Sëlva, lecurdanzes da pludagiut

La scola

Sculeies y seniëur Bastian Kostner (1828-1908), expositus dal 1856 al 1900 te Sëlva.
L ambolt Anton Vinatzer de Scimon tën la rujeneda ufiziela pra la giaurida ai 9 de nuvëmber dl 1958.
La scola d'ert pra la festa dla colm. 1908.
Te scola d’ert ntant l nseniamënt cun l maester Hans Delago cun n valguna sculées che mpera a ziplé.

Chi plu chi manco, duc sons jic a scola y on de biei lecorc de maestri y cumpanies, de trifes y straufonghes. Y ntant à la scola d’ert che ti à nsenià n mestier a milesc de nosc cunzitadins messù ti la zeder.

La scolina “Surëdl” de Sëlva
La prima scolina te nosc luech fova unida giaurida ala fin di ani 1920 (1928 o 1929) tla Villa Augusta da pert dl ONAIRC (Opera nazionale di assistenza all’Italia Redenta nelle zone di confine) y ie resteda davierta nfin dl 1943 canche nosta valeda ie unida tëuta ite dala forzes tudësces. Vel’un plu de tëmp se lecorda mo chisc pitli, duc furnii unfat, cun gurmei fosc. Te chësta scolina univel sambën mé nsenià per talian y mé mutons dla families che se ova detlarà de ulëi sté pra la Talia giapova lerch. Plucheauter fovel tlo mé mutons di guvernadëures, ajache chëi dl luech ne n’ova nia nteres. Do la segonda viera ne n’iel stat giut deguna scolina y permò ai 3 de utober dl 1963 iel inò unì giaurì na scolina te na njonta ala cësa dl vedl chemun sun plaza de dlieja dal ambolt Rudi Kasslatter. La rujeneda adurveda nfin dl 1975 fova mé chëla tudëscia. La maestres fova tëutes su dal chemun y n ratova che l fossa de gran mpurtanza ti nsenië ai pitli la rujeneda tudëscia. L frabicat per la scolina nueva, che ie mo al didancuei, ie unì dat su da fé dl 1976-77 y unì giaurì ufizialmënter ai 19 de juni dl 1977 dal ambolt Franz Costa dl Pech. La rujeneda ladina ie tla scolina permò unida adurveda dal 1976 inant canche la maestres ie passedes sota la provinzia. Dl 1999 ie la scolina unida ngrandida y l ie unì njinià ite na 4a sezion y n cuatier per l vardian. Te chësta cësa à nce giapà lerch l local per la proes dla mujiga y dl cor de dlieja, i ufizies dl Istitut ladin Micurà da Rü y nce la biblioteca cumenela (do l ngrandimënt fat dl 1996).

