Sudtirol ti fova perdrët bele unì mpermetù n sucrët dai aleac ai talians tl Tratat de London dl 1915 y da dedò tl Tratat de St. Germain dl 1919 fovel definitivamënter unì a se l dé nscila. La Talia messova nce avëi da tò ca na giustificazion. A chësta maniera ti ugova ai talians la cumpededes dla populazion dl’Austria, che ratova i ladins sciche talians davia che i ne n’ova deguna rujeneda scrita y si lingaz ne fova nia rujeneda aministrativa. Chisc resultac fova la prova dla prejënza de de plu rujenedes te Sudtirol y n ultima la legitimazion per avëi davanià l raion a sud dl Prëner. L fat che i ladins fova unii ratei talians ti ova judà ai reprejentanc dl nazionalism talian per i tò ite y cun ëi nce i sudtirolesc de rujeneda tudëscia. Tlo ova la pulitica adatà na statistica dla populazion per si fins.
L ann 1922 fova l fascism jit al guviern tla Talia y Ettore Tolomei ova metù man tres si prugram de 32 ponc cun la desnaziunelisazion y la talianisazion de Sudtirol. Do na prima fasa de sotmiscion culturela univel docà la segonda fasa dla sotmiscion economica. Ai sudtirolesc ti restovel belau mé plu de se stlù te sé nstësc. Michael Gamper y si “Katakombenschulen” (scoles-catacombes) fova l simbol dla resistënza di sudtirolesc. La pulitica fascista ova scumencià l ann 1923 cun la ntenzion de fé di sudtirolesc na mendranza, y ova metù su la Provinzia unica Trënt-Bulsan. Dl ann 1927 dassovel unì inò la Provinzia de Bulsan cun n tratamënt particuler. Te chësta situazion de pulitica de sotmiscion scumenciovel per i sudtirolesc n segondo pruzes de i destò da si ncësa. L fova unì pensà de drusé y mudé si cunzet de identità a pië via dal pitl ncësa che fova l Tirol, inant ala patria Austria y ala fin de viers dl “Großdeutschland” (Leopold Steurer). Do la tëuta de pudëi de Hitler dl 1933 iel unì metù su l “Völkischer Kampfring Südtirols (VKS)” che fova na urganisazion sciche n partit che udova danora na strutura de gerarchia rigurëusa y univa meneda aldò dl prinzip de n “Führer”. Si detlarazions y pensieres de majera mpurtanza univa tëuc dal prugram dla
“Nationalsozialistische deutsche Arbeiterpartei (NSDAP)”. L fin fova de cunvertì la populazion de Sudtirol ala “filosofia dl naziunelsozialism”, coche l ti univa dit. Do l cunliamënt cun l’Austria de merz dl ann 1938 cialovela ora, sciche sce l fossa mé na cuestion de tëmp, nchin che l “Führer” ëssa “purtà a cësa tl Reich” nce Sudtirol. Ala medema maniera sciche i nazi à abù la sëuravënta tl’Austria, nsci ëssa tosc nce i nazi de Sudtirol abù la sëuravënta. Puec fova a una de azeté la renunzia a Sudtirol nsci coche Hitler ova for inò detlarà bele dai ani 1920 incà. Aldò dla revijion dla despusizions de pesc purtedes inant da Hitler y dantaldut do l cunliamënt dl’Austria cun l “Reich” desturbova la cuestion Sudtirol for plu y plu i raporc danter l “Großdeutschland“ y la Talia. L diare dl minister per i afares cun i stac fulestieres talian Ciano fova n chësc cont tler: “La Talia pertënd dala Germania che l cunfin sun l Prëner sibe segur. Davia che n ne possa nia spusté crëps y ruves, muessen mefun spusté la persones”. A chësta maniera foven ruvei l ann 1939 a chël proiet radical, cunesciù sciche la opzion. La gaujes che à purtà pro che n grum de sudtirolesc fova dl 1939 a una de opté per l “Reich”, fova dantaldut che i univa tratei veramënter mel te si ncësa. Riesc do che n à fat al savëi che l sarà la opzion, se à spartì su la populazion de Sudtirol te chëi che se n jiva demez y te chëi che restova tlo. La doi pertes ne ti mpudova nia l’una al’autra y univa a se strité saurì. Uni sudtirolesc stajova ert “a messëi crì ora de resté y renunzië nsci a si tradizions