Sëlva à al didancuei 76 ustaries (hotiei y pensions). Leprò iel mo n valguna desëines de bars, pizzerie y uties da mont. Per chësta publicazion iel unì cris ora mé la ustaries storiches, chëles che ie unides frabichedes dan la segonda viera mundiela. Sambën che la gran pert dl’ustaries ie unides fates su do la viera, ti ani sessanta y setanta, y les à al didancuei feter mé 40 ani de vita.
La vedla ustaries ie cumpededes su aldò dl ann de costruzion.

Hotel Croce d’Oro/Runcac
L se trata tlo dla ustaria Runcac dl mesc Runcac dessëura. L’ustaria de Runcac fova dessegur bele davierta dan l 1600. L prim ost cunesciù ie dl 1553 Parlme Schmalzl (wirt zu Runkatsch) y pona Baldassar Peratonner (1631-1693). Tl archif dla pluania de S. Cristina iel ndicà l ann 1716 n Kassian Perathoner - Wirt zu Runcac, che ova cumprà l luech de Piciulëi per si fra Johann Baptist. Sun na vedla fotografia iel da udëi l blason di Perathoner cun la data 1673 sun cësa; chësc desmostra che te chël ann iel bonamënter unì fat de majeri lëures pra la cësa. Ost de chësta cësa fova ntëur l 1850 Tone Perathoner y Senza Insam, pona si mut Alfons nasciù dl ann 1858 y dopro Luis (nasciù l ann 1900 y pere di patrons dl hotel Belmont y de d’autri 10 fredesc y surans). La cësa de Runcac ie lieda storicamënter a chëla dl Ciastel (Fischburg) y ala forcia de Col dala Forcia y Col dala Pelda. La storia repurteda a usc dai nëinesc y peresc di osc de Runcac miena mo al didancuei de lecurdé che ti ciuleies dla vedla ustaria fovel la perjons y vel’strumënt de meltra, coche la “gota” (na gota d’ega che tumova ju for tl medem post sun l cë de n prijunier tacà). Chësc ciulé numinà tl liber de Wilhelm Moroder Lusenberg (1877-1915) coche “keuche-kerker” adum cun la forcia y la suneria de Col dala Pelda (za. 1642-1840) ie unì desdrù al plu tert cun l meldefuech stat de fauré dl 1943, canche l fova brujà ju duta la cësa. Chësc ie stat un di majeri fuesc te Sëlva y l à desdrù doi cëses y n tublà. L ie permò stat mesun destudé chësc fuech l di do daduman cun l aiut di destudafuech de Bulsan. Tëmp de viera fova i destudafuech de nosc luesc njiniei ite plutosc melamënter y nce la persones da garat per judé fova pueces. L ie da dì, che l ne n’ie deguna documentazion storica dla ejistënza de chësta perjon. L’ustaria ie pona unida fata su da nuef cun l inuem “Croce d’Oro” y ie unida meneda inant da bera Luis y da si fëna anda Maria nfin l ann 1981, canche la ie unida sareda. Tl’ustaria de Runcac iel nfin su per l 1960 unì metù l “regulant” per l ridl da La Poza nchin Plan da Tieja. L “regulant” fova la persona che cialova che l unisse respetà la regules sun la pastures, i bòsc y la usanzes per chël ridl.

Hotel Alpino/Plan
La vedla ustaria de Plan fova per n grum de ani l’ultima puscibltà de tlamé o sté sëuranuet dan jì su per i jëufs. Bele perchël ala abù na gran mpurtanza per i viandanc y i marcadënc. L’ustaria fova nce sënta de n grum de fac, stories nteressantes y nce ncherscëules. L luech de Plan (ma mo nia l’ustaria) ie unì numinà bele l ann 1278 te n documënt che à da nfé cun la venduda dl luech danter Rupert Maulrappe y l grof Meinard II de Tirol. Dl 1481 fova Hans Planner y l ann 1555 Cristina Planner patrons dl luech. Tl archif dla pluania liejen che dl 1691 fova l ost te Plan “Adam Perathonner”. Ël pudëssa vester stat l prim ost dl’ustaria. Te n documënt dl 1779 vën l’ustaria numineda “Wirtstafern am Plan oder Unterplan”. Ala fin dl ann 1800 fova bera Tone dl Fever patron dl’ustaria de Plan, pona Mëine dl Mandl y do Vijo Rudiferia. L ann 1907 ova Antonio Callegari, che univa da Rocca Pietore y fova pech a S. Cristina, cumprà l’ustaria y l luech de Plan y ova fat su dal’autra pert de streda na dependance che ova bele ega tla majons (ma mé frëida). Do la prima viera à l’ustaria giapà l inuem “Alpino”. Bele ntlëuta ova l’ustaria 20 liec, ma si majer lëur ova i osc a dé ora da maië a chëi che messova jì sun l un o l auter jëuf. Luis y Erich Demetz de Lina à cumprà l’ustaria l ann 1963 (dal 1800 ie l patron mudà per 5 iedesc). Luis à da ntlëuta, adum cun si mutons, for menà l’ustaria. L hotel Alpino ie nce stat un di hotiei che se à dat da fé l plu per nternaziunalisé l turism. Anda Carlina de Rustlea, lava dl ost dl hotel Alpino da sën, dijova che l hotel de Plan resterà permò al setimo patron. Luis, l setimo patron, à for abù na gran pascion per l turism nglëisc y si hotel ie stat ti ani setanta y otanta l hotel plu nternaziunel de Sëlva.

