de mudé la rujeneda y ie unii assimilei dal “ladin arcaich” che univa rujenà tla Elpes. Prësciapuech 100 ani do ie la Elpes unides ocupedes dai baiuvaresc che univa dal nord, ma che ne n’ie nia ruvei te uni valeda y à plucheauter sotmetù la Sbaiz, la Val Venuesta ntan che i longobardesc se trajova zeruch tla Val de Flëm, tl Ciadura y sambën nce te nosta valeda. I baiuvaresc tulova ite dal 592 do G.C. la Val d’Isarch y Puster y tlamova la populazion che rujenova la rujeneda neolatina “Walsche”, inuem che ie restà y n pert mudà per numiné i ladins “Krautwalsche”, che tl scumenciamënt fova “Walsche de Chur o de Coira”. I baiuvaresc cialova de resté tla valedes y de cultivé la tiera y njinië ca luesc y mejes. La legions romanes y nce i longobardesc ne fova nia plu urganisei sciche l toca y perchël ova i ocupanc baiuvaresc saurì da tò ite la valedes prinzipeles; i “latins o ladins” univa sburdlei ite tla mëndra valedes (Val Venuesta y valedes dolomitiches).

Dal 592 nchin ntëur l ann 1000 ie l raion de Sudtirol unì duminà for inò da d’autri populi y for striscià da ocupanc che univa dal nord: alemanns y baiuvaresc. Chisc ie i tëmps de Carlo Magno - Karl der Große (768-814), ncurenà dal papa l ann 800 cun la ncëria de defënder l’Europa cristiana dala nvajion di musulmans. Sota Karl der Große fovel nce unì urganisà aministrativamënter duta l’Europa te contées, “Grafschaften-contee”, che pudova tré ite chëutes y aministré la giustizia per cont di guvernadëures. Canche Otto I ova metù su l “Sacro Romano Impero-Heiliges Römisches Reich Deutscher Nation” y tëut ite l’Elpes zentreles ovel ubligà duc a rujené tudësch y chësc fova inò na gauja ciuldì che l ladin ie mé restà tla valedes secunderes (952). Zeche de segur sun Gherdëina an permò inò dl 999 te n documënt ulache l grof baiuvar Otto von Andechs (che se temova dala fin dl mond ududa danora per l ann 1000) ova dunà al vëscul de Freising adum cun d’autra puscions nce l bosch de Gherdëina “Forestum ad Gredine”. Te chësc tëmp ie bonamënter nce unì nridlà da Laion demez nosc luech, ulache chëi che vivova plu inite messova nce paië si chëutes dajan ju smauz, blava y nce bestiam. Do l vëscul de Freising ie passà nosc raion al vëscul Ulrich de Augsburg. Da chësc documënt pudëssen capì che Sëlva fova nfin al ann 1000 do G.C. mé plu o manco n bosch. L nridlamënt de Sëlva ie unì a se l dé bonamënter bel plan te de plu seculi nridlan dantaldut la pert da surëdl y nia massa ërta. L bujën de vester mo boni de cultivé blava (orde, siela y avëina) fajova crì ora l luech ulache n fajova su la prima cëses. La strutura geologica de nosc luech desmostra chësc mo al didancuei tlermënter. Ulache l fova massa ërt, ulache l fova massa puech surëdl per fé crëscer blava y per sëuraviver iel restà bosch. Permò dedò, cun l tenì bestiam se à la cultivazion auzà plu alauta taian l bosch nce per fé pastures y prei da mont. Tl 12ejim y 13ejim secul ie nosta valeda unida urbaniseda mpue dlonch ulache la jiva, taian bòsc y njinian ca ciamps y pastures. I prim luesc che vën numinei storicamënter te Sëlva (tl 13ejim secul) ie i luesc Ruveis (Dorives), Cavelun (Ciablon), Caphedepont (Cëdepuent) y Plan che fova duc dl grof Mainhard. Dan l 1300 fovel te Sëlva ndut 13 luesc da paur y l seniëur Randolf de Villanders (che dl 1293 ova giapà l Ciastel de Val, la pastures y i luesc ntëur via dai seniëures de Ciastel Rupert, Fritz y Ulrich) ova pona lascià pro de taië bosch per fé mo d’autri 7 luesc. Na dezijion che ntlëuta ova bele fat dé ite na prutesta dai abitanc di autri luesc che perdova a chëla maniera pastures y lënia da verder che fova dui doi de mpurtanza vitela. La unificazion dl Tirol ie unida cumpleteda da Mainhard II (1258-1295) ti tulan pudëi tempurel ai vësculi. Dessegur fova Sëlva sota la contea de Gudon y nce sota la medema sunieria, pona passela ala sunieria de Wolkenstein che ova cumpetënza nce sëura Colfosch. Ntëur l 1200 fova mo la Val Venuesta y la Val d’Ega ladines. Dl 1363 fova la contea dl Tirol passeda ai Habsburger y deventeda defin austriaca y la pert dolomitica dl Ciadura fova ruveda sota Unieja, situazion resteda nscila nfin ala fin dl 1700 canche l ie rot ora la vieres napoleoniches.