y usanzes o de se n jì y lascé si ncësa” (Rolf Steininger). Do la sëuravënta sun Mussolini y do che la Talia fova passeda ai aleac, à la trupes tudësces ocupà la Talia. Te Sudtirol sentiven na majera legrëza. Da chësc mumënt chersciovel la speranza de unì delibrei dal fascism talian, che la opzion y l trapiné ne n’ebe nia plu rejon de vester y che l vënie a se l dé n cunliamënt cun i “Paejes Tudësc“. Sudtirol purteniva mo for al Stat talian, ma Hitler ova arjont n cunliamënt de facto de Sudtirol cun si “Reich”: la “Operationszone Alpenvorland” tulova ite la trëi provinzies de Bulsan, Trënt y Belun. A cë fovel sciche aministrazion zevila, i cumisseres, che ova dessëura mo l “Gauleiter” Franz Hofer de Vorarlberg-Tirol. Riesc do fovel unì metù su sunieries spezieles (Sondergerichte) coche i ti dijova, per pudëi giudiché i criminei o chëi che la pensova autramënter. Sun l post fovel la “SOD-Einheiten (Südtiroler Ordnungsdienst)” che purtova inant na germanisazion sterscia. Chësta cumpurtova dantaldut tla valedes ladines che l univa a se l dé for deplù stritoc danter i “Dableiber“ y chëi che ova optà per l “Reich” y vel “Dableiber“ univa sfurzà a jì pra i saudeies tudësc. Ne jì nia pra i saudeies do vester cherdei fova un di reac che univa dat sëura l plu tla sunieries spezieles dl naziunelsozialism tla “Operationszone Alpenvorland”. Danter la mendranza che fova i “Dableiber“, fovel dantaldut prevesc y catolics che se ova dat ca per la pulitica, che fajova resistënza contra la prupaganda y i pruvedimënc de forza dl regim dl naziunelsozialism. Ëi l fajova a bën de chëi che fova restei y per i stravardé da viulënzes da pert de chëi che ova optà per l Reich. Do l ann 1939 fovel unì metù su l “Andreas-Hofer-Bund” de Sudtirol che ti judova a chëi che ova desertà y manteniva cuntac cun i aleac y la grupes de partisans. Do l ann 1945 restova Sudtirol per puech tëmp sota l cuntrol di americans y d’autonn dl 1945 iel unì tëut dai aleac chëla dezijion che ie unida cunfermeda d’ansciuda dl 1946. Ai sudtirolesc ne ti univel nia cunzedù l’autodeterminazion, Sudtirol restova sota la Talia y la soluzion ova inuem: autonomia. La gran pert di optanc per la Germania, che fova te n status de zitadinanza mo nia stlarì, ne n’univa per gauja dla prejënza di aleac, nia ciaceda. Chësta “fertuna” ie deventeda majera tres l “decret di optanc”, coche l ti univa dit. La opzion fates ora da Hitler y Mussolini fova unides anuledes y chësta revijion tëuta su tla Acurdanza Gruber-Degasperi di 6 de setëmber dl 1946. L’autonomia fata ora y detlareda tla Acurdanza de Paris danter l’Austria y la Talia giapa, sciche pert dl test de pesc n carater nternaziunel y vel per duc i sudtirolesc, nce sce i ladins ne univa nia numinei aposta y n ne ova nia tenì cont de d’ëi tla Acurdanza de Paris.

La prima gran viera
Do che la Talia ova detlarà la viera al’Austria per gauja dl cunfin  dl Prëner fova Sudtirol deventà raion de viera: la front passova tamez ala valedes ladines ora. L fossa da scrì giut sce n ulëssa cunté dla front cunesciuda y dantaldut duiëusa per Fedom y Ampëz; sce n ulëssa descrì la viera de posizion danter l’Austria y la Talia ti crëps y tla dlacia ntëur i jëufs dla Dolomites, sun l Pordoi, Ciaulonch, Fauzares, sun l Col di Lana, sun l Lagazuoi y sun la Marmolata; danter la valedes ladines plu a nord da una na pert, Gherdëina y Badia, y dal’autra chëles che fova a sud, Fascia y Fedom. Sëlva à da mustré su 34 tumei y nia plu unii zeruch dla prima gran viera). Cun l Tratat de pesc do la prima viera mundiela giapova la Talia l cunfin sun l Prëner che la ova tan pertendù y leprò l Sudtirol y l raion di ladins dla Dolomites.