Hotel Luna/Juan
L hotel Luna/Juan ie unì numinà bele l ann 1715 y pona l ann 1762 cun l inuem “Schuan”, dl 1779 fovel tlo na “Behausung Schuan nebst Prantweinschanks”. L ann 1850 se abinoven al Shuan a fé pitla proves de cianté y dl 1897 fova l Juan una dla cater ustaries tla curazia de Sëlva (Plan, La Bula, Juan, La Gërva – Runcac y Maciaconi tucova pra la pluania de S. Cristina). I patrons che ova ngrandì l’ustaria y fat su l “Mondschein” do l 1900 se tlamova Dejaco y fova jic a sté ora l Busc, do che i ova vendù l’ustaria l ann 1911 a Magdalena Vinatzer de Rustlea marideda Kostner. Tl’ustaria dl Juan iel pona jit a sté si muta Stina che ova dl medem ann maridà Giuani Demetz de Calonia da S. Cristina, che fova beché y ova giaurì l ann 1912 la becaria y ngrandì l’ustaria. Ntan la segonda viera fova l’ustaria dl Juan adum cun l hotel Oswald y l’ustaria La Gërva unida destineda, pervia di bumbardamënc, a dé d’albierch a studënc dla scoles autes de Bulsan. L’ustaria ie unida meneda inant da si mutons (l plu vedl inò Giuani) nchin dl 1970, canche la ie unida sareda. La becaria, che fova ani alalongia la sëula ulache l univa mazà bestiam te Sëlva, ie resteda davierta nchin Nadel dl 1989.

Hotel La Gërva/Post zum Hirschen
L vedl inuem La Gërva (La Gierva 1715- làgerbà 1762), coche al didancuei vëniel mo tlamà l’ustaria y l hotel Post zum Hirschen vën da “Gerber-Gerberei“ (gervadëur), luech ulache l univa laurà la pel, y chësc bën scialdi dan che l unisse giaurì la prima pitla ustaria. (1779 Schmidhaus zu Lägerbä mit Hamerschmitten y Müllerhaus. 1858 Bauer samt Gemüsegarten). L’ustaria cun albierch ie bonamënter unida giaurida ntëur i ani 1850/80, do che l ie unì giaurì l stradon de Gherdëina. Nchin dl 1849 iel nce unì tenì scola tla cësa da La Gërva La ustaria ie numineda per l prim iede dl 1796 (Magdalena Pitscheider Wirtin zu La Gerva). Al prim de dezëmber dl 1873 à Karl Pitscheider giaurì tlo nce l prim ufize dla posta. Bera Karl ova pona ti ani 1895/96 nce fat su l hotel Oswald, che ova pona giapà l fi Karl junior. L hotel “Zur Post” fova passà al fi Anton (Tone). N gran fuech, ulache l fova mort la pitla Rosa de mé 4 ani (una di 9 mutons de bera Tone), à desdrù ai 4 de jené dl 1924 dl dut l frabicat adum cun duta la storia y i documënc. L’ustaria ie unida fata su scialdi plu bela y majera bele l ann do y ie resteda te si bel stil nfin al didancuei nce sce dedite ora à i patrons da ncuei fat de gran lëures y cumedà tan che dut. L’ustaria da La Gërva ie resteda for tla mans dla familia Pitscheider, ma danterite fovela nce unida nuzeda per d’autra ativiteies. La familia de bera Tone ova do l’opzion l ann 1939 cumprà n hotel sun l Ossiachersee tl’Austria y fova jita a sté iló. L hotel Post fova ntant unì sëurantëut da si mut (nce ël Tone), pona tumà tla Iugoslavia ala fin dla segonda viera, y da si fëna nfin ti ani 1947/48. Ntan che la familia Pitscheider stajova tl’Austria, fova l hotel Post zum Hirschen adum cun l hotel Oswald y l hotel Mondschein (Juan) unì nuzà sciche scola auta per studënc de rujeneda tudëscia de Bulsan (l ann 1944) y l ann 1945 sciche lazaret per i saudeies tudësc. Do la mort de Tone senior ie si fëna anda Berbl do la viera unida de reviers dal’Austria cun n valguni de si mutons (trëi fova tumei tla viera). La à pona menà inant l’ustaria nfin al ann 1961 canche la ie morta. L’ustaria ie passeda a si fi Otto, y dal 1973 al fi de Otto, Josef. L hotel Post zum Hirschen ie unì spartì dal’ustaria, che à sën inuem “La Gërva” y vën meneda dal fra Erich. Do la segonda viera ie stata la Cassa Raiffeisen per plu ani te n local da La Gërva.

