I ambolc de Sëlva
Aldò dla nrescida fata da Otto Runggaldier dla cësa Mastlé, publicheda tl liber “Storia dl Chemun de Sëlva dal 1811 incà” (2005) iel te Sëlva stat ambolc:

• Josef Nocker da Frata - dl 1851    
• Josef Anton Perathoner da Frëina - dal 1869 al 1882
• Anton Senoner de Ronch - dal 1882 al 1885
• Mathias Comploi da Tieja dessot - dal 1885 al 1891
• Ujep Anton Riffeser da Tieja - dal 1891 al 1894
• Josef Mussner da Ruacia - dal 1894 al 1909
• Ujep Anton Riffeser da Tieja - dal 1909 al 1912    
• Franz Perathoner de Col - dal 1912 al 1919     
• Ujep A. Lardschneider dl Tina - dal 1919 al 1922     
• Vincenzo Riffeser da Maciaconi (de Levisc) - dal 1922 al 1924    
• Francesco Komploi da Tieja dessot - dal 1924 al 1926

Dal 1926 inant fin al 1945 iel stat i ambolc (o podestà) numinei dal Prefet de Bulsan (cun la ncëria de “commissario prefettizio”) mudan plu iedesc y stajan for mé per curt tëmp:

• Cav. Gilberto Gaiani - dl 1926   
• Barone Raimondo de Buffa della Scarletta - dl 1927    
• Dott. Renzo Sartori - dl 1927    
• Lodovico Donati - dal 1929 al 1934    
• Prof. Leone (Leo) Delago - dal 1934 al 1938
• Dr. Vincenzo La Porta - dl 1938 per curt tëmp
• Inj. Arturo Tanesini - dal 1938 al 1940    
• Emilio Comici (per 7 mënsc alalongia) - dl ann 1940    
• Giuseppe Antonio Vinatzer de Scimon - dal 1941 al 1942    
• Prof. Primo Bidischini - dal 1942 al 1943    
• Adolf Senoner da Vastlé - dal 1943 al 1944 (numinà dal’aministrazion militera tudëscia)
• Francesco Mosna dl Pinter (ustaria Flora) - dal 1945 al 1952

Dal 1952 inant ie i uemes de Chemun y de cunseguënza nce l ambolt unì lità dala jënt de Sëlva; l ambolt ie unì lità dal Cunsëi de Chemun

• Josef Anton Vinatzer de Scimon - dal 25.05.1952 al 28.05.1960
• Rudolf Kasslater dl König - dal 29.05.1960 al 30.05.1964
• Franz Costa dl Pech - dal 31.05.1964 al 07.06.1980
• Dr. Ferdinand Mussner da Costa - dal 08.06.1980 al 11.05.1985
• Hermann Senoner de Celestin - dal 12.05.1985 al 12.08.1996

Dl 1995 ie l ambolt unì lità per l prim iede diretamënter dala populazion y nia tres l Cunsëi de Chemun:

• Luis Linder (vizeambolt nciarià) - dal 12.08.1996 al 07.12.1996
• Roland Demetz de Plan - dal 08.12.1996 al 16.05.2010
• Dr. Peter Mussner da Larciunëi - dal 17.05.2010 al 10.05.2015
• Roland Demetz de Plan - dai 10.05.2015