La Ladinia y Sëlva danter la doi vieres - La opzion
L raion ladin te Sudtirol fova riesc do la prima viera l prim post te chël che la pulitica naziunelista ova fat si agrescion, y plu avisa l ann 1921 cun la “Lex Corbino”. Chësta lege scrijova dant che la families talianes ova da mandé si mutons tla scoles talianes. Per l fat che i ladins univa ratei talians scumenciova per ëi bele dl 1921 l pruzes de desnaziunelisazion tres la scoles talianes che per la populazion tudëscia de Sudtirol metova man l ann 1923 cun la “Lex Gentile”. N chël ann dassova i ladins monce unì spartii su te trëi provinzies: “stroncare la mistificazione ladina” ti dijova Tolomei a si pulitica n cont dla Ladinia. L senificat dla parola “Ladinia” dassova unì desdrù y la storia di ladins dassova jì per chëi troies che ne i purtova nia plu adum. La Ladinia resta aministrativamënter spartida su te trëi pertes. La spartizion di ladins y la sotmiscion fascista liova i tudësc y i ladins puliticamënter mo plu adum, dantaldut chëi de Gherdëina. A chësta maniera ova la tripartizion dla Ladinia y la solidarità danter ladins y tudësc si cunseguënzes sun la opzion. Da pert taliana oven permò do n valguna resistënzes lascià pro che la Ladinia feje pert dla opzion. Dassoven pa ne lascé nia pro che i ladins, ratei sciche talians, ëssa da opté o dassoven pa lascé pro che i ladins, udui dai talians sciche “i pangermanisã plu stersc”, ëssa da opté. Tolomei minova che n cont de avëi lascià pro i ladins ala opzion fovel unì fat n fal storich nia da perduné. Avëi lascià pro i ladins ala opzion ova ndeblì la giustificazion dl cunfin sun l Prëner y la situazion fova perchël deventeda plu ria. A chësta maniera fovela ruveda tan inant che la Val de Fascia, tla Provinzia de Trënt, ne fova nia unida cherdeda a opté; che a Ampëz, tla Provinzia de Belun fova la opzion unides mpedides da grupes talianes liedes a Tolomei; y te Gherdëina, tla Val Badia y te Fedom fova i resultac dla opzion bëndebò desfrënc; tla Val Badia ovel optà per l “Reich” l 36%, mpue coche te Fedom. Te Gherdëina ovel optà per l “Reich” l’80% y nsci fova Gherdëina la sëula valeda ladina che ova na media sciche tl rest de Sudtirol. Da pert dl “Reich“ fovel daujin al aspet de pulitica etnica mo n segondo aspet economich che ova si pëis acioche i ladins unisse lascei pro pra la opzion. L’autoriteies cumpetëntes de Sudtirol ova giapà da Berlin l cumand de fé unì chëi de Luserna tl “Gau” dla Ciarënzia a Lienz sciche muradëures per ti fé su a chëi de Gherdëina si cëses. Chisc ëssa dassù unì do plu tert. L “Reichskommissariat für die Festigung des deutschen Volkstums” auzova ora “coche chësta azion fova da purté a fin cun gran prëscia y la fova lieda zënzauter al trapiné de chëi de Gherdëina”. A Berlin ovi n gran nteres de trapiné chëi de Gherdëina. Ëi dassova vester pra chëla grupes etniches che ëssa dassù trapiné “cun gran prëscia y dan de duc i autri”. A chësta maniera ie chëi de Gherdëina unii cris ora sciche “cavia” per “n nridlamënt da nuef te un n luech”. La gaujes de chësc status particuler y de chësta pulitica particulera fova dantaldut l raion stlut ite ulache chëi de Gherdëina vivova y l’ert dl ziplé che fova bona de sëuraviver mé ajache la fova stluta ite nsci.