La Bula/hotel Stella/Stern
L hotel ie unì frabicà l ann 1908, ma bele dant fovel tlo na ustaria. La prima data cunesciuda ie l 1779 canche l vën rujenà de n “Sternwirt” sun l luech da La Bula. L ann 1864 iel nasciù te chësta ustaria sn. prelat dr. Anton Perathoner da Fussel che cun si genitores stajova tlo a fuech. L ann 1907 ova la familia Karl Demetz (descendënc dl mesc da La Sia) cumprà, canche la fova unida da Schwaz ite, da Anton y Marianne Kasslatter l luech. Sun chësc fovel la vedla cësa cun ustaria, na pitla butëiga y n tublà. L tublà ie unì zarà ju l ann 1924 per fé dainora l hotel “Zum Stern”. Tlo iel mo al didancuei la pizzeria y l restaurant La Bula. L fova l prim hotel de Sëlva a avëi l sciaudamënt zentrel y l’ega ciauda y frëida te duta la majons. L ann 1949 iel unì giaurì dal’autra pert de streda la butëiga ulache l ie al didancuei l hotel Laurin. L hotel da La Bula ie unì derturà su l prim iede dl ann 1938 y ie pona unì adurvà dala “Luftwaffe” tudëscia dal 1943 nchin ala fin dla viera. L ann 1945, dan la fin dla viera, fovel tlo l “Wehrertüchtigungslager dl SS”, ulache n valgun jëuni de Gherdëina fova staziunei (coche Carlo Pescosta de Urtijëi cun ntlëuta 15 ani). L ann 1951 ie l hotel pona unì cumedà su prësciapuech coche la vedla pert ie mo ncuei. La vedla ustaria ie unida zareda ju dl 1963 per fé su l hotel nuef coche l ie ncueicundì (tòch dedora).

Hotel Oswald
Giaurì l ann 1896 coche dependance dl’ustaria La Gërva (Post) da Karl Pitscheider, iel unì ngrandì 10 ani do (fajan nce l ciampanil) ulache l à giapà feter la strutura che l à abù fin dl 1978. L “hotel“, coche l univa tlamà da duc te Sëlva, à abù si tëmps de gloria bele dan la prima viera y pona nce sota l fascism, canche l à dat d’albierch a n grum de persones de gran inuem: ai renianc de cësa Savoia, al scienziat Enrico Fermi y a n grum de d’autra persunaliteies. La sajon prinzipela fova chëla da d’instà y i seniëures fova dantaldut persones dla borghesia auta y dla ndustria che stajova almanco trëi enes, sce nia n mëns o mo plu giut. L hotel fova saurì da arjonjer y vester pra streda fova ntlëuta de gran mpurtanza. Nce ne vester nia da pert da surëdl fova priejà, tant che sun i pruspec de prupaganda scrijoven: “giardino all’ombra - Schattiger Garten”. Al didancuei iel dlonch da liejer “terrazza al sole”, ma sambën tucova ntlëuta la seniëures dla borghesia da ne vester nia pratedes, ajache pratei fova i paures y i lauranc. Canche l fova surëdl jiva la seniëures a spaz cun l’ombrela per ne se ruiné nia la pel dal surëdl. Permò ai 5 de dezëmber dl 1929 ie l hotel unì giaurì l prim iede ntan la sajon da d’inviern y cater ani do al giapà n sciaudamënt zentrel. Te n documënt ora dl archif de chemun iel da liejer che l hotel pudova scrì si prupaganda nce per tudësch y d’autra rujenedes, ma mé sce danora fovel unì cialà do ufizialmënter la prupaganda per talian y la traduzion. Te chël tëmp menova l patron dl Oswald nce la “Villa Heilbrunn” a Maran. L hotel fova tlassificà tla miëura categuria y fova cunesciù te duta l’Europa coche un di miëures tla Elpes. Ntan i bumbardamënc sun la zità de Bulsan, dal 1944 y nfin de mei dl 1945, fova l hotel Oswald la sënta dla scoles autes de Bulsan y Maran. Ntëur la fin dla viera à l hotel dat d’albierch ai ufezieres dla Wehrmacht tudëscia. Nsci fovel mo l ann 1944 unì a se l dé na ancunteda de 80 generei dla Wehrmacht tl hotel Oswald. De mei dl 1945 fova l hotel n lazaret per saudeies tudësc y riesc do iel unì tëut ite dala forzes liedes cun i americans, i nglëisc y i franzëusc. Do la viera ie l hotel ani alalongia stat un di “camps” dla cunesciuda universiteies de Oxford y Cambridge. L ann 1966 à Ossi Pitscheider dl Oswald messù la dé su pervia di gran debic y vënder l hotel ala grupa finanziela Monti/Riffeser de Milan. L ann 1970 ie l hotel mo unì giaurì per curt tëmp sun scumenciadiva de n valgun osc jëuni dl luech. Daldò iel unì sarà nfin che l ie dl ann 1978 unì cumprà y frabicà ora da nuef da na sozietà de 23 hoteliers de Sëlva, che l à inò giaurì dl 1980, cun bar y butëighes tla galaria basite.