Sun la cumposizion politica y i uemes dla jonta possen liejer plu avisa tl liber dat ora da Otto Runggaldier che publichea nce la fotos dla gran pert de chisc. Tla pert che à da nfé cun i frabicac dl chemun iel da liejer deplù sun vel’ambolt y i lëures fac sota si legislatura. La cumposizion di cunsëies de chemun ti ani do la viera ie stata da truep mudamënc. La prima vela democratica do la viera ie stata dl 1952 cun doi partic da crì ora: la SVP-Südtiroler Volkspartei (metuda su dl 1945) y la DC-Democrazia cristiana (gran partit naziunel de ispirazion catolica). Bele dl 1956 y pona dl 1960 fovel unì metù su n terzo partit da n valgun zitadins de rujeneda taliana y de ispirazion plu de man drëta cun a cë l apotecher da ntlëuta dr. Renato Penso, che ie nce unì lità te tramedoi legislatures. Dl 1969 à per l prim iede candidà nce na lista dl post ndependënta, Lista Sella, metuda su da Andrea Senoner dla Villa al Sole che ie dl 1974 jita adum cun la DC cun capolista dr. Josef Demetz se tlaman dl 1980 Sella Indipendente. Dl 1995 ie i cunsilieres dla Lista Sella pona jic ite tla lista Ladins y dl 1996, do na legislatura de mé un n ann per la mort dl ambolt Hermann Senoner, iel ruvà leprò la lista Sëlva 2000. L’ultima mudazion ie stata dl 2005 canche la Lista Sella à inò mudà inuem te Lista di Zitadins. Leprò à candidà la SVP y la lista Ladins. Dl 2010 fovel cater listes: SVP, Ladins Dolomites, Lista di zitadins Sëlva y Die Freiheitlichen.
La SVP à abù l ambolt de Sëlva zënza nteruzions da do la viera nfin al 1996.Da dedò iel stat l ambolt – Roland Demetz dla lista Ladins dal 1996 al 2005 y dla Lista di Zitadins da mei 2005. La Jonta de Chemun ie belau for stata esprescion de na coalizion danter doi partic: dal 1952 al 1968 SVP y DC, dal 1985 al 1989 SVP y Lista Sella, dal 1995 al 1996 SVP y Ladins, dal 1996 al 2005 Ladins y SVP y da mei dl 2005 inant Lista di Zitadins y SVP. Mé sota i ambolc Franz Costa  y Dr. Ferdinand Mussner à la SVP guvernà te jonta da sëula da juni dl 1969 al mei dl 1985 y sota Hermann Senoner da mei dl 1990 a juni dl 1995. De mei dl 2010 ie deventà ambolt dr. Peter Mussner dla SVP che ie jita n coalizion cun la lista Ladins Dolomites.

