La Lia di Paures de Sëlva (Bauernbund)
Bele dan passa cënt ani, dl 1904, fovel unì metù su l “Tiroler Bauernverband” che tulova ite dut l Tirol storich. N lecurdanza iel unì urganisà l ann 2004 doi de gran defiledes, una a Sterzing y l’autra a Dispruch. L fin de chësta urganisazion fova de crië n liam plu sterch danter i paures y dé na usc tlera per ressolver i problems sozio-economics y politics de chëi tëmps y nce l mantenimënt dla tradizions di antenac. La ntraunides dla doi gran vieres mundieles à spartì chësta urganisazion. Do la prima viera, canche l Tirol ie unì spartì, fova Sudtirol ruvà pra la Talia cun la cunseguënza che sota l fascism fovel unì pruibì duta la lies storiches y nsci nce l “Bauernbund”. Permò do la segonda viera, ntëur i ani 1950, fova chësta lia inò renvenida. Tlo possen dì che l scumëncia l’atività dla lia di paures de Sëlva, ajache da moinla fovel na strutura dl “Südtiroler Bauernbund” a livel de luech, raion y de provinzia. L prim sëurastant dla lia di paures de Sëlva fova Batista Vinatzer, vulgo “Tita dla Krone” che ova cialà che i paures giape inò duta la rejons che l fascism ti ova tëut. Nsci chëla dl mesc stlut scrit su da nuef tl liber fundier l ann 1954-55.
L ann 1968 fovel pona unì metù su n cunsëi cun a cë Matthias Mussner dl Schlosser. Ël ova gran legrëza a zidlé bestiam. L ann 1971 iel nasciù la Lia per la seguranza dl bestiam (Viehversicherungsverein Wolkenstein). Dal ann 1972-76 fovel pona unì lità Martin Senoner de Santuel, sëurastant dla Lia di paures de Sëlva. Si merit ie stat chël de nvië via i lëures per la revalutazion dla pastura de “Sëura Frëina - Tramans”.
Dal 1976 al 2000 à menà Ferdinand Perathoner da Guton chësta lia. Cun gran pascion ova ël bele l ann 1972 metù su la Lia dla biesces de raza. Cun mpëni per la cuestions di paures, savëi y ardimënt politich a livel dl Chemun de Sëlva al arjont la metuda n droa dl dërt de adurvanza publich (“Usi civici - Gemeinnutzungsrechte”). Rejons che fova sun papier, ma che ne n’univa nia for respetedes. Sota ël à la vita y l lëur da paur fat gran mudazions tla forma dla mecanisazion y tl svilup di prudoc da paur. Dal ann 2000 inant nchina ncueicundì iel sëurastant di paures de Sëlva Georg Lardschneider da Larciunëi de sot. Ël à cialà de cunlauré cun la lies da paur di doi autri luesc de Gherdëina, metan a jì plu sëires de nfurmazion y descuscion sun duta la problematighes da paur, sensibilisan i paures a tò si destin te si mans se la fajan valëi cun argumënc cuncrec per valorisé miec chël che ëi fej per l bën de duta la cumenanza y l bel cialé ora dla cuntreda.
La lia di paures de Sëlva à ncueicundi 60 scric ite.

L cunsëi da sën:
Ferdinand Perathoner, che ie nce reprejentant ladin tl “Landesbauernrat”
Ivo Perathoner da Plazola che ie nce reprejentant ladin tl cunsëi dl raion dla Val de Isarch
Adrian Senoner da Cësanueva, scrivan y reprejentant di paures tl Chemun de Sëlva
Walter Perathoner de Col (cassier)
Heinrich Comploi da Tublà (cunselier per i paures tla lia de turism de Sëlva)
Leo Comploi da Tieja y Matthias Senoner da Daunëi (reprejentant di paures jëuni)