La Krone
La prima nutizia dl luech dala Krone, che se tlamova ntlëuta luech de Martin, ie dl 1754 y l patron fova Martin Perathoner. L ann 1858 fova Johann Anton Senoner patron y pona Alois Demetz da Plazola (1863-1907) maridà cun Ottilia (l cuinuem ne n’ie nia cunesciù) che vën bele tlamà “Hotelier zur Krone”. L ann 1897 fovel dessegur bele na pitla ustaria. Daldò iel stat osc dl’ustaria la Krone Jakob Senoner, l segondo uem de Ottilia y pona si muta Tonia. L ann 1930 ova Tita Vinatzer de Rustlea maridà Tonia deventan nscila ost. L hotel ie pona for restà tla mans dla familia Vinatzer. L hotel ie unì ngrandì l ann 1903 y fova per chëi tëmps fat ite cun duc i njins plu moderns. L prim pitl cudejel o pruspet dl’ustaria la Krone ie bonamënter unì stampà l ann 1910 y porta sibe i priejes n kronen che la scrita “Wolkenstein, Gröden, Tirol”, sambën sota l’Austria. L’ustaria fova l ann 1910, coche scrit sun l pruspet, bele “elektrisch beleuchtet” y “beheizt“ y nce “modern eingerichtet“. L pruspet dij che tl luech de Sëlva fovel nce la posta, l telegraf, n dutor y n apotecher y na “Postautoverbindung” nchin ala “Eilzugstazion” de Tluses. L hotel fova sambën daviert dut l ann y ova 36 majons cun ndut 50 liec, na veranda, na terassa y sambën sales de restaurant. Danter l 1943 y l 1945 fova l hotel Krone unì tëut ite (coche duc i majeri hotiei de Sëlva) dala “Wehrmacht“. Do la viera iel inò unì renuvà dal 1951 al 1954 y pona plu iedesc dal 1980 al 2000 fajan l Luislkeller y ngrandian mo n iede l’ustaria.

Hotel Wolkenstein/Grisi
L’ustaria Wolkenstein fova unida frabicheda da Anton Senoner da Vastlé y giaurida l ann 1904. Ntan la prima viera ti ova chësta cësa dat d’albierch ala Bergführerkompanie dl’Austria sota l cumand dl capitan Bart de Viena y fova tl medem tëmp nce lazaret per i saudeies dl’Austria. L ann 1917 fovel ruvà adalerch l beat coser Carl I dl’Austria y si fëna Zita a vijité i saudeies dan jì tla front y i ferii ti lazarec tl Wolkenstein y tl hotel Ingram. Do la prima viera fova l hotel l ann 1924 unì vendù a Alberto Schenk de Ala tl Trentin. L ann 1926 fova l patron dla lizënza dl hotel Giovanni Grisi de Mori che ova mudà l inuem (hotel Grisi che chëi da tlo dij Griji). L ann 1929 fova l’ustaria unida data a fit a Leopoldo Neumann. Ntan la segonda viera (do l 1942) fova chësc hotel, adum cun i hotiei Maciaconi, Oswald, Luna (Juan) y La Gërva, unì adurvà coche scola o cësa per mutans y mutons de bona familia de Bulsan, Maran y n.i. ajache a Bulsan fovel massa periculëus pervia di bumbardamënc. Dant, dal 1939 al 1942, fovel unì adurvà sciche lazaret y sciche scola privata per studënc tudësc. Himmler nstës fova unì plu iedesc te chësta cësa per vel’cuntrol. L hotel Wolkenstein à abù danter si seniëures de majera mpurtanza nce l cunesciù dutor y psichiater Siegmund Freud, (che ova pona dat si preferënza per la feries a Renon ulache l ie stat n grum de ani) y l coser Carl dl’Austria. Curt tëmp do la viera fova l hotel Wolkenstein unì vendù a n sotler Kustatscher de Bulsan y l ann 1963 ala familia Wörgartner dl Tirol dl nord, che ie mo al didancuei patrona y che l à plu iedesc modernisà.

Hotel Maciaconi
L luech da Maciaconi vën numinà tl liber de Josef Tarneller bele l ann 1354 cun l inuem “Pramazachan”, ma l’ustaria ne n’ie sambën nia tan vedla. Alois Riffeser (1844-1922) patron dl luech y dla pitla butëiga da Maciaconi ova scumencià bele scialdi da jëunn a marciadè de chiena y fova stat bon de mëter da pert de biei scioldi tan che dl 1877 ovel pudù frabiché la “gran cësa nueva” da Maciaconi cun butëiga, magasins dala chiena y ustaria. La ustaria da Maciaconi ie numineda dl 1897 adum cun Plan, La Gërva, Krone, Runcac, Juan, La Bula y “das alte Sellajochhaus”. La prima lizënza dla pension Maciaconi fova unida data ora l ann 1928 y l prim patron de chësta fova Zenz Riffeser de Pigon che ai tëmps dl’opzion l ann 1939 fova jit tl’Austria y perchël fova l luech da Maciaconi passà al ”Ente Tre Venezie”. L’ustaria da Maciaconi, tëuta a fit l ann 1932 y pona cumpreda l ann 1955 da Alfons Demetz dl Faujëina y si fëna Milia de Trinadeianesc, à abù ntan la segonda viera la medema destinazion sciche l Wolkenstein, l Oswald, La Gërva y ie unida adurveda sciche scola y cësa per studënc. Danter la doi cëses fovel stat l ann 1945 nce n lazaret menà dala forzes liedes cun a cë i americans. Dal 1946 al 1953 fova l’ustaria (patron l “Ente Tre Venezie”) unida tëuta a fit da anda Maria de Val (che fova la sor de anda Milia) y pona dal 1953 la ova bera Alfons a fit, adum cun la butëiga, nce l’ustaria. L hotel Maciaconi fova dai ani n pitl zënter sun l cunfin danter i chemuns de Sëlva y S. Cristina y ie for stat mpue danora ai tëmps (n conta che l fova la prima ustaria a avëi na mascin da fé l café “espresso”, una dla primes a avëi n taxi, na pumpa dal penzin y na lizënza dal tabach). L ann 1973 ie l hotel unì sëurantëut dal fi de Alfons, Herbert y pona dal fi de chësc, Moritz.