Sce n tol ca sciche ejëmpl cie che l ie unì detlarà tl Chemun de Sëlva ntan l’ultima ena de nuvëmber dl 1939 pona stajovela nscila: 7 detlarazions per mantenì la zitadinanza per 9 persones mparentedes y 17 detlarazions per giapé la zitadinanza tudëscia per 46 persones mparentedes. Ntan l’ultima ena de dezëmber canche l tumova nce l terminn dla opzion, fovel te Sëlva resultac feter unfat sciche dant: 11 detlarazions de culëur blanch per 21 zitadins y 26 detlarazions de culëur orancen per 45 zitadins. Ai prim de jené dl 1940 fovel da garat l resultat definitif dla opzion te Sëlva y ai 2 de jené dl 1940 fajova l prefet al savëi l resultat ufiziel dl chemun.
L trapiné de chëi de Gherdëina dassova deventé n bon ejëmpl da mustré su, dla pulitica de nridlamënt y dla pulitica etnica dl naziunelsozialism. Zaré demez nsci mo n iede n tòch dla Ladinia fajova pert de n prugram, l semiova monce che n se l mbinciova y che l fova unì pertendù, ma tan inant ne n’iesen ala fin nia ruvei. La ntraunides dla segonda viera mundiela unides a se l dé damprovia ova fat lascé vester dut l proiet dla opzion. La cumpëida de jënt che se n fova jita demez veramënter da Gherdëina fova de ca. 1.500 persones y fova nce sciche la media dl rest de Sudtirol; n terz de chëi che ova optà per l “Terzo Reich”. A chësta maniera ne fova i tëmps ntëur la fin dla segonda viera mundiela nia mé seniei dal duel y desplajëi dla persones, ma sëuraprò dantaldut dai mudamënc de tëuta dl pudëi che univa tresora inò a se l dé y da n daunì che semiova defin melsegur. Te Gherdëina y te Sëlva se ovel purtà pro, mo na “situazion belau sciche te na viera zevila” danter chëi che fova restei tlo y chëi che ova da se n jì.

L cunflit te Gherdëina de mei dl 1945
L fossa inò da cunté giut y l ne fossa nia saurì rujené dla situazion pulitica de Sudtirol ntan i ani 1943/44/45 canche l Sudtirol fova veramënter “cunlià” cun l Terzo “Reich”. De n cajo particuler mpue extra iel da dé vel’stlarimënt.
Te Gherdëina fovel unì zarà ora de liet y stracià demez 5 cunesciui optanc per l “Reich” de mei dl 1945 ntan na “azion de rumé su salvera” y na vendëta arnagheda tl sanch. Tl bosch de Pescol sun l Jëuf de Staulanza (Belun) fovi unii malterjei y mazei cun gran brutalità. De gra al ntervënt dla trupes d’ocupazion americanes ne n’ie 50 d’autri zitadins de Gherdëina nia unii tuchei dal medem destin. La opzion ova spartì mo deplù la populazion de Gherdëina che tl rest dla Provinzia de Bulsan. L univa damandà y pertendù sibe dala populazion de Gherdëina nstëssa che dala autoriteies naziunelsozialistes che la cumenanza dla valeda tenisse adum. A chësta maniera se ovel spizà pro mo deplù, che tl rest de Sudtirol, la defrënzes y la morses de cuscienza danter chëi che ova optà per l “Reich” y i “Dableiber“. Do l armestize talian cun i aleac di 8 de setëmber dl 1943 y do l’ocupazion tudëscia dla Talia y de Sudtirol, se ova la “Volksgruppenführung” de Gherdëina lascià ora cun gran riedà contra chëi che fova restei. N valgun optanc per l Reich se ova metù adum sciche “Volksgruppenführer” tl “Sicherungs- und Ordnungsdienst - SOD”, na urganisazion naziunelsozialista y cun funzions coche la polizai. Un de si strumënc per tramenté chëi che fova restei fova la cherdeda pra i saudeies tudësc. Chësc fova sciche na sentënza de cundana, l ulova dì messëi jì tla viera y ruvé n prijunia. Propi te Gherdëina ti tucovela dantaldut ala mendranza “ncompra” di “Dableiber“, de messëi se sotmëter defin a chëi che ova optà per l “Reich”. Sce n tën a mënt la situazion te Gherdëina a pië via dal ann 1943, pona devënta la rejons dla ntraunida de mei dl 1945 bele plu da capì. L massacher de Gherdëina ie unich y per dut Sudtirol n cajo singul che desmostra la rabia danter la jënt che ie resteda y che se n ie jita demez.