La Lia di Paures Jëuni
I paures jëuni de Sëlva se à urganisà te na lia permò ai 18 de nuvëmber dl 1986, ti ani ulache la ne cialova nia ca drët bona cun i paures y te de plu luesc univel lascià jì ora l bestiam per se dediché a na atività che se mpaiova deplù: l ziplé o vel’lëur tl turism.
L se ova mpo abinà adum na grupa de 30 jëuni y jëunes, mutons y mutans de paures che ova pona metù Clemens Senoner dl Ploc prim presidënt. Chësta lia se ova pona cruzià dl 1987/88 de pudëi dé ju l lat ala Mila, scumenciadiva che fova unida pona slargëda ora a duta la valeda. Chësc ie dessegur stat un di vares che à garantì ai paures mo atives de avëi n davani segur y da chël mumënt inant ne n’à l bestiam te Sëlva nia plu tëut ju. L ie nce stat na scumenciadiva di paures jëuni deberieda cun la lia dl turism de mëter a jì dal setëmber dl 1988 inant la bela manifestazion dl desmunté dl bestiam. L prim iede ti prei da Nives y pona plu tert per gaujes de segurëza te Val. Na scumenciadiva drët bën ududa dai seniëures, ma povester mo deplù dala jënt dl luech y dla valeda che se abina for drët gën a passé n domesdì danter l bestiam.
La Lia di paures jëuni à nce plu iedesc judà a mëter a jì de bela defiledes storiches pra festes folcloristiches metan a despusizion si massaries, guanc y jënt. Presidënc de chësta lia jëuna iel stat damprovia feter duc i mutons di paures dla Vila y dl Daunëi mpue a rotazion coche l fova bele plu da giut te chësc raion ulache l univa a rotazion y do regules centeneres metù l regulant, l paster, tenì l manz y nsci via.

La Lia di Osć (HGV)
La Lia di osc de Sëlva ie unida metuda su dl 1967 cun l mpëni de reprejenté miec a livel pulitich i nteresc de chësta categuria y nce per fé pea a abelì manifestazions y nfrastrutures dl luech. A livel provinziel fova la prima urganisazion di osc (ntlëuta “Wirtegenossenschaft”) bele unida metuda su dl 1883 a Maran, Bulsan, Burnech, Persenon y tosc do a Tluses. I prim osc de Gherdëina fajova per l plu referimënt a Tluses. Na lia unitera di osc de dut l Tirol ie unida metuda adum dl 1908. La urga-nisazion di osc dl Tirol dant, dl Trentin sota l fascism y de Sudtirol do à for laurà inant sambën cun vel’deficultà y nteruzion ti tëmps dla doi vieres.

Presidënc y presidëntes dla lia iel stat:
Pepi Pitscheider dl hotel Des Alpes dal 1967 al 1969
Andrea Senoner dla Villa al Sole dal 1969 al 1985
Alberta Callegari dl hotel Genziana dal 1985 al 1993
Günther Prinoth dl hotel Piccolo dal 1985 al 2009
Doris Pycha dl hotel Astor dal 2009

La Lia di Buteghieres de Sëlva
Sciche te dut Sudtirol se à nce nosc buteghieres urganisà te na lia per purté inant y defënder si nteresc.
La sezion de Sëlva dla Lia di buteghieres ie unida metuda su dl 1966. L ie sciot che chësta lia ne n’à mei abù protocoi ufiziei y nsci possen mé se lascé sun vel’lecort di cumëmbri plu vedli. La lia se à plucheauter cruzià de unifurmé l’ëures de giaurida dla butëighes, de dé ju prupostes y minonghes al’aministrazion cumenela sun mudazions ala regules, al plan dl frabiché y al plan dl cumerz dl Chemun de Sëlva.

Presidënc dla lia iel stat:
Walter Demetz da Maciaconi dal 1966 al 1970
Willi Senoner dl Sartëur dal 1970 al 1978
Pepi Bernardi dl Fever dal 1978 al 2000
Bruno Pitscheider dl Gardena Center dal 2000 inant

La Lia di Artejans
La prima senteda te Sëlva dla Lia di artejans, sciche sezion dl raion dl “Handwerkerverband Südtirol” ie stata ai 18 de jené dl 1979. N sentiva for plu y plu l bujën de se senté adum per rujené ora i problems dl artejanat che deventova for plu sterch y se slargiova ora sun plu sortes de artejans: scultëures, zipladëures, moleri, marangons, mecanicri y nsci via. De chësta lia fej pert de plu sezions, sciche l artejanat artistich, i zipladëures a mascin, i moleri y duta l’autra formes de artejanat tradiziunel. Ti ultimi ani se à chësta lia urganisà a livel de valeda.