La stredes tl Chemun de Sëlva
La streda de Gherdëina nfin pra la cësa Skasa danter Urtijëi y S. Cristina ie unida giaurida ai 26 de utober dl 1856 (streda a paiamënt cun daz) y dl 1867 iel unì giaurì la ferata dl Prëner. Nsci fova Gherdëina cunlieda bëndebò bën a duta l’Europa y l fova mesun traspurté ora dla valeda la chiena y la roba zipleda che univa fata n gran cuantità. Dant purtova la stredes per ruvé tla Val dl Isarch tres Laion o tres Bula y Ciastel. Chësta stredes fova sambën scialdi plu longes y sfadiëuses tan che la giaurida dla streda de Gherdëina basora fova unida festejeda ala ngranda. Åën oven mé plu doi ëura y mesa da ruvé cun cëries da ciaval da Pruca a Urtijëi. Sëlva y S. Cristina ova sambën purvà bele riesc de fé inant la streda nfin t’insom la valeda, ma ova scialdi deficulteies cun i osc y i ferlëigri de Urtijëi, che se temova de pierder tres la streda t’insom la val na pert dl turism che ova scumencià a purté l bënsté. Chësc nce sce bele ntlëuta ova i Chemuns de Sëlva y S. Cristina judà a paië la streda da Pruca ite che de ndut fova unida a custé 55.000 rainesc y che cun l daz ratoven de paië ju te 26 ani. L Chemun de Sëlva à for paià pea per la manutenzion dla streda da Pruca ite y nce per l puent Starz de Pruca nfin dan la segonda viera. Te de plu protocoi dl chemun tl tëmp dl fascism iel scrit de cuntribuc per la “streda consorziela de Gherdëina” (16%) y per l puent de Pruca  (6% dla spëises). La streda de Gherdëina ie unida zareda pea da gran eghes bën trëi iedesc, l ann 1882, dl 1884 y pona mo n iede dl 1966. La streda dal Skasa ite ie pona unida slargëda y cumededa (na streda da ciaval da Pescosta ite fovel bele dai cënc ani) a spëises di Chemuns de Sëlva y S. Cristina n valgun ani do y ova dal 1892 na segonda stazion da paië l daz ora Pescosta nce sce dal 1890 fova duta la streda unida metuda sota la medema aministrazion y tlassificheda “Konkurrenzstrasse 2. Klasse” cun la larghëza minima de 240 cm. Sambën ne ti plajova chësc nia ala jënt de Sëlva y S. Cristina, ma i gran ferlëigri y i osã de Urtijëi fova stac boni de tenì su chësc segondo daz. Permò plu tert iel stat mesun de se partì danter i trëi chemuns l daz che univa paià a Pruca per duta la streda de 21 km nchin te Plan. L daz ie pona restà nfin canche la streda ie passeda ala provinzia. Dl 1885 ie la streda bele da furné cun cales y ciavei nfin pra la ustaria de Plan (DÖAV 1888). L DÖAV se mbinciova te si “Führer” dl 1888 nce che l fossa drët che la streda de Gherdëina unisse slungëda su per l Jëuf de Frea y unisse tacheda adum cun la streda dla Dolomites a Curvea. Nfin dan la prima viera pudoven passé sun la streda de Gherdëina mé cun massaries da ciaval y l prim auto passà ntëur l 1890, ie aldò de na publicazion de Karl Felix Wolff dl 1934, unì trat zeruch cun ciavei. L cunliamënt cun Sëlva fova dl 1890 mpo drët bon tan che ntan l instà fovel bele doi “Stellwagen“ (na gran cales che menova la jënt y nce l material) y nce la posta univa purteda a Urtijëi doi iedesc al di. Te Sëlva jiva la gran streda de Gherdëina nfin do la prima viera su per Plan da Tieja y Col da Larjac, Pizuela, Pigon y Col da Lech ulache l ie al didancuei la streda cumenela, ruvan da Col da Lech ju jal Ghetun y Sotanives ite plu o manco ulache la ie al didancuei. Ntlëuta univa l stradon dai auti fat tan daujin ala cëses che la jiva. L stradon fova dantaldut n mesun per ruvé saurì y ne fova udù da deguni coche n desturp y l trafich ne fajova tëma a deguni. Sambën che chësc se à cun l passé di ani y l tò su dl trafich mudà dassënn. L stradon da Dorives ite ie permò unì fat do la prima viera dl 1935/36 dala Talia. L ann 1931 ova pona l stradon tres Sëlva giapà l inuem “Via Roma” coche duta la majera stredes cumeneles tla Talia y dl 1933 iel unì asfaltà per l prim iede n tòch de streda. L marciadé de auteresc y statues y nce l crëscer dl turism ti prim ani dl 1900 fajova unì su l bujën de n miëur cunliamënt cun la ferata dl Prëner (Südbahn) y n pensova do cie che n pudëssa fé. Te duta l’Europa univel frabicà dassënn cunliamënc tres scines y nce Gherdëina ulova aprufité de chësc mesun nuef de se muever.
Dl 1905 oven metù su a Urtijëi n cumité per studië na linia adateda, tan che n njenier dl’Austria ova fat n proiet per fé na ferata da Bulsan tres Gherdëina y inant nfin a Cortina. L fossa stat na ferata cumbineda danter scines y scines dentedes (Zahnradbahn), n proiet ntlëuta drët “avangardist”, ma che mo al didancuei ëssa na cërta atrativa. L stude ne fova nia unì tëut su tl program dla ferates dl’Austria y nsci ne fovel dan la prima viera nia unì a se l dé cun na ferata tres nosta val. La stredes su per i Jëufs de Frea y de Sela ie unides fates tl tëmp dla prima viera (dal 1915 inant), pona cumededes dl 1928 tl tëmp dl fascism dal chemun (nfin ntlëuta tlassificheda “strada militare”) y passedes dl 1929 a ”strada provinciale” y asfaltedes permò l ann 1960 (Sela) y 1961 (Frea). L ann 1923 fova la lista dla stredes cumeneles drët curta; l fova de ndut mé 15 stredes cun de ndut 12,8 km y mé la streda cunsorziela de Gherdëina ova na larghëza de 4 metri; duta l’autres fova danter 1,6 y 2,0 metri lerges. Tl Chemun de Sëlva iel al didancuei 38 km de stredes publiches. De chëstes bën 19,27 km ie stredes cumeneles y 10,33 km tretuars, la majera pert fates sambën do la segonda viera y la gran pert propi ti ani de majer svilup dl luech.