Hotel Val/Vallunga
Chësta ustaria fova unida fata su ala fin dl 1800 da Laurënz Lardschneider, paur de Ciampac, mort dl ann 1908 cun 31 ani. L’ustaria fova pona unida venduda al scumenciamënt dl 1900 a Franz Pitscheider da La Gërva (ntlëuta bele patron dl’ustaria da Uridl y fra di patrons dl Oswald Karl Pitscheider y de La Gërva Tone Pitscheider). Ai 20 de agost dl 1927 ti iel unì dat dal podestà la cunzescion dl’ega de Chedul a Franz Pitscheider, patron dl’ustaria de Val, ma la cundota dal’ega ie permò unida fata do l 1960. Dant tuloven l’ega dala funtana daujin ala “Casa al Monte” tl luech de Ciampac. Osc dal 1930 nfin de mei dl ann 1945 fova l mut de Franz Pitscheider, Josef (sepl) da Uridl (che ie unì mazà dai partisans sun l Jëuf de Staulanza ai 17 de mei dl 1945) deberieda cun si fëna Maria Moroder de Trinadeianesc. Dal 1946 al 1949 fova l’ustaria unida data a fit a Franzl Perathoner de Matie. Dal 1949 al 1951 fova sepl Demetz da Ulëta ost te Val (maridà cun na sor de sepl Pitscheider y deventà ost da Uridl). L ann 1952 iel inò ruvà te Val i mutons de sepl Pitscheider (Pepi, Norbert y Armin) cun si oma Maria do vester stac per 6 ani osc ora Maciaconi. L ann 1958 ai vendù l’ustaria a Rudi Kasslatter dl König (ambolt de Sëlva dal 1960 al 1964), che ie stat ost te Val dal 1959 nfin ntëur l 1965. Daldò ie l frabicat y l grunt unii vendui a n fulestier (de Milan) che l à vendù al stat per fé su l zënter sportif di Carabinieri. Chëi sëura i 60 ani se lecorda mo drët avisa tan bel che l fova a chidlé y plu tert a fé a minigolf dan l’ustaria de Val, che fova deventeda do la viera n luech per se devertì la dumënies do dlieja.

Hotel Ingram
La prima cësa fova unida fata su l ann 1907 cun l inuem Alpenrose da n Nocker. Bele l ann do fovela unida cumpreda da Zenzi Fill de Maran, che ova fat ora basite na butëiga y na pitla ustaria, la tenian per 10 ani fin l ann 1919. Ti ani dla prima viera univa l’ustaria adurveda plucheauter da ufezieres y sciche basa logistica per i saudeies tla front dla Dolomites. Dlongia l Alpenrose piova via te Plan la teleferiches per i Jëufs de Frea y de Sela. Dl 1917 fovel stat tlo l coser Carl I y si fëna Zita a crì i saudeies. L ann 1919 fova l’ustaria unida cumpreda da Anton Schenk de Laion, mut dl gran paur dl Ingram da Laion (nëine y besavon di patrons de al didancuei) che l’ova ngrandida fajan pro majons. Ël ova mparà a lauré te ustaria sun Renon y ova maridà Maria Gasser de Renon. L paur dl luech Ingram a Laion fova nce patron dla ciajea dl Ingram (al didancuei luech Valentini) dal’autra pert de ruf. La ciajea univa mé adurveda d’instà per vardé l bestiam y l luech fova plucheauter mé na pastura. Ma bele dan che l Alpenrose unisse fat su, fova la ciajea deventeda ustaria. Chësta à abù de bon ani dal 1920 nfin dan la segonda viera. Per ne desturbé nia i guvernadëures fascisc oven messù mudé l inuem “Alpenrose” tl inuem “Albergo alla Stazione”. Dal ann 1928 nchin al 1935 fovel unì dat a fit a Moz Bernardi (che l ann 1930 ova fat su cun si fëna Trina Ploner - fia de Tubia Ploner dl Juan - l’ustaria Roma dal’autra pert de streda). Do la mort de Anton Schenk, fova l’ustaria unida meneda inant da si fëna Maria nfin l ann 1959. Anda Maria, resteda sëula cun 5 pitli mutons, ova messù vënder la puscion dla da ruf. Nteressant iel lecurdé che Anton Schenk ova cumprà l ann 1924 la prima curiera y pitova bele ntlëuta l servisc de trasport da Bulsan te Sëlva. Prim sciafer fova Valantin Bernardi dl Fever. L servisc de curiera fova pona unì tëut ju dal regim fascist che ova metù su na sozietà publica per pité l servisc de trasport publich (SAD). Dal 1959 ie l “Albergo alla Stazione” passà al nepot Adolfo Lussardi y a si oma Berta Schenk che à inò mudà l inuem dl hotel te Ingram.