Tl 14ejim secul fovel suzedù te nosc raions n grum de desgrazies. L ann 1338, dl 1340 y dl 1341 fovel stat de gran nvajions de saioc, che ova purtà la ciarestia, dl 1348 fovel n gran tremot te duta l’Elpes urienteles y dl 1348/49 la pest. Per l segondo iede iel stat la pest dl 1636 ntan la viera di trënt’ani. Sambën ne n’ova la pest nia fat tan de gran danns te nosta val, ajache la jënt vivova plutosc sëula y zënza de gran cuntac cun la ziteies. La cunseguënza fova stata che dal 1350 al 1400 ne fova la valeda nia unida tan nridleda sciche tl secul dant. I luesc numinei l prim iede tl 14ejim secul ie: Pramazachan (Maciaconi), Tschieza (Tieja), Gutun (Guton), Plazoles (Plazola), Larschyneid (Larciunëi), Ruschalday (Rustlea), Fratthof (Frata), Golsell (Curijel). Dl 15ejim secul fovel pona stat l prim “gran frabicamënt” te Sëlva; l fova unì frabicà bën 20 luesc da paur y nce la prima capela ti prei da Nives l ann 1503. Mé tl ridl da Ruacia y Dorives fovel unì frabicà 10 luesc. Propi te chësc tëmp ti fovel unì cunzedù ai paures i prim dërc politics y nce na reprejentanza tl parlamënt dl Tirol “Landtag“, a na maniera che i paures ne pudova nia mé unì mudei ora dai seniëures, patrons dl grunt. Nce l dërt de suzescion da pere a fi fova unì recunesciù te chësc secul. Dal 1500 al 1700 fovel for mo ruvà leprò luesc y dl 1780 fovel te Sëlva 93 luesc da paur. Nce i Tiroler Freiheitskämpfe, al scumenciamënt dl 1800, à tucà Sëlva mé de puech.
Dl 1809, ntan la viera danter l Tirol y l Paiern adum cun la Franzia, fovel ruvà n batalion de 1.200 saudeies de Napoleon cun l generel Peyri te Plan y ova metù su tënda, unian da Fedom tres Curvea y l Jëuf de Frea ca. Tlo ovi pià Johann Andrea Moroder de Urtijëi, cumandant di scizeri. Ël univa acumpanià da n valgun jëuni drët gherc y da snait tlamei i Nockri y i Orneles. Dl 1809 pra l cumbatimënt a Pruca ova Jan Mattie Senoner de Ciablon mazà, stlupetan da dalonc, n ufezier franzëus y fova unì cris per plu tëmp dai saudeies franzëusc. Ël se n fova mucià sun Ciablon sëura Daunëi y fova unì cris per nia. Da dedò, semeiel, che i l criva per l tò ite a paiamënt pra i saudeies franzëusc ajache l fova tan bon de stlupeté. Perdù la vita ntan i Tiroler Freiheitskämpfe ova Matie Pitscheider, sigat de Sëlva, y Demeine Mussner che ie unii stlupetei ju a Mauls ai 29 de agost dl 1809. N’autra ntraunida, suzeduda dl 1866 ie denumineda Landsturm: 200 uemes dla cumpania di scizeri d’Urtijëi jiva ai 11 de agost ite per la valeda, te Sëlva ovi albergià. L di do daduman abenëura ovi fat la streda ërta y sfadiëusa, che menova ntlëuta sun Jëuf de Frea, ulache la cumpanies de Sëlva y Santa Cristina ova bele tëut ite si luegia ti fòsc permò giavei. I uemes dl Landsturm de Urtijëi se à nciasà tla sosta Cier y ntëur via. Ma mo n chëla sëira fovel unì adalerch n pelegrin a nunzië che l’Austria y la Talia ova fat la pesc y che l Landsturm pudova se n jì inò a cësa. Riesc ovi puchenà adum dut sun Frea y fova jic ju nchin te Sëlva, ulache i ova inò metù su si tëndes y ulache l fova nce unì caprò la cumpanies de Fíe y Ciastel. L di do fovel dumënia y mëssa alalergia sun i biei prei de Nives di grofs Wolkenstein-Trostburg. Da sëira fovel pona na cëina tla ustaria da Dëur (Urtijëi); i ufezieres dl Landsturm ova fat na viva al ambolt Ujep Sanoner da Costa. Ai 4 de lugio dl 1867 pona ti fovel unì sëurandat cun solenità la bedaia d’arjënt al Landsturm de Urtijëi, che fova marcià nchin sun Frea per defënder l ncësa.
