Posta

Dl 1859 univa giaurì a Urtijëi l prim ufize dla posta y iló messova l un o l auter de Sëlva che giapova vel’lëtra cialé de jì a se tò si nutizies o a mandé via vel’lëtra. Dal 1857 (DÖAV 1888) n ann do che l ie unì giaurì la streda univa la posta uni di da Pruca a Urtijëi (“Tägliche Fahrpost”) y da iló tres n pustin (“Botenpost”) te S. Cristina y te Sëlva.

N valgun ani do ova Carl Pitscheider da La Gërva (nasciù dl 1830) scumencià a jì uni di a Urtijëi cun si ciavei a tò la posta y nsci fova La Gërva l pont de referimënt per chëi che aspitova vel’lëtra. Bele dan che l fova unì fat la streda da Pruca ite, semeiel che bera Corl jiva a pe cun na fiertla a tò la posta a Pruca.

Do ël ova si fi (nce Corl de inuem), nasciù dl 1877, tëut su l lëur de jì a tò y dé ora la posta. Dl 1897 d’instà univa l “Stellwagen” doi iedesc al di da Uritjëi nchin te Plan y nce la posta jiva doi iedesc da La Gërva nchin a Urtijëi.

L prim ufize dla posta (K.u.K. Postamt) fova unì giaurì te Sëlva ai prim de dezëmber dl 1873, doi ani dan chël a S. Cristina, for tla ustaria da La Gërva, prim “Postmeister“ fova Corl Pitscheider. Dal 1911 pona fova l pitl ufize menà da na cërta Ladinser de Tluses y dedò, nfin al 1928, da Floriano Bernardi da La Ila te Badia. I mutons dl ost de La Gërva purtova ora la posta y se damandova per chësc servisc n scioldo da chëi che giapova na lëtra.

Per adurvé l telegraf (K.u.K. Telegraphenstation) pudoven dal 1890 jì a Urtijëi y te Sëlva permò ala fin dla prima viera mundiela.

 Canche dl 1924 fova brujeda ju la ustaria da La Gërva, fova la posta unida spusteda per n valgun ani te n local dla cësa dla scola dlongia dlieja, te cësa de chemun y dedò inò ja La Gërva. Ti ani 1970 fovela unida spusteda tla Galaria Aaritz y dal prim de jené dl 1998 te Cësa de Cultura te plan da Mauriz.

Telefonn
L telefonn ie ruvà tla valeda de Gherdëina l ann 1905, tres na linia da Ciastel ite y riesc do nce te duc i majeri hotiei de Sëlva. N messova unì culeghei da na zentrela cun l numer dejidrà y l durova suvënz plu ëures a giapé l culegamënt.
L prim post de telefonn publich ie unì giaurì dl 1926 cun n cuntribut dl chemun che ova nciarià Floriano Bernardi (mpiegat dla posta) de l mené. I ufizies dl Chemun de Sëlva à giapà l telefonn ai 16 de nuvëmber dl 1926. Permò l ann 1952 iel unì metù ite l telefonn automatich, cun chël che n pudova cherdé su diretamënter, ma per cherdé su te vel’stat oradecà, messoven nchin dan l 1970 aspité l cunliamënt tres l “centralino” dla Telve.

Radio
La prima trasmiscions dl radio fova da audì bele ntan la prima viera, ma sambën fovel te Sëlva tan che deguni a avëi n aparat da scuté su. Permò dal 1930 inant se ova la majera pert njinià n radio te cësa, na vëira sensazion, y ce bela mujiga! La prima sperimentazions de n radio te nosta rujeneda ie states permò dal 1946 inant. Na trasmiscion ladina regulera “Dai Crëps dl Sela“ iel stat mesun arjonjer dal 1961. Dal 1977 lëura Carl Insam dl Galina sciche prim jurnalist dla Rai Ladina.

Televijion
La televijion ie stata da udëi te Sëlva dal 1958, canche l ie unì metù su l’antëna sun Mont de Sëuc, sambën mé a blanch y fosch. La prima trasmiscions a culëures fova chëles per i Campionac dl mond de schi dl 1970. La prima trasmiscion per ladin tla televijion, “TRAIL”, ie stata da udëi ai 8 de lugio dl 1988 cun l jurnalist de Sëlva Carl Insam dl Galina. Dant, dl 1979, fovel unì fat na lingia de 12 trasmiscions sperimenteles a blanch y fosch sun RAI 2 cun Carl Insam.

Pumpes dal penzin
La prima pumpa dal penzin (dla Shell) ie unida giaurida te Sëlva de utober dl 1925, aldò de n vedl protocol de chemun, da pert de Vinzenz Riffeser, ora Maciaconi ulache se anconta la doi stredes. Mo dan l 2000 iela unida tëuta demez per ti dé plu lerch ala streda.
Dl 1929 ova nce bera Tone Senoner dl Sartëur giapà la lizënza de giaurì na pumpa dal penzin dala “Società Italo-Americana per il Petrolio” dan la cësa da Paul. Dl 1933 fovel unì giaurì na pumpa dal penzin nce sun l Jëuf de Sela.

D’autra pumpes dal penzin iel stat: la AGIP ora l Ghetun, dlongia la cësa dl Fever, giaurida dl 1953 tulan demez la vedla pumpa dla SAROM dan l Sartëur. L AGIP ie stata davierta nchin dl 1999; la doi pumpes mo daviertes al didancuei ie la IP (dal 1969) y la ESSO (dal 1971). Per tramedoves iel udù danora dal plann reguladëur de les tò ora dl zënter dl luech.

Auti, curieres y taxi
I prim patrons de n auto fova te Sëlva aldò dla chëutes paiedes te chemun dl 1924-25:
Antonio Pitscheider da La Gërva, Carlo Demez fu Vincenzo da La Bula y Giovanni Vinatzer dala Krone.

L prim patron de curieres da trasport fova te Sëlva l patron dl luech dl Ingram te Plan, Anton Schenk, che dl 1925 ova doi lizënzes per curieres, una da 14 y una da 12 persones.

La prima lizënza de trasport cun camion (agenzia di trasporto) ie unida data ora dl 1929 a Vincenza Mussner in Insam (oma dI taxist Robert Insam y lava de Alex Insam).

Dl 1930 ova Gabriel Riffeser de Pigon giapà la prima lizënza da taxi y dl 1936 ova l podestà decretà che te Sëlva pudovel vester 8 lizënzes de taxi; da dedò fova l numer inò metù ju a 6 pervia dla prutesta di patrons dla lizënzes

La lizënzes ova:
Gabriel Riffeser da Maciaconi lizënza per 4 auti
Vincenzo Demez fu Vincenzo de Plan da Tieja per 1 auto
Francesco Nocker fu Gallo (Jakob) da Rainel per 1 auto