La scola elementera de Sëlva
La lege generela dla scola (Allgemeines Schulgesetz) ie unida ora sota la cosera Maria Theresia dl 1774 y scrijova dant che i mutons dai 7 ai 14 ani ova l duvier de jì a scola. Cun la medem lege iel nce unì metù su la prima scola per maestri che nseniova adum cun i caplans. Scola fovel te Sëlva bele giut dant, bonamënter dal 1600, ajache bele dl 1586 fovel na lege sun l nseniamënt, chël di prevesc y che fova plucheauter l nseniamënt dla religion (ntlëuta di dijoven dutrina). Dl 1747 fovel scrit dant te n regulamënt nuef che l vënie nce nsenià a liejer y a scrì. Sambën che nfin al 1774 pudova mé puec mutons jì a scola y la ne fova dantaldut nia d’ublianza. Nchin dl 1849 univel tenì scola per trëi dis al’ena te cësa da La Gërva y mo dant (bonamënter ntëur l 1800) te cësa da Paul o te cësa Levisc dl Juan. Dl 1848 iel unì frabicà la cësa de chemun sun plaza de dlieja. Te chësta cësa, che nchin l ann 1896 ova n tët cun cater eles, fovel i ufizies de chemun, la scola y l cuatier dl maester. La scola ova scumencià tlo l ann do. La scola fova plucheauter sota l cuntrol dla dlieja y permò dl 1879 à l stat tëut la cumpetënza sun la scoles, lascian ai prevesc mé plu l nseniamënt dla dutrina. Te cësa de chemun iela resteda nchin dl ann 1958, canche l ie unì benedì la scola nueva tla luegia de al didancuei. Chësta ie pona unida renuveda y mpue ngrandida l ann 1997. Pra la benedescion dla scola nueva, l ann 1958, ova l ambolt da ntlëuta Antone Vinatzer de Scimon dit: “La scola ie sën tan granda che per plu generazions ne messeran nia plu pensé a fé velch.” Ntant ala mé tlecà per n 40 ani y bele da n pez semeiela vester inò massa pitla.
L prim maester cunesciù ie stat Franz Walpoth (1830-1918) dl Sartëur de Sëlva che à tenì scola per 53 ani (dal 1852 al 1905), fajan nce l ugrister, l mëune y l scrivan de chemun. Ël fova n maester cumpetënt y drët rigurëus che criva ora cun savëi chëi jëuni che ova l talënt per jì a studië (nsci nce seniëur Antone da Fussel). L Chemun de Sëlva l à numinà zitadin de unëur per si gran meric tl ciamp dla cultura dl 1901. Dan ël dëssel vester stat un da La Gërva che nseniova. Do bera Franzl ie stat maester Ferdinand Perathoner da Uridl de Urtijëi, nfin dan la prima viera. Do la prima viera iel deventà maester a Felthurns. Cun bera Franz Walpoth fovel nce maester Franzl Vinatzer de Rustlea dessot (1845-1903).
Gabriel Vinatzer (1864-1950), fi dl muliné y dl pech de Rustlea dessot, ie stat maester a Rina (y nce ugrister y dirighënt dl cor) y pona plu tert maester a Urtijëi y diretëur de duta la scoles de Gherdëina. (a chësc maester di dijoven “crazaberba”)
L nseniamënt te scola ie stat nfin ti tëmps de Maria Theresia feter for per talian (nce sce nosc raion fova sota l mper austro-ungarich), ajache i prevesc studiova plucheauter a Trënt y savova miec l talian. Permò ala fin dl 1800 ie la scola deventeda tudëscia, taliana y ladina. Ntan la prima viera fovela inò mé tudëscia y dal 1921, sota l fascism, an inò pudù nsenië mé per talian. Dl 1949 iel unì metù su l sistem de scola paritetich. Sce ntan l tëmp dl fascism iel nce stat te Sëlva vel’scoles-catacombes, la scoles tudësces scundudes (Katakombenschule), sciche tl rest dl Sudtirol, ne n’ie nia segur. Povester tlechel mo lecurdé la scola metuda su dal’aministrazion nazista dal 1943 al 1945 ora l Griji (hotel Wolkenstein). Tlo ne jiva nia mé a scola chëi de Sëlva y S. Cristina, ma dantaldut mutans de families riches de Bulsan, Persenon y Maran; tla ziteies se temoven nfati dala bombes dla viera. Per i mutons fova la scola metuda a jì tl hotel Oswald. I sculeies fova dai 10 ai 16 ani, ëi stajova ja Maciaconi, ja Dosses, via l Juan (hotel Luna) y ja La Gërva (hotel Post). Pernanche la viera fova fineda fova chësta scoles inò trapinedes demez.

La Scola mesana ”A. Lardschneider” de Sëlva
Cun la lege nr. 1859 di 31 de dezëmber dl 1962 iel unì metù su la scola mesana d’ublianza (Scuola media statale) per duc. Bele a pië via dal ann de scola 1963/64 fovel unì metù su te Sëlva la scola mesana che dependova al scumenciamënt mo dala scola d’ert. Tl prim ann de scola fovel bele 43 sculeies spartii su te doi prima tlasses. La cumpëida di sculeies aumentova da ann a ann coche n possa udëi dala tabela repurteda plu inant. A pië via dai 20 de setëmber dl ann 1977 ie pona la scola mesana unida destacheda da chëla d’ert. Cun l crëscer dla cumpëida di sculeies fova tosc la lerch massa pitla y nsci à l Chemun de Sëlva messù crì na soluzion. Do ani de descuscions, de minonghes, de via y ca, an pudù dl 1979 finalmënter scumencé cun l frabicat nuef che ie unì tacà pro ala vedla cësa. Dl ann de scola 1980/1981 à nsci i sculeies pudù jì ite tla aules nueves. Tl prim fovel ndut 6 aules. Ncueicundì à la scola mesana de Sëlva 9 aules, 3 aules spezieles, una per l dessëni o l’educazion artistica, una per la materies scientifiches y una per l’educazion tecnica y n self su sotët per la nfurmatica. Do avëi finà via i lëures y do che l fova unì cumedà ora nce la scola d’ert, iela ai 24 de setëmber dl 1983 unida inaugureda y benedida n prejënza de de plu autoriteies. L ambolt da ntlëuta dr. Ferdinand Mussner ova abù l unëur de taië la pinta sorissan che per la restaurazion dla scola d’ert y la costruzion dla scola mesana ne fovel nia jit perdù un n di de scola. La spëisa de 1,3 miliardes lire, fova unida al 85% curida dala provinzia y l rest dal chemun. Per plu ani messova i sculeies de Sëlva jì a S. Cristina te palestra a fé ginastica. Permò dl 1988 iel unì fat su na palestra nueva tl stadio dala dlacia de Sëlva, finanzieda cun scioldi destinei ala scoles. Nchin l ann de scola 2009/2010 à bën 1.329 sculeies arjont l diplom dla scola mesana. Coche bele dit dependova la scola mesana de Sëlva al scumenciamënt dala scola d’ert. Dal 1963 nchina al ann 1971 iela stata sota la direzion dl prof. Engelbert Perathoner de Runcac. Dl ann 1971 à l prof. Martin Demetz de Pallua sëurantëut la direzion deberieda cun chëla dla scola d’ert. Da setëmber dl 1980 a agost dl ann 1998 à l prof. Josef Demetz da Ruacia abù la direzion te si mans, direzion che ie pona passeda al prof. Anton Senoner da Daunëi. N ucajion dl cumplì di 100 ani (plu avisa un n ann dant dl 1985) de Arcangiul Lardschneider de Ciampac ie la scola mesana de Sëlva unida dedicheda a chësta persunalità.
L’azetanza per chësta scola da pert dla populazion ie for chersciuda plu y plu. Cun l passé di ani iel unì renfurzà l nseniamënt dl ladin, materia che a pië via dal ann de scola 1992/1993 ie deventeda materia scrita per l ejam dla terza mesana. Dal ann de scola 1996 an scumencià cun l nseniamënt d’ublianza dl nglëisc y dl 1998 iel unì njinià ite n’aula per i computer. Da lecurdé iel nce che l diretëur dla scola mesana de Sëlva à dal 1993/1994 incà tëut su nce la direzion de chëla de S. Cristina. A pië via dal ann 2005/2006 ie la doi scoles unides metudes adum. Ti ultim ani ie la scola unida cunfrunteda cun n grum de d’autri problems, dantaldut cun l crëscer di mutons di fulestieres da de plu nazions, che ie unii a viver per rejons de lëur te nosta valeda.