Guvernadëures y ufizieres dl nazism, muciadives tres Sëlva
Riesc do la segonda viera mundiela fova l Sudtirol deventà per n grum de funziuneres nazisã y si families l ultim post ulache ëi se teniva su dan se n mucé dla dal ozeann. Scebën che la jënt se sotmetova mo al’ultima pertenduda che fova la “viera dla desfata” (“Totaler Krieg”), fova l “Terzo Reich” tl lëur de se desfé, mo dan che i saudeies americans y rusc ova tëut ite Berlin. Sibe la trupes di aleac che i servijes sucrëc ova prëscia de zaré via y cundané i nazisã. Nce Sëlva fova un di posã cun n grum de parënc de naziunelsozialisã mucei che cialova mé plu de tò demez l plu aslune che la jiva duc i sënies dl teror. Giut alalongia valova la urganisazion sucrëta “Odessa” (Organisation der ehemaligen SS-Angehörigen) sciche n model uniputënt per se spieghé coche n grum de naziunelsozialisã fova stac boni de se n mucé. Permò cunescënzes scientifiches nueves à purtà a lum na gran rë fata su per chëi che messova se n mucé. L se tratova de n nturtidlamënt cumplicà danter persones, istituzions, sciche la Dlieja y la Crëusc cuecena nternaziunela, y nazions. Tres chësta rë ie n grum de criminei de viera stac boni de abiné ora stredes per se n mucé che passova tres la Talia, suvënz tres Sudtirol, per ruvé dla dal ozeann. Ti ultimi dis dla viera fova Gerda Bormann, la fëna dl secreter de Hitler, Martin Borman, stata bona de ti mucé ala bombes desãiariedes dai fliegri di aleac tl mëns de auril dl 1945. La fova pieda via cun si ot mutons da Obersalzberg, l luech de sujurnanza ntan l instà dl “Führer” y fova passeda tres Dispruch per ruvé te Sudtirol. A Santa Cristina te Gherdëina ovela abinà si prim post da sté per ntant, ma pernanche la fova ruveda, fovel unì ocupà da na “Wehrmachtsstelle”. Per Gerda Borman, da iló inant cun l inuem de “Bergmann” fovel unì abinà na bela cësa te Sëlva che fova nce la cësa di mutons “cësa Brida” (o Wolkenstein Schlößl), ma de chësc ne rujenova mei deguni. “Per fertuna” scrij Martin Bormann jun., ajache nce Margarethe Boden Himmler, la fëna dl “Reichsführer” y cumandant dla polizai dla SS Heinrich Himmler, stajova te Sëlva cun si muta, tla “Casa al Monte”. Ma do che l fova ruvà adalerch i aleac fova la “Himmler” unida pieda iló, s´areda via a Bulsan, Verona, Firenze y Roma y ala fin l’ovi lasceda jì dala perjon de Nürnberg per la mëter te na cësa de cura. Tan che segur univa nce Heinrich Himmler de persona a ti fé vijita te Sëlva. Mo ntan l ann 1944 se ova abinà adum tl hotel Oswald ntëur n 80 generei per rujené di ultimi y desperei planns de viera. Riesc do che la fova ruveda se ova Gerda Bormann amalà, la fova unida meneda tl spedel de Bulsan y dedò de utober dl 1945 se ova la forzes de ocupazion nglëijes cruzià che la unisse meneda tl lazaret de viera a Maran. Si mutons fova unii spartii su danter n valguna persones de crëta. L pitl Helmuth Bormann fova jit a scola tla cuarta tlas dla scola elementera de Sëlva ntan l ann de scola 1945/46. Ël stajova tla “Villa Stevia”, y nce doi de si fredesc jiva a scola te Sëlva. Ntan l’ëura de religion ne stajovi nia te tlas y de chësc se fajova i autri cumpanies de scola drët marueia. N ova mé puecia nfurmazions sun la familia Bergmann. Martin Bormann jun. ie jit tl cunvënt de Hötting, dedò a fé l miscioner tl Kongo y l ann 1958 iel unì cunsagrà preve a Dispruch. Dl destin de si uem ne savova Gerda nët nia. “Tentatif de evajion” fova l’ultima anutazion de Martin Bormann te si diare de mei dl 1945 tl puncher dl “Führer” a Berlin. Dedò ne n’oven plu deguna nutizia de d’ël. Ntlëuta fova si fëna bele scialdi amaleda y sota cura tl spedel a Maran. Sun si porta fovel na scrita che dijova: “Pruibì de jì ite”. L preve catolich Theodor Schmitz ova giapà l’autorisazion de jì ite deberieda cun l mut Martin Bormann jun. Te chëla ucajion fovel unì sëura che i autri mutons fova duc te Sëlva. Ël fova for inò jit à i crì ajache l’oma l ova prià bel de se cruzië dl “bënsté persunel y economich” de si mutons. De merz dl 1946 ie Gerda Bormann morta. Deberieda cun la muta Eike ova l preve cialà tres te Sëlva si arpejon, abinan danter l’autra cosses na poejia de Friedrich Nietzsche scrita a man da Gerda Bormann. De utober dl 1946, fova Martin Bormann, zënza vester prejënt, unì cundanà a mort (“Nürnberger Prozess”). Si corp ie unì abinà a Berlin permò l ann 1972.