Pension Valentini
(nfin al 1951 ciajea Ingram o luech Fungëia)
(1487 Fungaya, 16… Der Gerichtsschreiber wohnte zeitweilig im Haus Fungea,1858 Anton Schenk, Fungoi)
Danter l 1870 y l 1890 fovel unì ju na smueia che ova zarà demez la vedla cësa y l tublà (Unterfungoi) che fova dl paur da Laion Anton Schenk y che univa adurveda coche ciajea dantaldut d’instà. Chësc ova l ann 1909 frabicà su da nuef la ustaria (che se tlamova Ingram) y plu tert nce l tublà. L’ustaria fova unida venduda dl 1931 ala familia Valentini de Ciampedel che ova nce a fit la utia sun l Jëuf de Sela. La fia de Arturo Valentini, Laura, y si uem Erildo Cappadozzi, l’ova meneda inant nchin l ann 1963. Daldò fovela unida data a fit plu iedesc nchin l ann 1998. L ann 2005 iela pona unida stluta defin.

Hotel Plan de Gralba
L grunt per fé su chësta ustaria fova unì vendù dal chemun l ann 1926 a Amadio Kasslatter dl Droc che ova frabicà su la prima ustaria dl 1930, fajan su n doi ani do nce n tublà y na stala. Te chësta luegia fovel dant mé pastures, giarons y l’ega de ruf che jiva per si cont. L hotel Plan de Gralba fova pona unì ngrandì plu iedesc y menà per plu ani dala fia de bera Amadio, Olga. Dedò l à pià do l nepot Bruno Runggaldier che l à restruturà dl 1987 y dl 2004 fitan via.

Hotel Roma
L’ustaria Roma te Plan (ulache al didancuei ie la Villa Roma) fova unida fata su l ann 1930 da Trina Ploner da Rainel che ova maridà Moz Bernardi de Col dessot. Tramedoi fova osc de prufescion y Moz ova laurà per ani ti majeri hotiei dl’Europa (tla Sbaiz, a Unieja y a Riva). Ëi ova nce laurà tl’ustaria Ingram (albergo alla Stazione). L’ustaria Roma fova davierta nfin l ann 1981 (i ultimi ani sciche dependance dl Dopolavoro) y fova unida venduda l ann 1982 a Arnold Demetz de Lina. Chësc à zarà ju l’ustaria l ann 1986 fajan dainora cuatieres. Dla storia dl’ustaria Roma iel da lecurdé, che canche dl 1945 fova fineda la viera, fovela stata per n curt tëmp cuatier di cumandanc americans che aldò de coche anda Trina cuntova, ova ascundù tlo nce de plu casses de or.

Pension La Sëlva
La prima cësa che dajova d’albierch a fulestieres tl raion de La Sëlva fova unida fata su da Adelaide Puntscher Wild unida da Margreit (lava di patrons da sën y di patrons dl hotel Gran Baita) l ann 1932 sun l grunt dl luech de La Sëlva cumprà da Tone Delago de Fondo. La prima cësa ova mé doi majons da fité, ma bele do puec ani, cun na nteruzion ntan la segonda viera, fovela deventeda na ustaria de na cërta mpurtanza che fova unida ngrandida plu iedesc nfin al 1954, canche la ova bele 47 liec y n restaurant ulache jiva plu o manco duc i seniëures dl raion a cëina. Do la segonda viera fova l’ustaria La Sëlva n pont de referimënt per n grum de fulestieres, dantaldut tudësc. La fova una dla prima ustaries a lauré adum cun l Touropa, ntlëuta l’agenzia plu mpurtanta di Paejes Tudësc. Dala jënt da La Sëlva iela for unida tlameda “l café”. L raion La Sëlva ne n’ova puech do l 1950 mo deguna streda per i auti y i seniëures univa menei cun l jeep y la lueses da corni. N possa bën dì che la familia Puntscher ie stata n piunier dl svilup turistich. Te bën trëi lueges fovel unì fat su n schilift tl raion La Sëlva, per cuntenté i fulestieres: l prim sun l luech de Ronch, l segondo sun l luech de Fondo y l terzo sun l luech de La Sëlva plu inite.

Bar Flora
La bar Flora fova unida frabicheda su l ann 1932 da Franz Mussner dl Pinter y si fëna Catarina Ploner sun l luech dl Fuloni. L fova la prima ustaria che ova giapà la lizenza cun la scrita “Bar”. Ëi ti ova dat l inuem de si muta Flora, deventeda plu tert osta dla ustaria Krone. Do che si fëna Catarina fova morta dl 1937, fova l Flora unì afità nfin do la viera a Josef y Olga Pycha che ova plu tert giaurì l hotel Astor. Dal ann 1945 fova l’ustaria Flora inò unida meneda da bera Franzl (ambolt de Sëlva dal 1945 al 1952), deberieda cun si segonda fëna “Mina” dl Ingram y renuveda fajan dainora na pension. L ann 1964 fovel unì metù su te chësta bar la Lia Cultura y Usanzes. Dl 1982 iela unida sëurantëuta dala muta Franca y si uem Paul Bernardi dl Fever.

