Cun l nascer dl alpinism iel nce stat de bujën de fé su vel’utia te n raion mpue plu daujin ai crëps. Ti paejes fovel bele ustaries drët bën njiniedes ite, ma l messëi jì plu ëura per ruvé daujin ai crëps y vester tl pericul de ruvé te d’uni sort de tëmps à riesc fat capì che l fova de bujën de dé d’albierch daujin ai crëps. La uties de Sëlva ie per la majera pert unides frabichedes bele ala fin dl 1800. Daldò iel mé plu unì leprò vel’utia sun i purtoies dai schi zënza albierch y mé daviertes ntan l tëmp de sajon.

Ospize sun Frea
Dl 1896 iel unì giaurì l ospize sun Frea (ulache l fova suzedù bele n grum de desgrazies dantaldut d’inviern per levines y dlacedes) da pert de n cunsorz de osc de Urtijëi. Chësta utia fova unida afiteda via cun l mpëni de la tenì davierta dut l ann a na maniera de judé for chëi che ova de bujën. L prim ost dla utia fova l mëinacrëp Rudiferia y pona n cër Franzelin. Dal 1925 iel stat ost Vigil Mutschlechner (l pere de Oskar) fin dl 1930 canche l se à fat su la ustaria Frara (tl chemun de Curvea). Ost tl ospize ie mo stat Giuani Demetz da Tlusel, pona la surans Amalia y Christina Demetz de Plan che dl 1935 ova metù ite l strom. Amalia ova pona maridà Quirino Zardini y scumencià a frabiché l hotel Cir. Per gauja dla opzion se n fovi jic ora tl “Reich” y ntant fova l hotel Cir unì destëut dal Ente Tre Venezie. L’autra sor à maridà Luis Pederiva de Fascia y à cumprà l ospize dal consorz de osc de Urtijëi. Pederiva l à menà inant fin dl 1979 canche l ie unì vendù ala sozietà dai lifc Dantercëpies che l à dsarà dl 2001. Per la storia y la tradizion che chësta utia à, se meritëssela de unì dertureda y inò giaurida. L Jëuf de Frea fova tla storia dla valedes ladines de gran mpurtanza y l fova per milesc de ani l troi o la streda de majer cunliamënt danter la valeda dl Isarch, Gherdëina, Colfosch, Ciaulonch, Reba, Fedom y la planadures de Unieja. Dessegur passova sun l Jëuf de Frea l Troi Paian, che ie pu l prim cunliamënt tres Gherdëina. Sun chësc jëuf iel nce unì scrit una dla plu bela stories de solidarietà dla jënt da mont y dl prim judacrëp (Bergretter) de nosta valedes: la storia dl Vedl Linacia (1829-1905).

Utia de Ncisles
La sezion de Regensburg dl DÖAV ova giaurì ai 26 de agost dl 1888 te Ncisles na utia. Tla prima utia ne fovel degun ost, l fova na stua cun cësadafuech, n local da durmì cun 8 madroc, na majon per l’ëiles y lueges da durmì tl fën. Tla storia dl DÖAV dl 1894 iel ndicà che 2.260 persones se ova bele scrit ite tl liber dla utia, de chisc bën 537 tl ultim ann. Dl 1897 pona bele 987 fulestieres, massa per chësta utia, tan da messëi la ngrandì ti fajan nce n cuatier al ost. Dl 1902 fovela unida ngrandida per l segondo iede y pona inò dl 1905. La utia univa meneda da na cërta Luisa Skasa de Urtijëi, ma ajache i patrons de Regensburg ova plu iedesc abinà si uem cioch ti ovi dat la utia dl 1907 a Johann Nepomuk Demetz da Tlusel che ie stat iló nchin al 1939. Dl 1913 ova la utia giapà na cundota d’ega; l telefonn ovela bele dal 1911 inant. Deberieda cun la utia fovel unì giaurì i troies sun Stevia (Furcela dla Piza), sun Col dala Pieres y sun Sas Rigais. Dl 1921 iela unida ocupeda dai saudeies, dl 1923 destëuta dal Stat talian y sëurandata ala sezion dl CAI de Firënza. L cuntrat ie permò unì sotscrit dl 1949. Dal 1940 inant iela unida meneda dala familia de Matie Perathoner da Costa.