La stredes ora per chëi ridli
Nteressant possel vester savëi da canche i ridli de Sëlva ie unii giaurii al trafich di auti:
Streda Nives dal Ghetun sun dlieja y inant nfin tal Pech frabicheda dl 1960; dant fovel mé na streda da ciaval y do la viera na streda da passé cun n auto mé de un viers.
Streda Dantercëpies y Val (dal Scoiattolo su y ju nchin ja Cëdepuent nfin te Val sota i mures ite) l ann 1933 canche la “Casa al Monte” dl marchese Fossi ie unida fata su. Chësta streda se tlamova ntlëuta Aldian.
Streda Larciunëi dl 1969 da pert di saudeies che laurova per i Campionac dl mond de schi. Dant passova mé datrai de scroch la jeep di patrons dla ustaria de Val.
Streda sëura Lech fova la prima streda fata duta sun grunc privac y tacova adum Rustlea (Villa Adua dlongia l hotel Piccolo) cun la Villa Ardita fata l ann 1939/40. Chësta doi cëses fova duta doves de autoriteies fascistes. L paiamënt di grunc adurvei ie permò unì fat do la viera.
Streda Daunëi (dal Crist da Pënia su o coche n ti dijova plu da giut su do Ruëut) ie unida fata l ann 1958 sciche prima streda dai auti y pona spusteda sun la trassa de al didancuei l ann 1967/68. I prim auti ie ruvei nfin sa Guton dl 1959.
Streda La Sëlva l fova mesun furné ora cun n auto dal 1958 inant y nfin ora Ciaslat ie la streda unida fata dl 1969 da pert di saudeies che laurova per i Campionac dl mond de schi. Dan l 1958 ruvoven ora La Sëlva mé cun vel’jeep.
Streda Dorives (statela) fata l ann 1935/36.
Streda Ruacia nce chësta frabicheda ora dl 1968/69 per i Campionac dl mond de schi.
Streda Col Raiser ie na vedla streda che ie unida slargëda per passé cun auti ala fin di ani 1950.
L ultim tòch de streda nuef te Sëlva ie bën la zircumvalazion de S. Cristina, giaurida ai 16 de lugio dl 2009, che ie per plu de 500 metri dal Ampezan nfin tla raida da Dorives sun l raion dl Chemun de Sëlva.