La scola: Rufach y Sëlva. La cunseguënzes dl’opzion.
La opzion dl ann 1939 à abù si cunseguënzes nce per la scola. Aldò dla despusizions sun la emigrazion y l jì zeruch di “Volksdeutschen” da Sudtirol tl “Reich”, fovel udù danora che, mé per i genitores che ova optà per l Reich fovel mesun de pudëi lascé jì si mutons a lezions privates recunesciudes y tenides tla rujeneda tudëscia. L sëurastant dla “Amtliche deutsche Ein- und Rückwanderstelle (ADERST)”, l “SS-Obersturmleiter” Wilhelm Luig  y l ntendënt per la scoles talianes Armando Frattini ova fat ora de jené dl 1940 che l vën metù a jì cursc de rujeneda tudëscia. Chisc cursc fova mé per i “mutons de optanc” y fova da raté sciche cursc de rujeneda. La urganisazion y la prugramazion didatica ti fova unida sëurandata ala “Arbeitsgemeinschaft der Optanten für Deutschland (ADO)” y plu avisa al “Volksgruppenführer” Peter Hofer. Cie che la scola se tulova dant se limitova a: “savëi da liejer bën y capì cie che n liej, savëi da cunté dant bën, cunescënzes sun l’ortografia y dl‘ adurvanza dla paroles y dla sintassa, savëi da scrì mesanmënter n tema”. Plu de mpurtanza fovel, avëi legrëza de lauré cun i mutons y la ulentà de “se mëter al servisc dla cumunità etnica, y se dunfrì su cun si lëur per chësta”. De merz dl ann 1940 fovel bele unì giaurì te Sudtirol 288 scoles cun 465 maestri. Ala populazion ti univel zënzauter dant de avëi na si scola tl Stat talian y sota la pulitica fascista. La scoles autes ne ti fova nia unides cunzedudes ai sudtirolesc. La direzions de scola pudova mé fé a na maniera che i miëur sculeies giapëssa na furmazion tl “Terzo Reich”. Ntan l instà dl ann 1940 fovel unì cherdà 430 sudtirolesc jëuni de se abiné adum sun la Mont de Sëuc y l nen fova unì cris ora 324 che n ratova adatei per jì ala scoles per deventé maestri (Lehrerbildungsanstalt) a Dispruch, Feldkirch, Salzburg, Klagenfurt, Wels y Graz. N’autra puscibltà fova chëla de fé dumanda per pudëi jì ala “Oberschule für Volksdeutsche” a Rufach y Achern. Chësta scoles messova ti sté sot diretamënter al
“Reichsministerium für Wissenschaft, Erziehung und Volksbildung” y l tucova leprò de plu sortes de scoles: la scola mesana, la scola prufesciunela y la scola auta. L ann 1941 fovel scrit ite 470 sudtirolesc a Rufach y 223 a Achern. L ann 1942 nen fovel 1400 sudtirolesc che fova jic te na scola auta tl “Reich”. Sun l prim “trasport” a Rufach l ann 1940 nen fovel nce n valgun sculeies de Sëlva, un de chisc fova Domenikus Pitschieler (Mëine dl Jasmin) de catordesc ani che fova jit a scola doi ani alalongia a Rufach. Dedò fovel jit al Istitut tecnich per la ndustria (Gewerbeoberschule) tl Württemberg y ova fat si tëmp de lerner da eletricher. Dedò fovel jit do a si mestier aldò dl “Reichsarbeitsdienst (RAD)” a Metz. Do chisc ani de furmazion y do vester ruvà zeruch per curt tëmp a cësa, fovel unì cherdà pra i saudeies y ova messù jì tla viera tla Polonia. Ntan i ultimi mënsc de viera nchin Nadel dl ann 1946 fovel prijunier de viera di rusc, dan che l ova pudù unì zeruch per for.