Utia de Sela
La utia sun l Jëuf de Sela ie unida fata su dai mëinacrëp Josef Pescosta y Alois Rudiferia dl 1902, ma bele n ann do ai messù vënder la cësa mo nia fineda ala sezion dl “Alpenverein Bozen” ajache i ne fova nia boni de ruvé ora di debic. Giaurida iela unida de agost dl 1903 cun 40 liec (10 majons da doi y na gran majon cun madroc). La ova custà 32.637 Mark, na soma true massa auta per i mëinacrëp. La sezion de Bulsan ti ova sëurandat a Pescosta de mené la utia per l prim ann, ma bele l ann do iel unì a mené la utia per la sezion de Bulsan Anna Krautschneider de Arco. Ntant fovel bele unì fat mo lëures per mëter l’ega te cësadafuech y fat ora mo vel’majon tl sotët. Dl 1904 ova passa 2.000 persones durmì tla utia de Sela y dl 1905 fovela inò unida ngrandida, fat n troi sun Col de Toi y cumprà nce na gran spersa de grunt ntëurvia. L ann 1905 fova la utia unida giaurida per l prim iede nce d’inviern (zënza servisc y mé per i cumëmbri dl DÖAV che giapova la tle). D’instà oven nce tëut su bestiam per la pastura che n ova cumprà (doi vaces, na desëina de cëures y 170 biesces) y njinià n troi sun Dantersasc tres la furcela de Saslonch ulache n minova de fé passé l prim troi tres duta la Dolomites. Dl 1906 fovel pona mo unì cumprà leprò l pra da mont de Matthias y Isidor Perathoner de Odum metan adum de ndut n avëi de 200 Joch y 609 Klafter (1 Joch = 6400 m2 y 1 Klafter = 4 m2) che fossa 128 ha y 2436 m². Te chël ann ova albergià tla utia l rë de Sachsen Friedrich August y l cumandant dla trupes dl’Austria Kaiserliche Hoheit Erzherzog Eugen. Dl 1909 univela inò ngrandida y ntant fova i ghesc bele passa 3.000 te n ann. L ann 1914 fova l lëur cun i fulestieres jit zeruch dassënn pervia dl rumpì ora dla viera y dl 1915 univa la utia tenida davierta dut l ann cun l fin de defendura (“Verteidigungszwecke“) coche dij l protocol.
La utia dl Sela fova pona unida tl tëmp dl fascism (1923) destëuta al Alpenverein y passeda al CAI de Bulsan che dl 1925 la ova data a fit ala familia Valentini de Ciampedel (che ie stata 85 ani iló). Arturo Valentini ie stat ost dal 1925 nfin al 1962, daldò si muta Laura marideda cun Erildo Cappadozzi y pona i mutons nchin d’ansciuda dl 2010. L “Rifugio Passo Sella” à abù si ani de gloria propi danter la doi vieres canche sun l Jëuf de Sela jiva a sté seniëures dla borghesia auta y nce vel’rë (nsci l rë dl Belgio Albert I, che fova n gran apasciunà dl jì a crëp). La utia fova deventeda te chisc ani un di hotiei plu renumei de Sëlva y fova dai ani 1930 for nce davierta d’inviern dajan nce da lëur a plu maestri de schi.

Ciajea de Michl
La ciajea de Michl (che ie bonamënter plu vedla dla utia dl Sela) ie unida cumpreda dal Alpenverein adum cun dut l grunt y passeda al CAI de Bulsan. Ala familia Michl Ploner de Laion fovela unida afiteda dl 1939 cun n cuntrat firmà dal podestà per mëter su biesces. L priesc fova de 225 lire al ann.