L svilup dla populazion
La statistiches ufizieles sun la populazion dl Chemun de Sëlva scumëncia permò dl 1939 da canche l ie nce i prim protocoi reguleres de chemun. Dant iel statistiches dl Österreichisches Statistisches Zentralamt (che teniva cont dla populazion che vivova tl luech n l di dl censimënt y nia de chëla che ova la residënza) y vel’ numer scrit te libri y zaites dl DÖAV che purtruep ne n’ie nia for l medem. I ani dal 1800 al 1900 fova per Sëlva nia de bon ani y de plu zitadins che ova na cërta scumenciadiva, ova lascià nosc luech speran de avëi fertuna te vel’ zità dl’Europa, magari sciche marcadënt o jan a studië. L svilup dl turism ala fin dl 1800 à bel plan mustrà su na perspetiva de lëur fajan l mëinacrëp, l maester de schi o lauran ti prim hotiei fac su te chël tëmp. Ntan chësc secul ne n’ie la populazion de nosc luech chersciuda nët nia y à ala fin dl 1800 monce tëut ju per gauja che n grum lasciova nosc luech per se crì da lëur nzaul. Danter l 1940 y l 1950 ne n’a la populazion tëut su tan che nia pervia dla segonda viera mundiela, dal 1950 al 1960 ala tëut su dl 25%, dal 1960 al 1970 dl 33%, dal 1970 al 1980 dl 13%, dal 1980 al 1990 dl 4%, dal 1990 al 2000 dl 5% y dal 2000 al 2009 dl 9,6%. L majer svilup iel donca stat dal 1960 al 1970. La cumposizion dla families à cun l tëmp for tëut ju passan da 4,5 persones  (dl 1965) a manco de 3 persones per familia ncueicundì.

Cumpëida dla families

• 1960    1.551 abitanc    354 families    4,4 persones per familia
• 1970    2.011 abitanc    438 families    4,6 persones per familia
• 2005    2.582 abitanc    915 families    2,8 persones per familia
• 2009    2.624 abitanc    951 families    2,7 persones per familia

Censimënt

• 1981    2.263 abitanc    1.990 (87,94%) ladins, 138 talians y 135 tudësc
• 1991    2.394 abitanc    2.024 (88,31%) ladins, 131 talians y 137 tudësc
• 2001    2.513 abitanc    2.208 (87,84%) ladins, 155 talians y 150 tudësc

L FABRICHÉ TE SËLVA
Venduda de grunc per talianisé Sëlva ti tëmps dl fascism
Per talianisé l luech de Sëlva (ma sambën nce tl rest de nosta provinzia) ova i podestà che fova stac te Sëlva y che ova aministrà da sëui l chemun danter i 20 de mei dl 1926 y l prim de agost dl 1943 giapà istruzions de cialé ulache l fova mesun de fé ruvé zitadins dl Rëni Talian a tò ite posã de mpurtanza y nce a se cumpré velch tlo. Sambën oven te chëi tëmps bele capì che nosc luech pudova avëi n gran svilup turistich y l se tratova de se fé tlo na sënta per passé si tëmp liede.
L Chemun de Sëlva ne n’à mei abù puscions a mesa l luech ajache chëstes fova dutes dl grof, ma l ova pastures ntëur ora y chëstes ie n pert unides vendudes a fulestieres propi te chëi ani. L priesc de venduda fova dl dut simbolich nce per chëi tëmps y se muvova danter 1 lira y 2,5 lire per m².

Nsci iel unì vendù:

• Dl 1937 sun Funtanes dlongia la stazion a val Dantercëpies passa 5.000 m² al “Sci Club 18” de Roma
• Dl 1938 sun Daunëi dan pië ite per l troi dla stazions 2.000 m²
• Dl 1938 te Fraz 1.100 m²
• Dl 1939 te Plan 302 m²
• Dl 1939 sota Risacia 10.723 m²
• Dl 1942 la p.f. 940/1 tl raion ulache l ie la utia Comici de 2.500 m² y mo n valguna d’autra pitla parzeles ulache fulestieres à fat su cëses.
• Dl 1937 ala “soc. slittovie di Selva” (che ova frabicà l luson sun Ciampinëi) 11.548 m².

Sambën ova vel’un de chisc seniëures da oradecà (belau duc cun vel’titul da nëubl sciche baron, conte o marchese) nce cumprà grunc da privac y for tIa plu bela lueges. Na delibra de vënder n tòch de grunt de auril dl 1943 fova sun dumanda di paures inò unida trata zeruch de utober dl medem ann dal ambolt “Kommissarischer Verwalter” Adolf Senoner da Vastlé che fova permò unì numinà.