Presidënc de chësta lia plutosc jëuna iel stat:
Franzl Senoner de Santuel (scultëur) - dal 1979 al 1985
Hermann Mick (marangon) dal 1985 al 1999
Manfred Ploner (mecanicher) dal 2000 al 2008
Ivo Insam dl Galina (marangon) dal 2008 inant


LIES ECONOMICHES A LIVEL DE GHERDËINA

Unika
Metuda su dl 1994 per judé i scultëures de Gherdëina a vënder miec si atività artistica y l ziplé a man. La lia à da ntlëuta incà for metù a jì ai prims de setëmber la mostra dla scultura Unika tl Zënter dal tennis a Urtijëi y ora de chël fat pea pra d’uni sort de mostres y cuncorsc ora per dut l mond. Pra chësta urganisazion iel scrit ite passa 45 scultëures de Gherdëina. Danter chisc n iel nce 4 de Sëlva. Presidënt ie dal 2005 ncà Roland Perathoner da Lech.

Lia dl’eves Gherdëina
Chësta lia ie bele unida metuda su dl 1921 tla ustaria da Mauriz a Urtijëi y à da ntlëuta incà for sustenì cun referac y ancuntedes duc chëi che zidla eves te nosta val. Dal 1989 ie l presidënt Leo Mussner de Curzelon.

Lia dai ciavei de Gherdëina
Metuda su dl 1984 da Luis Prugger di Coi ala al didancuei 58 cumëmbri cun de ndut passa 100 ciavei. De Sëlva ie Werner Perathoner da Guton, Karl Senoner dl luech de Ciampac, Hansi Planker da Larjac y Ubald Senoner de Pozzamanigoni che à ciavei al didancuei.


LIES DL TËMP LIEDE A LIVEL DE GHERDËINA

Lia da Mont de Gherdëina
L fova l ann 1954 canche 7 uemes dl AVS (Alpenverein Südtirol- Sektion Gröden) y dl CAI (Club Alpino Italiano-Sezione Val Gardena) à metù su la Lia da Mont. Chisc fova Batista Vinatzer de Val, Flavio Pancheri, Hans Sanoner da Mauriz, Norbert Mussner dl Sit, Alex Moroder dl Rusina, Heinrich Moroder de Dos y Bruno Moroder dl Cunfolia. I fundadëures sibe dl CAI che dl AVS fova avisa la medema persones; tl at de fundazion resulta nfati l reprejentant dl CAI sciche vizepresidënt dl AVS Gherdëina y l reprejentant dl AVS al incontra sciche vizepresidënt dl CAI Gherdëina. Permò do l ann 1978 iel unì metù su n coordinadëur per tramedoi grupes, che ova pona nce la ncëria ufiziela de presidënt dla Lia da Mont Gherdëina. La Lia da Mont cumpëida al didancuei passa 1.100 cumëmbri. L cunsëi ie de 14 persones y mplu vëniel tëut ite n reprejentant di Judacrëp, di Jëuni dla Lia da Mont, di manco jëuni, “Nëus jon pa bel plan”, dl GAG (Grupa Alpinisc Gherdëina) y dl AS (Grupa Arpizeda Sportiva).
La Lia da Mont se tol dant de fé cunëscer la montes y de nsenië a se muever cun respet tla natura. Truepa mpurtanza ti vëniel dat ala defendura dla natura sustenian azions de sensibilisazion ai problems dl ambient. Gran pëis ti vëniel dat nce ai jëuni che vën daniëura sustenii te si ativiteies. Te chëstes iel da udëi ora nce na funzion soziela y educativa, ti dajan ai jëuni la puscibltà de se devertì y de passé l tëmp liede n cumpania. N auter mpëni che la Lia da Mont se à tëut sëura ie chël de mantenì i troies y la tofles. Te Gherdëina ons mpue passa 300 km de troies. Nce la vies fieredes tol si lëur, davia che les vën suvënz danejedes dal tëune y dai sasc. Ntan dut l ann vëniel metù a jì dala Lia da Mont truepa jites, nce dala grupa di jëuni y “Nëus jon pa bel plan” y nce cursc de schi alpinism y de jì a crëp.