Utia de Puez
La prima pitla utia de Puez fova unida giaurida ai 22 de juni dl 1889 dala sezion “Ladinia” dl DÖAV. Presidënt fova l badiot Anton Alton. Ngrandida l prim iede dl 1903 iela stata destëuta dal’aministrazion fascista dl 1923 y sëurandata al CAI de Bulsan, che l’à inò giaurida dl 1934. La utia nueva che ie åën davierta ie unida fata su dl 1982 dal CAI de Bulsan. Chësta utia univa crissa su da puec alpinisc (povester nce ajache daujin ne n’iel nia vel’gran piza da arjonjer), nsci fovel mé uni ann feter da 40 a 60 persones che ruvova tlo. Permò ala fin dl 19ejim secul rejonen de feter 200 persones (danter chisc mé 40-50 turisc). Sambën ne fovel tl prim degun ost te utia. La utia de Puez ie sun l cunfin danter i chemuns de Sëlva y chël de Curvea.

Utia de Dantersasc (Langkofelhütte - Rifugio Vicenza)
La utia de Dantersasc che ie te chemun de S. Cristina fova unida fata su dala sezion academica dl DÖAV de Viena y giaurida ai 9 de setëmber dl 1894. Na levina l’à desdruda dl 1901 y tosc do iela unida fata su te n luech plu segur y inò giaurida dl 1903. Dl 1909 iela unida ngrandida mo n iede cun 40 liec. Do la prima viera fovela unida åareda per 10 ani y dal 1924 fovela unida sëurantëuta dala sezion dl CAI de Vicenza che la à inò dertureda su y njinieda ca.

Utia Furcela de Saslonch (Toni Demetz)
L ann 1952, ai 17 de agost, ti ova dat ju l tëune a trëi alpinisc sun Saslonch. L fova l mëinacrëp jëunn Toni Demetz da Iman cun doi seniëures. Toni y n seniëur fova unii mazei. Giuani da Iman che fova sota Saslonch fova jit su a tò l ferì y l ova salvà y permò dedò, adum cun d’autri mëinacrëp, ovel purtà ju si mut Tone y l’autra persona morta. Per chësc lëur ova bera Giuani giapà dal presidënt dla Republica l “Ordine del Cardo” dl 1953 y pra chësta ucajion ti ovel damandà al Presidënt de pudëi fé su la utia, cossa che ti fova unida cunzeduda; tan che bele dl 1954 d’autonn ovel giaurì la utia cun l inuem de si mut Toni. La utia ova lerch da durmì per 6 persones. Dl 1955 ovel fat su la teleferica purtan su n motor de bën 75 chilo a spinel. La condles ie unides giaurides l ann 1960 adum cun l ngrandimënt dla utia.

La Bambergerhütte (utia de Boé) sun Mëisules ie unida giaurida dl 1894, y dl 1903 la utia de Pisciadù. (chëstes ne n’ie nia tl Chemun de Sëlva)

Utia Emilio Comici
La utia Comici ie unida fata su dl 1948 sun scumenciadiva de Carl Runggaldier da Ciaslat che pervia che l ne fova nia bon de paië n tel frabicoz ova messù la vënder mo nia fineda. N valgun fulestieres pasciunei dl schi la ova cumpreda, danter chisc fova nce Gianni Marzola che la ova pona fineda y giaurida n doi ani do.

Utia de Stevia
Nia danter la uties fates per i turisc iel stat nfin feter ntëur l 1970 la utia de Stevia, che fova mé na ciajea, restrutureda dal patron Leonhard Ploner de Gudon dl 2006. Ntant ova si fra Toni, patron dla pastura de duta la mont de Stevia (za. 294 Joch y 326 Klafter = za. 188 ha) fat su dl 1975 dlongia na pitla cësa de lën per dé ora da bever y maië. La mont de Stevia ie unida cumpreda dl 1939 da si pere Veit Ploner de Gudon.