Planns urbanistics
L prim plann urbanistich o plann reguladëur de nosc chemun ie unì fat sota l fascism l ann 1929 y pona inò dl 1937. Chisc documënc metova plucheauter regules sun l’autëza dla cëses, la destanza dal ujin y dala sëida, ma nce regules per i culëures di tëc, la grandëza di vieresc y de plu normes tl ciamp saniter. Pervia dla ntraunides dla segonda viera mundiela ne n’à chësc plann nia abù gran “resultac” per l svilup dl luech.
Dessegur fova chësc plann, che ne n’ie nia plu da giapé nianca tla documentazion dl chemun, fat per svilupé dassënn l luech y dajova regules che ntlëuta ne fova nia da ti fé capì ala populazion. L Regim udova danora n cër svilup y ne se cruziova nia de ruiné vel’ejistënza privata per ruvé a si fins. Nteressant iel a mustré su che te chësc plann fovel udù danora n cunliamënt drët progessif cun Dantercëpies fajan pië via la furnadoia sëura l hotel Oswald y purtan ju la pista dai schi fin pra stradon. Udù danora fovel ti prei da Nives nce n ciamp da fé al palé (ti prei da Cëdepuent) y nce n stude per n ciamp dal golf. L svilup dl paesc y la cëses per la populazion fova dantaldut ududes danora ti raions plu a surëdl (sëura Lech, Plazola y Larciunëi). Tamesa Nives pona ulova l’aministrazion fascista fé dl 1938 n “Grand Hotel Dux” y n palaz de chemun adatei ala mpurtanza turistica dl luech y al splendor dl “Regime”. Do la viera ie l prim plann dl frabiché unì fat dl 1974 (apruvà ai 8 de auril dl 1974 dala Jonta provinziela), pona inò dl 1984 y dl 1999.

L gran svilup dl frabiché te Sëlva ie stat propi dan che l ie unì fat l plann dl 1974 y chësc per de plu rejons che ie unides dant te Sëlva plu che te d’autri luesc de Sudtirol:

• L gran svilup dl turism bele dan la segonda viera y pona inò ti ani 1960 che à purtà l bënsté. Chësc fator ne n’ie nia mé te Sëlva, ma bën te duta Gherdëina.
• L mancë de n plann dl frabiché nfin al ann 1974 a na maniera che plu o manco uniun che ova n tòch de grunt pudova frabiché.
• L fat che la gran pert dla spersa tl zënter de Sëlva fova de un patron, dl grof descendënt di von Wolkenstein, praticamënter dut l grunt da Nives, danter l hotel Oswald y l hotel Krone, nfin sal Biancaneve y nce mo inant nchin pra la stazion dla furnadoia de Dantercëpies. L grof ova metù sun l marcià dut chësc grunt, ova fat “parzeles” de za. 1.000 nfin 2.000 metri y ova vendù te puec ani dut si avëi. Na puscibltà unica per n grum de jënt de Sëlva, ma nce da oradecà, de se cumpré n tòch y de pensé al frabiché. A unëur dl’aurità muessen dì che l grof ne n’à fat ora de chësc gran avëi nia na speculazion, ma che uniun che ova mpue de snait y magari mpue de scioldi, pudova ti la vaghé de deventé patron de n tòch de grunt tl zënter de Sëlva.

Cubatures ti dejeneies passei
Nteressant iel mo la cubatures de chël che l ie unì frabicà ti dejeneies passei.

• Danter l 1971 y l 1981 (11 ani) 227.495 m3 (dac ora dl plann dl frabiché dl 1984) media 20.681 m3 al ann.
• Danter l 1995 y l 2004 (10 ani) 575.546 m3 (dac dl ASTAT) media 57.546 m3 al ann.
• Danter l 2005 y l 2008 (3 ani) 115.366 m3 (dac dl ASTAT) media 38.455 m3 al ann.

NB: la legislazion provinziela sun l frabiché tl ciamp di hotiei, garnis y residence ie unida mudeda de plu iedesc dal 1995 inant y à lascià pro de frabiché scialdi deplù che dant.