Pension Villa al Sole/Zur Sonne
Chësta pension fova unida fata su l ann 1933 da Andrea Senoner de Burdengëia, l nëine dla patrona dl residence da sën. Andrea fova scialdi n bon de ziplé y mo deplu de dessenië y l se ova dessenià nstës la cësa. Ti ani do ovel fat plu de 100 dessënies per frabiché cëses y pensions a truepa families de Sëlva. Ti prim ani afitovel via, adum cun si fëna Tresl Riffeser de Pigon majons cun gusté y permò l ann 1950, do avëi frabicà pro n tòch, ovel fat dainora na pension. L fova la prima “pension” de Sëlva. L ann 1990 fovela pona unida zareda ju y l ie unì fat dainora n residence.

Bar Costa (al didancuei hotel Europa)
Ti ani 1937-1938 fovel unì frabicà la prima cësa da Franz Costa senior - pech da Caspier - che l’ova data a fit a si cunieda Stina de Rustlea. Ëila ova scumencià cun l“Kaffeehaus” vendan tëurta y café. Davia che la fova la prima te Sëlva, sce nia nchinamei de duta Gherdëina, a fé y vënder tëurtes, ti dijoven “Stina dala tëurtes”. Tl scumenciamënt ti judova n cunditer, ma canche l ova metù man la segonda gran viera, fovela resteda sëula. L ann 1950 ova Franz Costa junior (ambolt de Sëlva dal 1964 al 1980) mparà a Dispruch l lëur da cunditer, fat l ejam y scumencià a lauré pra anda Stina nfin l ann 1954. N chël ann ovel sëurantëut l Kaffehaus de si anda y ngrandì l’ustaria. Dl 1955 al damandà la lizënza de vënder buandes alcoliches, y cun si fëna Carla Runggaldier, ovel laurà te chësta ustaria ti dajan l inuem “Bar Konditorei Costa”. L 1965 fovel unì frabicà pro y fat su la pension Europa. Dl 1995 iel pona zapà ite i mutons.

Bar/Pension Nives
La pension Nives (sën hotel) fova unida fata su do la prima viera danter i ani 1920 y 1930 da Gabriel Riffeser (Pigon), nasciù dl 1900 y mort tl 1945. Canche l univa frabicà, ova i patrons de La Gërva y dl hotel Oswald cialà che l sibe de zes da streda ajache i se temova dala cuncurënza. Chësc vester mpue de zes da streda, ie pona stata la fertuna dla bar y dl restaurant ti ani do l 1970 nfin che l ie unì zarà ju. Gabriel Riffeser fova nce patron di prim auti te Sëlva, ël ova l ann 1936 na firma de taxi cun 4 lizënzes. Ël fova unì mazà dai partisans l ann 1945 adum cun autri 4 de Gherdëina; si fëna Cristina Runggaldier ova maridà pona Anton Mussner da Cëdepuent (Tone de sepl). Tla cësa dl Nives fovel la “Pro loco” y azienda de turism dal 1956 al 1965. La pension Nives ie unida afiteda via per plu ani nsci a Angelika Insam, dal 1949 al 1960 a Anny Dorfer, plu tert osta dl hotel Dorfer, pona a Hermine Welponer de Tuene y a Georg Kostner dl Puter (plu tert ost dla Pension Muliac y dla ustaria L Ciamin). L ann 2000 iela unida cumpreda dala familia Luis Linder che l’à zareda ju dl 2007 per fé su l hotel Nives.

Villa Langkofel - Pension Villa Sella
La prima cësa te chësc post sun l luech da Tlusel ora n Plan da Tieja ie unida frabicheda dan la prima viera da Johann Nepomuk Demetz y ova inuem Villa “Langkofel”. Nepomuk ova a fit l’utia de Ncisles dal DÖAV y ova messù la dé su canche l ova optà per l “Reich” dl 1939. L inuem dla Villa Langkofel ie pona unì mudà ti tëmps dl fascism te Villa Sella canche l ie unì frabicà pro dl 1938 o 1939. Do la mort de Nepomuk iela passeda ala muta Marianna che dal 1972 al 1982 la à afiteda a Paolo y Franca Bernardi dl hotel Flora. Dedò iela unida venduda dai nepoc de Marianna a Aldo Perathoner dl hotel Carmen de S. Cristina che à frabicà dainora na cësa cun cuatieres da fité y la pizzeria “Villa Sella”.

Hotel Cir
L hotel fova unì fat su l ann 1938 da Malia Demetz de Plan marideda cun Quirino Zardini de Cortina (che fova sciafer de curiera a Curvea). Malia ova mé finà de frabiché l prim partimënt y fità via na sëula sajon (cun l inuem albergo Zardini), ajache do l’opzion fovela jita tl “Reich” y perchël fova la cësa unida sëurantëuta dal “Ente Tre Venezie” coche dut l auter avëi de chëi che lasciova nosc luech pervia dl’opzion. Malia Demetz y si sor Stina ova nce a fit l ospize de Frea. L ann 1947, coche me à cuntà l dr. Clemente Pasti dla furnadoia Dantercëpies, ova si pere cav. Marcaurelio Pasti cumprà la frabica dl Cir tres n lincant a Unieja, zënza ne l’avëi mei ududa y zënza savëi ulache la fova. N cunescënt ti ova cunsià de fé pea pra chësc lincant y ël ova dat ju na pruposta drët bassa. Do n mëns ovel giapà na lëtra dala prefetura che ël ova venciù l lincant. Nsci fovel unì su sun Jëuf de Frea a udëi cie che l fova da garat. A chësta maniera fova la familia Pasti ruveda te Sëlva y ova purtà pro al svilup de dut l raion dai schi de Dantercëpies: ti ani 1947/48 l hotel Cir, pona la sentadoia dal Jëuf de Frea sun Dantercëpies y permò daldò la sentadoia da Sëlva su. L hotel Cir fova pona unì menà da de plu diretëures da oradecà y per plu ani dal fra de Oskar dla ustaria Frara, Pepi Mutschlechner. Al didancuei ie la sozietà de mplanc portamont Dantercëpies patrona dl hotel Cir y l à dat a fit.