Tl calënder de Gherdëina dl 1948 iel repurtà n scrit dl 1897 dl capuziner, pater Fedele Demetz de Solech (fi dl sartëur da Plazola) che repurton tla grafia uriginela: “L plu bel luech da ji a ste ie Sëlva. A peina che n rua sun col de Rustlea (la vedla streda de Gherdëina jiva da Col da Rainel su y da Rustlea sjal Ghetun), veighen te n scibl i biei prei da  Nives y tamez la bela dlieja cun la scola dlongia, y po l pitl grum de ceses dl Ghetun cun la gran bela cesa – ustaria  ala Posta- La Gërva. Depona veighen nteur ora sche pareis de na sala da una pert i biei bosc, dal’autra coi y prei dla Vila dessëura (al didancuei Daunëi) y Vila dessot; y finalmenter i biei creps: Meisules a man dreta, Stevia y Puez a man ciancia, creps che per metui ilo sche furtezes contra i abitanc dl autra valedes.” Inant scrij pater Fedele: ”Ie che son enghe de Sëlva per grazia de Die ne posse fe auter che scri npué de zech de Sëlva y di Salvans”… “chi che n uel n savei de plu muessa liejer l liber de  Franzl Moroder da Lenert che ie scrit per tudesch, che puec te Gherdëina ntent”. Do l scrit de pater Fedele à Sëlva dl 1897 156 cëses y feter 1000 abitanc y ie spartida te trëi ridli: Plan, Larciunëi y Ruacia. Pater Fedele prova nce a spieghé l inuem Sëlva che ël dij unì dal latin ”Silva” che uel dì gran bosch spës.
Ël dij che “l nëine de si pere cuntova bel avisa che da Rustlea ite stentoven a udei la capela dla Modona ajache l bosch te i prei da Nives fova tan spës. Bele ntlëuta ala fin dl 1800 ruvova te Sëlva d’insta plu fulestieres a se goder la bona aries, la bona eghes y nce a goder l’alegria di Salvans.
Sëlva, ntlëuta univa numineda nce S. Maria, per via dla dlieja dla Madona dl Aiut y po nce Wolkenstein per via de si prim abitanc/patrons de i grunc.” Pater Fedele ratova che Sëlva ebe scumencià a se populé ntëur l 1200 tres i grofs muciadives che ova frabicà l Ciastel de Val.
La cëses plu vedles dëssa vester: Cëdepuent, Daunëi, Ciajea; l plu vedl troi da Juac jú de viers de Val (bonamënter n tòch dl troi Paian).
Drët nteressant ie l articul sun l lingaz rujenà te Sëlva, ulache pater Fedele dij che la “jënt sëura i 40 ani ne n’ie nia bona de se capì per n autra rujneda che no l Gherdëina. Chëi sota i 40 ani” dijel ël “che a forza de messei traté cun i fulestieresc che rua te Sëlva d’instá ie per la gran pert boni de se fé capí nce per tudësch. Feter ntëur l 1870 an scumenciá te scola a mparé a scri npué per tudësch, dant nparoven a scri n pué per talian y spiegá i conc univel me per Gherdëina.” Ora dl scrit de pater Fedele iel mo repurtà te de plu pertes de chësc liber sota i articuli che à da nfé cun la scola, la dlieja, l Ciastel, i Wolkenstein, i prevesc y nsci inant.

L 19ejim secul à nce purtà de gran spavënc. La gran ciarestia dl 1816 determineda da na situazion tlimatica drët frëida cun degun instà pervia de na gran eruzion dl vulcan Tambora tl’Indonesia y pona la gran eghes dl 1882 y dl 1886. Sëlva ie unida stravardeda nfin dl 1914  per gran pert da avenimënc de viera. I gran spustamënc de populazions y de saudeies da nord a sud ne n’ie nia passei te nosta valeda che ne fova nce nia nteressanta da n pont de ududa dl militer y nianca economich.