Presidënc iel stat:
Hans Senoner da Mauriz (AVS) dal 1954 al 1955
Hans Senoner da Mauriz (AVS) y Flavio Pancheri (CAI) dal 1956 al 1958
Luis Stuffer da Sabedin (AVS) y Edmund Moroder Tannenheim (CAI) dal 1959 al 1960
Hermann Keim (AVS) y Luis Piazza da Cudan (CAI) dal 1961 al 1962
Hermann Keim (AVS) y Peter Demetz da Fëur (CAI) - 1963
Hermann Keim (AVS) y Oswald Mussner da Cyrill (CAI) dal 1964 al 1965
Hermann Keim (AVS) y Ludwig Moroder de Val (CAI) dal 1966 al 1967
Arnold Lardschneider (AVS) y Peter Moroder de Oswald (CAI) dal 1968 al 1969
Toni Santifaller da Banch (AVS) y Vinzenz Malsiner de Pra (CAI) dal 1970 al 1975
Norbert Mussner dl Sit (AVS) y Pius Malsiner (CAI) dal 1976 al 1977
Karl Perathoner dla Rossa dal 1978 al 1979
Georg Pitscheider da Menza dal 1980 al 1981
Adolf Kasslatter dl Cit dal 1982 al 1983
Giuani Kasslatter dl Cit dal 1984 al 1985
Christian Stuflesser de Petlin dal 1988 al 1993
Hugo Moroder dal 1994 al 1995
Fabian Demetz dal 1996 al 1999
Armin Kostner dal 2000 al 2003
Tullio Mussner da Plazola dal 2004 inant

Lia di Ciambonfs de Gherdëina
La lia ie unida metuda su dl 1973 y se à dat chësc inuem l tulan ora dl vedl vocabuler de Arcangiul Lardschneider ulache l spiegova l senificat de “jì dut a ciambonf“ che ulëssa prësciapuech di jì drët a sparon ti la vagan mpue ju per na riva ërta. La lia se tol dant de mëter adum la jënt che à legrëza de jì a pe y de ti urganisé la puscibltà de fé pea pra manifestazions nia cumpetitives naziuneles y nternaziuneles, urganisedes sota la diretives dl IVV. Chësta lia à urganisà dal 1974 inant uni ann ai prims de setëmber la marcia populera “Luis Trenker” te un di luesc de Gherdëina fajan unì adalerch nce plu milesc de persones. Per plu ani dal 1973 al 1990 ie la marces populeres te duta Europa states drët de moda, tan che uni gran luech urganisova si marcia. Al didancuei ie la marcia de Gherdëina una dla pueces te Sudtirol.

Presidënc iel stat:
Hans  Perathoner dl Mondschein dal 1974 al 1977
Willi Senoner dl Sartëur dal 1978 al 1984
Tita Insam da La Sëlva tl 1985 y dal 1988 al 1990
Bernhard Perathoner da Guton dal 1986 al 1987 y tl 1991
Angelo De Biasio dl Pis dal 1992 al 1996
Reinhold Bernardi dl Fever dal 1997 inant

La grupa di Ex Alpini A.N.A. Sëlva y S. Cristina, chëi che à fat l saudé sota l’erma di Alpini, che per la Talia y nosc raions à abù na gran storia tla segonda viera mundiela y nce daldò nfin a canche l ie unì tëut ju l militer de ublianza dl 2006, se à metù adum te Sëlva tla ustaria Grisi (hotel Wolkenstein) ai 21 de utober 1957. Dut ie pià via dal sportif y campion olimpionich dl pudejé Vinzenz Demetz (Zenz de Tita de Odl) che ie stat nce l prim presidënt. Chësta grupa se tol dant de mantenì l sprit dl alpino, la bona cumpania y de judé pra vel’ntraunida. Zënzauter ie l majer merit stat chël de avëi fat su la capela sun Jëuf de Frea (benedida dl 2004).

Presidënc di Ex Alpini iel stat:
Vincenzo  Demetz dal 1957 al 1966
Piero Zancanaro dal 1966 al 1968
Gianni  Marzola dal 1968 al 1973
Pietro Forni dal 1973 al 1976
Matthias Mahlknecht dal 1976 al 1979
Alfredo Murer dal 1979 inant

L Fotoclub Gherdëina ie unì metù su dl 1981 cun a cë Claudio Wanker y l club à al didancuei passa 50 cumëmbri. Presidënt ie Claudio Cainelli dla cësa INA de Sëlva.

La Lia Naziunela Carabinieri ie unida metuda su dl ann 1972 cun a cë Albert Kasslatter de S. Cristina y cumpëida passa 160 cumëmbri danter efetifs y simpatisanc. La grupa che à cumëmbri de duta trëi la rujenedes (talian, tudësch y ladin) se tol dant de judé y sustenì scumenciadives sozieles y tenì su la tradizion dl’Erma di Carabinieres. Presidënt ie al didancuei Giancarlo Zanotti.