L svilup dla abitazions te Sëlva
Dl 1858: 104 paures y d’autra 37 cëses (de ndut 141), sambën na pert nce n partida, mé trëi ustaries y perchël possen dì che i cuatieres ne fova segur de no plu de 200.
Zirca 100 ani do dl 1951 fovel tl Chemun de Sëlva 314 cuatieres
dl 1961 fovel 467 cuatieres, dl 1971 fovel 891 cuatieres y 530 families.
L ann 1981 fovel 946 cuatieres y de chëi 325 da afité a fulestieres y 621 ulache l vivova 622 families de Sëlva.
Dl 1991 fovel 1.123 cuatieres y de chëi 401 da afité.
Dl 1996 fovel 793 families (171 deplù che dl 1981).

L’eghes de chemun
Dl 1800 y nfin do la prima viera mundiela ova uni luech (o miec uni grupa de cëses) si ega plu o manco bona y plu o manco segura per cujiné y per dé da bever al bestiam. Nsci fovel plu droc che ugova a n valguna cëses adum y a lavé jiven per la gran pert te ruf o te vel’aghel che passova nia dalonc da cësa. L’ega adurvoven dantaldut nce per i mulins y de chisc n fovel feter te uni raion (Ciampac, Cëdepuent, Tina, La Sia, Fuloni, Daunëi, La Poza, ta Mulin, sota Frëina, te Plan, Linacia, Ciaslat, Ruacia, Scimon). L’ega te cësa ie stata na gran nuvità y ie ruveda do y do, y permò ntëur l 1940 te de plu cëses, nce sce l fova n’ega nia segura y univa pazia pra feter uni temporal y dlaciova feter for d’inviern.
Cun l turism ala fin dl 1800 an scumencià a fé cundotes dal’ega per garantì l’ega ai fulestieres y nsci ova la ustaries de Sëlva messù se crì funtanes segures y se mëter ju calons de fier (dant fovi de lën). Ma la dumanda d’ega frëscia y bona fova for majera y l fova n bujën assolut per l turism. Tant che tl tëmp dl fascism dl 1937 se ova la autoriteies dl Stat talian damandà te Sëlva per pudëi ti dé la carateristica de luech de cura y turism y per pudëi giaurì na azienda de turism che Sëlva fajësse cundotes cumeneles cun ega cuntroleda coche udù dant dala normes igieniches. L dutor de Chemun de Sëlva dr. Franz Gasser scrijova dl 1938 che n valgun raions de Sëlva ne fova de chësc viers nët nia a post: nscila Daunëi, la Vila y Tublà che ova duc mé resservares y calons dal’ega de lën y suvënz mé funtanes tëutes su te vel’paluch.
Nsci nce la cëses dedite dala dlieja nchin te Plan ulache l’ega da bever univa plu o manco mé tëuta ora de ruf. Nce la Sëlva y Ciaslat ova mé cundotes de lën che jiva da un n droch al auter. L miec se n stajova La Poza che ova bele calons de fier zincà y nce i majeri hotiei: Oswald, La Gërva, Juan, Krone, Alpino, nce l pech-Caspier, l luech de Ciampac y la ustaria de Val. L prim proiet per l’ega cumenela fat dl ann 1939 udova danora na cundota nueva da Plan de Gralba ju te Sëlva, ora nfin a Maciaconi y via la dlieja de S. Cristina, ma l ne fova nia unì realisà pervia dla ntraunides dla segonda viera. Ntant se ova S. Cristina giapà na autra soluzion tulan l’ega ora de Ncisles y Sëlva ova pona dl 1951 fat n proiet per tò l’ega sun Plan de Gralba fajan nce doi resservares (un sun Costabella y un sun Burdengëia cun de ndut 155 m3 de capienza). I lëures scumencei d’autonn dl 1951 ie unii ufizialmënter finei dl 1955. Drët stolc foven de avëi cundotes dal’ega cun 5.415 metri de calons che ova custà 38 milions lire y n minova de ti vester stat al problem dl’ega per n grum de ani (coche ova dit l ambolt Josef Anton Vinatzer de Scimon pra la festa dla benedescion). Cruzià de chësta prima majera cundota dal’ega se ova dantaldut Zenz maester (Vinzenz Dellago), che fova ntlëuta assessëur de chemun. Tommaso Giorgi che a laurà ti ufizies de chemun per plu de 40 ani conta che pra l’inaugurazion dla prima cundotes oven giaurì l’ega via Col da Rainel y dan l’ega fovel unì ora di calons na pitla suricia.
Chësta prima cundota ne purtova per l inviern nia ega assé (nce sce n ova plu iedesc fat lëures pra la funtanes per abiné duta l’ega) y bele dl 1957 oven tëut su l’ega sota i Plans de Frea che fova scialdi de miëura cualità.