Vijita dl minister dla nstruzion publica ai 3 de auril dl 1990
Gran unëur per la scola mesana, la scola d’ert y la scola prufesciunela de Sëlva.
Do che la scola mesana y d’ert de Sëlva ova abù l’ucajion de ancunté l Presidënt dla Republica Sandro Pertini, iel unì a se l dé che la scoles de Sëlva ie unides crisses ora per la vijita dl minister dla nstruzion che se à tenì su te nosta provinzia, on. Sergio Mattarella cun l’autoriteies pulitiches y dla scola per cunëscer miec la situazion y i problems de nosc raions. Nsci ie l minister ruvà ai 3 de auril dl 1990 cumpanià da autoriteies pulitiches y de scola de nosta provinzia y da de d’autra autoriteies y diretëures de duta la scoles dla valeda, che ie unii saludei dal ambolt de Sëlva Hermann Senoner, dal diretëur dla scola mesana dr. Josef Demetz y dal diretëur dla scola d’ert prof. Martin Demetz che à pona abù l unëur de l cumpanië tres la tlasses dla scola. L cor di pitli mutons sota la bachëta dl maester Pauli Senoner, à ciantà trëi cianties tla trëi rujenedes coche simbol dla carateristica dla scola ladina. L minister à abù paroles de lauda per i sculeies y per i nsenianc che se dà ju dassënn per arjonjer na bona cunescënza dla trëi rujenedes. I sculeies à abù ucajion de ti lascé udëi lëures ziplei y depënc, ti purtan dant nce la tecnica adurveda. Tla scola prufesciunela al pudù cialé pro coche l vën ziplà dal vif. N ucajion de chësta vijita à l diretëur pudù sëurandé al minister l bel liber “25 ani scola mesana ladina“ cun na lëtra scrita dai nsenianc a inuem dla scoles mesanes ladines.
Sun la scola d’ert iel scrit plu avisa tl capitul “Artejanat”.

La scola de mujiga de Gherdëina
La Scola de Mujiga de Gherdëina ie unida metuda su dl 1978 y à abù te chisc ultim ani nchin a 400 mutons scric ite. L’ëures de nseniamënt vën tenides tla scoles de duc trëi i luesc a na maniera da ncuntenté tant che la va mpue duc i bujëns de nosc pitli sculeies. Scumencé possen bele cun l’età de 4-5 ani. Ora dla scola de mujiga iel unì n grum de bon sunadëures che sona pra vel’urchestra de aut livel y che à fat pea pra de plu cuncorsc nternaziunei. Diretëures iel stat: Stefan Demetz dla cësa Trafuei dal 1978 al 1982, Max Moroder dl Tannenheim dal 1982 al 2001 y Vinzenz Senoner de S. Cristina dal 2001 inant.