Cun la nvajion dla trupes tudësces tla Talia d’autonn dl 1943 y do avëi metù su la “Operationszone Alpenvorland” che tulova ite la provinzies de Bulsan, Trënt y Belun, ova l “Gauleiter” dl Tirol Franz Hofer sëurantëut la funzion de prim cumisser y fova nsci a cë dla aministrazion zevila. Te chësta curnisc pulitica nueva fova nce la scola de Sudtirol unida “delibreda” y tla ntendënza udoven la situazion nscila: “nëus ne n’on nia plu cursc de rujeneda tudëscia, ma na scola elementera tudëscia”. Do che l se ova drusà la situazion de chëi che cumandova, fova i cursc de rujeneda deventei per duta la populazion tudëscia y ladina la sëula scola (Regelschule). La scola taliana sëuravivova cun fadia. L fova unfat sce l se tratova de mutons de chëi che ova optà o no, duc, tudësc y ladins fova ublighei de jì tla scola tudëscia. Chësc slargiamënt cumpurtova nce che l prugram de nseniamënt messova unì laurà ora da nuef. L ann 1944 ova la ntendënza publicà i prugrams nueves che trajova åën ite deplù l spirt naziunelsozialist: “…la scola à la respunsabltà che i jëuni giape la cunescënzes fundamenteles y che i ie ala fin boni de se nuzé de si capaziteies, cie che ie de bujën acioche i possa dé ca si energies per la cumunità etnica y per tò pert ala vita culturela de nosc popul ... per vester njiniei a fé si servisc per l “Führer” y l popul”. Ajache l manciova te Sudtirol scoles autes, se muvova i genitores, dantaldut do l mëns de setëmber dl 1943, mo deplù per s’les damandé. N prim pont da stlarì plu rie fova, ulà dé d’albierch ai sculeies. La valedes fova plu segures che la zità de Bulsan che univa scialdi bumbardeda. L fova unì pensà a hotiei de chëi che n ova mo nia fat lazarec dainora. I planns fova tl prim unii fac per doi posã, Maran y Gherdëina. Te Sëlva dassovel unì metù su na scola auta per mutans cun belau 100 posã. N’autra scola auta per mutons dassova unì fata a Toblach, ma per de plu gaujes fova chësta scola auta unida spusteda tl Vizentinum a Persenon. L ne fova nia saurì tenì scola regularmënter ajache l univa for plu suvënz dat l alarm per i fliegri y maestri y sculeies messova se n mucé ti puncher. Da Unissant dl ann 1944 fova la scola trapineda tres Tluses te Sëlva. Iló fovel da garat i hotiei Oswald, Mondschein- Juan y La Gërva y la lezions pudova jì inant. Te Sëlva se ovel abinà adum ntëur a 200 sculeies dla scola auta y 12 maestri sota la direzion dl diretëur de Dispruch Rudolf Grüner. Ti doi hotiei Grisi (n ti dij nce “Griji”, al didancuei Wolkenstein) y Maciaconi fovel la scola auta per 80 mutans cun 7 maestri. Daujin a chësta scoles autes fovel te Sudtirol mo doi scoles autes, tl Johanneum a Dorf Tirol y a Milland daujin a Persenon. Ala fin de auril dl 1945 ova la ntraunides dla viera purtà pro che duta la scoles fova deventedes lazarec y perchël unides stlutes. La scola auta te Sëlva fova ai prims de mei dl ann 1945 ueta, la direzion dla scola y i maestri se n fova jic.