Hotel Gardenia – pension Delago
La cësa se tlamova n iede Villa Delago y pona pension Delago y fova unida fata su da Hans Delago (fi dl prof. Leo Delago che ie stat nce podestà) dl 1934. L ann 1939 fovel tlo nchinamei ruvà adalerch l prinz Umberto di Savoia, Maria Josè dl Belgio cun i mutons Vittorio Emanuele y Maria Pia. La pension fova unida venduda da Hans Delago ala familia Michelon y plu tert, do l 1970, ala familia de Luis Hofer che l’ova ngrandida y fat dainora l hotel Gardenia.

Hotel Miramonti
L hotel Miramonti (frabicat al didancuei n revina, ulache se spartësc la stredes di Jëufs de Sela y de Frea) fova unì fat su ntan l fascism l ann 1938 dala “Opera Nazionale Dopolavoro”, na urganisazion metuda su per dé d’albierch tl tëmp liede a lauranc dla Talia. La spersa tëuta ca per chësc frabicat, de ndut bën feter 13.000 m² danter ustaria, streda, plaza y cësa per l vardian dla stredes, fova dl Chemun de Sëlva y fova resteda sia nchin l ann 1958. Dl ann 1954, canche aldò dla cunvenzion danter l Stat talian y la Region autonoma de Trënt y Bulsan fossa chëst’ultima deventeda patrona dl frabicat, se oven ntendù che l grunt fova mo dl chemun y perchël ova chësc damandà y nce arjont che l frabicat lessù ti unisse scrit a d’ël. Al stat (o ala region) ëssen mé messù paië i scioldi che n ova dat ora per frabiché. L fova de bujën de se spazé, ajache do la lege ëssa do 20 ani l stat pudù se nuzé de na usucapion. La cuestion fova unida trateda per plu ani y ala fin, l ann 1959, ova l chemun dat pro de ti vënder al stat duta la spersa de grunt per 6 milions lire y stlù ju l stritoz. L’ustaria fova te chëi ani unida data a fit a n cër Staffler de Bulsan y dl ann 1970 fovela unida afiteda ala familia Peter Oberhollenzer nfin l ann 1994. Dedò fova l Miramonti unì stlut y la Provinzia autonoma de Bulsan-Sudtirol, che fova deventeda patrona aldò dla despusizions dl “Paket”, l ova vendù al chemun l ann 2006 per na soma de 433.354 euro.

Hotel Casa Alpina-Dopolavoro Ferroviario
L prim frabicat fova unì fat su ti ani 1939/40 (dal Dopolavoro Ferroviario de Bologna) y fova mé resservà al tëmp liede di lauranc dla “Ferrovie Statali”. Permò do la viera iel unì mudà te na ustaria cun lizënza de afité a duc. L hotel ie unì derturà su plu iedesc.

Pension Ciampinoi
N fulestier de inuem Signorelli ova scumencià a la frabiché ala fin dla segonda viera. Dedò l’à cumpreda, mo nia fineda, Emil Demetz dl Juan l ann 1948 y giaurida dl 1950. Do la mort de Emil l ann 1951 fovela unida meneda inant coche pension da si fëna Carlina Comploi dl Pizuela cun l segondo uem Vittorio Rudatis. Do l 1980 fovel pona unì fat dainora n restaurant/pizzeria lascian de afité majons. I medemi patrons ova ntant fat su iló dlongia la pension Carmen per afité majons.

Wolkensteinschlößl (l Ciastel) – Villa Dolomiti
Chësta cësa tlameda al didancuei Villa Dolomiti ie bën unica te duta Sëlva y tira la curiosità de uniun che passa danvia. La fova unida fata su l ann 1899 (als Jagdhaus errichtet) da Eduard Prinoth de Urtijëi - tlamà nce l vedl Brida - aldò dl dessëni dl arch. A. Ritter von Inffeld y pona cumpreda dl 1936 da Franzl Perathoner de Col (besavon dla patrona d’al didancuei). Chësta cësa à na storia nteressanta ajache tlo stajova dl 1945 ntan i bumbardamënc dla lianza (danter americans, nglëisc y franzëusc) la fëna de Martin Bormann, l secreter drët temù de Adolf Hitler. Ëila ova inuem Gerda Bormann, ma fova ruveda adalerch sota l fauz inuem de Gerda Bergmann. Si mut Helmuth y doi d’autri fredesc fova gor jic a scola te nosc luech, ti ani 1944 y 1945. Do la viera fova la cësa dl Brida stata per plu ani l “Kinderheim” (cësa per
feries per mutons) drët cunesciù y priejà, menà dala familia Kasslatter dl Olympia che l ova a fit nfin do l 1960.