Do y do fovel for inò de bujën de ngrandì la cundotes y de miuré l servisc cun lëures damprovia:

• Dl 1962 cunliamënt di doi resservares de Costabella y Daunëi;
• Dl 1968 na segonda cundota ju de Frea y n resservar nuef sun Frea;
• Dl 1969 la cundotes danter l Ghetun y La Sëlva;
• Dl 1972 n resservar da 700 m3 sun Daunëi y dl 1977 n segondo da 1000 m3
• Dl 1984 resservar ora Ciaslat.

L’ega ti raions ntëur Sëlva ora ie suvënz unida metuda cun l aiut di abitanc de chël raion che jiva, coche n dijova, a “reboten” (Rebotdienst - a lauré debant) nscila ora La Sëlva, ite per ch’la Vila (dl ann 1957) y su per Daunëi (dl 1961). Dl ann 1986 y ti ani do iel pona unì fat de gran lëures pra l la cundotes dal’ega ngrandian plu o manco duta la nfrastrutura, calons, resservares y fajan na gran cundota che ncërtla ite dut l raion zentrel de Sëlva a na maniera che n possa zaré ju nce mé vel’pitl raion ti lascian ruvé l’ega ai autri. Te chësta ucajion iel nce unì fat na segonda cundota da Ncisles ora che ti porta l’ega de chemun ai luesc da Tublà y taca adum sun Daunëi la doi strutures a na maniera da avëi na garanzia mplu. La spëisa per chësc lëur ie stata de passa 4 miliardes lire y n ie stac boni de garantì a chësta maniera ega dut l ann a duta Sëlva nfin ora Dorives. I raions da Ruacia y Plan da Tieja ie tachei ala cundotes de S. Cristina y ora de chël iel mo vel’pitla cundota privata (Santuel, Ronch, Pozzamanigoni, Pramulin). L gran cunsum d’ega y i cosã relativamënter auc dl’ega, ma mo deplù dla eghes pazies che se n va à for purtà descuscions sun co finanzië chësc servisc y do avëi purvà ora de plu sistems à l chemun dl 1992 fat ora de mëter pra uni cësa n aparat che mesura l cunsum fajan nce tarifes desferenziedes a segonda dla gauja dl cunsum (abitanc de Sëlva, luesc da paur per la stales o turisc).
Ti 70 ani ntan chëi che l chemun se à cruzià dl’ega da bever, à n grum de persones y autoriteies abù si meric y si cruzi, ma una na persona se à bën cruzià per plu de 50 ani dl’ega de chemun, Zenz Obletter (per plu ani tlamà Zenz de chemun), vardian dl’ega nfin dl 1995 canche l à dat ju si lëur al polizai de chemun Klaus Mussner. Sëlva à for abù de bona y assé ega da bever y chësc ie na richëza che suvënz ne vën nia cunscidreda assé. Bele nosc antenac savova cie che i ova cun l’ega y chësc ie nce unì detlarà te vel’ciantia sciche te “Sëlva ie n bel paesc” che dij plu inant “nëus on pa dut aldò y de tel bona eghes mo y de tel bona aries…”.