L mandat de arest per Domenico Mussner (Mëine d’Arcangiul)
Riesc do l’ocupazion dla Talia y do la nvajion dla trupes tudësces te Sudtirol de setëmber dl 1943 fova la vita publica unida sotmetuda ala regules nueves dates dant dala istituzions militeres. N pert sfurzei y n pert de si bona fajova truep sudtirolesc servisc ti “Polizeiregimente”. Chisc ova dantaldut l duvier de defënder la istituzions militeres, ma i univa suvënz nce tëuc ca per cumbater i partisans. Chësc à abù na burta cunseguënza tl luech de Sëlva. L ann 1976 iel unì arestà trëi sudtirolesc, danter chisc Domenikus Mussner (Mëine de Arcangiul) de Sëlva. I fova unii ratei respunsabli de n bani de sanch gaujà dai “Polizeiregimente” ntan l ann de viera 1944 tl raion de Belun. L mandat de arest ie ruvà ora de nia y ne fova nia da crëier. L arest à zarà su te Sëlva mo deplù la vedla pleies y te Sudtirol iel deventà mo plu rie stlù ju cun chëi tëmps. Domenikus Mussner y doi d’autri fova unii zarei via ajache i fajova pert dla 6a cumpania dl “Polizeiregiment” de Bulsan y i fova unii menei tla perjon de Belun. L “Polizeiregiment” ova desdrù ntan na azion de vendëta de agost dl ann 1944 l luech de Caviola di Falcade y mazà 32 abitanc. 32 ani plu tert minova la suneria de avëi abinà chëi che ie de gauja: Bera Mëine. La zaita scrijova che i ie “Ex-SS-ler” y che i ie unii zarei via ajache i ova, aldò dl mandat de arest, gaujà n bani de sanch. A Belun fovel n grum de grupes de partisans y i “Polizeiregimente” ova da ti tenì permez y da “rumé su” Belun da duc i partisans. I “Polizeiregimente” y i partisans se dajova drët dassënn y ala fin ti ai dat fuech a chël luech y mazà 32 persones. Aldò dl articul 422 dl Codesc penal talian messoven resté te perjon a vita. Dut ie jit aslune. Doi carabinieres ie ruvei da Belun te Sëlva, ma l acusà savova de ne messëi nia se tré dant zeche. Ël ne n’à nia tëut pea l bëusc dai dënz sun l viac a Belun che ie jit a finé te perjon. De nuvëmber dl ann 1976 se à l Cunsëi cumenel de Sëlva dat ju cun la cuestion che si zitadin Domenikus Mussner ie unì zarà via y à fat na petizion per l delibré. “I nes à tratà sciche criminei de viera ... ie ove tëma de messëi murì te perjon”. De nuvëmber dl 1976 à Mëine pudù se n jì dala perjon. “Ie ne n’é y ne n’ove nia da me tré dant .... tan de umiliazions .... unì ratà n criminel y naziunelsozialist ... nëus ne fan nia naziunelsozialisã”. L manciova la proves y nce i ndizies, ma tla vita de Mëine iel restà de burt lecorc. “Nëus ne n’on mei giapà n cumand de stlupeté, y Caviola di Falcade”, nsci dij bera Mëine, “ne n’é ie mei udù”. Mëine fova te perjon. “Ie ulove jì a mëssa”, ma la resposta fova: “Tu ues jì te dlieja cun dut chël che te es fat”. Chësta frasa ti à fat dassënn mel a  Mëine che fova na persona devota y che vivova aldò dla regules cristianes. La segonda dumënia che l fova te perjon al pudù jì te dlieja, ma la zaites y la televijion l ova bele fat ora n criminel. Dedò iel ruvà la proscima delujion. L ie unì spustà tla perjon de Bologna, deberieda cun mëmbri dla “Brigate rosse” y dla grupes fascistes. “Dlonch fovel simboi fascisã, sun i mures y sciche tatuajes ... persones de vint ani, mutons che ne pudova nianca savëi cie che l ie na viera y chisc nes univa ancontra per nes tò su sciche un de d’ëi.” De nuvëmber dl 1976 iel pona unì la bela nutizia: vo sëis liedesc. “Ie ësse da ti sentì gra a n grum de persones, ai aucac, al sëurastant dla provinzia Silvius Magnago, al pluan, al Cunsëi chemunel de Sëlva, a mi jënder Italo, ala Union di Ladins, che se à duc batù per nëus.”